ཟླ་བ་དང་པོའི་ཚེས25ཉིན། ཞིང་ཆེན་སྐབས་བཅུ་གཉིས་པའི་དམངས་ཆེན་གྱི་གྲོས་ཚོགས་ཐེངས་བཞི་པ་དེ་ཁྲེང་ཏུའུ་ཅིན་ཅང་འགྲོན་ཁང་དུ་འཚོག་འགོ་ཚུགས་པ་རེད།
ཐེངས་འདིའི་ཚོགས་ཆེན་ལ་ཞུགས་དགོས་པའི་འཐུས་མི881ཡིན་ཞིང་དངོས་སུ་ཞུགས་པའི་འཐུས་མི848ཡོད་པས་ཁྲིམས་བཀོད་མི་གྲངས་དང་མཐུན་པ་རེད།
ཚོགས་ཆེན་གྱི་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞི་དང་ལག་བསྟར་ཀྲུའུ་ཞི་ཝང་ཏུང་མིང་གིས་འགོ་ཚུགས་ཚོགས་ཆེན་གྱི་གཙོ་འགན་བཞེས་ཤིང་། ཚོགས་ཆེན་གྱི་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞི་དང་ལག་བསྟར་ཀྲུའུ་ཞི་ཧྥན་རུའེ་ཕིང་དང་ཁྲེན་ཀོང་ཀྲི། ཀྲང་ཏུང་ཧྲེང་། ཧོང་རུན་ཆུའེ། ཕུན་ཡུས། ལིའུ་ཏའོ་ཕིང་། ཙུན་ཧྲེན་ཆོན། ལི་ཞང་ཀྲི་བཅས་ཀྲུའུ་ཞི་སྟེགས་བུའི་མདུན་གྲལ་དུ་བཞུགས།
ཞིང་ཆེན་སྲིད་གྲོས་ཀྱི་ཀྲུའུ་ཞི་ཁོ་ཙུན་ཕིང་ཚོགས་ཆེན་དུ་ཞུགས་ཤིང་ཀྲུའུ་ཞི་སྟེགས་བུར་བཞུགས།
སྔ་དྲོའི་ཆུ་ཚོད་བཅུ་པའི་ཐོག་ཝང་ཏུང་མིང་གིས་ཚོགས་ཆེན་ཚོགས་འགོ་ཚུགས་པའི་ཁྱབ་བསྒྲགས་གནང་བ་དང་། ཚང་མ་ཡར་བཞེངས་ནས་རྒྱལ་གླུ་གཏོང་ལེན་གནང་བ་རེད།
　　ཞིང་དཔོན་གཞོན་པ་དང་ལས་ཚབ་ཞིང་དཔོན་དབྱི་ལིས་མི་དམངས་སྲིད་གཞུང་གི་ཚབ་ཞུས་ནས་ལས་དོན་གྱི་སྙན་སེང་ཞུས་པ་དང་། སྙན་སེང་གི་ནང་དོན་ཁག་གསུམ་ལས་གྲུབ་ཅིང་ལོ་ལྔའི་འཆར་གཞི་བཅུ་གཉིས་པའི་དུས་རིམ་གྱི་འཕེལ་རྒྱས་ཀྱི་གྲུབ་འབྲས་གཙོ་བོ་དང2015ལོའི་ལས་ཀར་ཕྱིར་དྲན་བྱས་པ་དང་། ལོ་ལྔའི་འཆར་གཞི་བཅུ་གསུམ་པའི་དུས་རིམ་གྱི་འཕེལ་རྒྱས་ཀྱི་བསམ་གཞིག་གཙོ་བོ། 2016ལོའི་གཙོ་གནད་ལས་ཀ་བཅས་སོ།།
དབྱི་ལིས་སྙན་སེང་ནང་ད་ལོར་རང་རེའི་ཞིང་ཆེན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་སྔོན་དཔག་དམིགས་འབེན་གཙོ་བོ་ནི། ས་གནས་ཀྱི་ཐོན་སྐྱེད་རིན་ཐང་བསྡོམས་འབོར་བརྒྱ་ཆ7ཡན་འཕར་བ་དང་། སྤྱི་ཚོགས་ཡོངས་ཀྱི་གཏན་འཇགས་རྒྱུ་ནོར་ཐད་མ་དངུལ་བཏང་ཚད་བརྒྱ་ཆ10ཡས་མས་འཕར་བ། སྤྱི་ཚོགས་ཀྱི་འཛད་རྫས་སིལ་ཚོང་བསྡོམས་འབོར་བརྒྱ་ཆ10ཡས་མས་འཕར་བ་དང་། ནང་འདྲེན་ཕྱིར་གཏོང་གི་འཕར་ཚད་རྒྱལ་ཡོངས་ཀྱི་ཆ་སྙོམས་ཆུ་ཚད་ལས་མཐོ་བ། ས་གནས་ཀྱི་སྤྱིར་བཏང་གི་སྤྱི་པའི་སྔོན་རྩིས་ཡོང་འབབ་བརྒྱ་ཆ7ཡས་མས་འཕར་བ་དང་། གྲོང་ཁྱེར་དང་གྲོང་སྡེ་སྡོད་དམངས་ཀྱི་ཡོང་འབབ་བརྒྱ་ཆ8དང་བརྒྱ་ཆ9ཡས་མས་འཕར་ཐུབ་པ་བྱ་རྒྱུ། གྲོང་རྡལ་གྱི་ཐོ་འགོད་བྱས་པའི་ལས་ཀ་ཤོར་ཚད་བརྒྱ་ཆ4.5ནང་ཚུད་དུ་ཚོད་འཛིན་བྱ་རྒྱུ་དང་། སྡོད་དམངས་ཀྱི་འཛད་སྤྱོད་རིན་གོང་གི་བསྡུར་གྲངས་ཚོད་འཛིན་བྱེད་པའི་དམིགས་འབེན་དེ་རྒྱལ་ཡོངས་དང་གཅིག་མཚུངས་བྱ་རྒྱུ། རྒྱལ་ཁབ་ཀྱིས་ནུས་ཁུངས་གྲོན་ཆུང་དང་བཙོག་འབུད་ཉུང་གཏོང་། ཁོར་ཡུག་སྲུང་སྐྱོང་བཅས་ཀྱི་ཐད་སྤྲད་པའི་ལས་འགན་འགྲུབ་པར་བྱ་རྒྱུ་ཡིན་ཞེས་གསུངས་པ་རེད།
སྙན་སེང་ནང2016ལོའི་གཙོ་གནད་ལས་ཀ་བཅུ་བཀོད་སྒྲིག་བྱས་པ་སྟེ། གཅིག་ནི་ཐབས་བརྒྱ་ཇུས་སྟོང་གིས་དཔལ་འབྱོར་བརྟན་པོའི་ངང་འཕར་ཐུབ་པ་བྱ་རྒྱུ་དང་། གཉིས་ནི་རྒྱུད་རིམ་ལྡན་པའི་སྒོས་ཁྱོན་ཡོངས་ནས་གསར་སྐྲུན་བཅོས་བསྒྱུར་ལ་སྐུལ་འདེད་གཏང་དགོས། གསུམ་ནི་དེང་རབས་ཐོན་ལས་ཀྱི་མ་ལག་མགྱོགས་པོར་འཛུགས་དགོས། བཞི་ནི་སྒྲིག་གཞི་རང་བཞིན་གྱི་བཅོས་བསྒྱུར་བྱེད་པའི་གཙོ་གནད་ལས་འགན་ལ་དམ་འཛིན་ཡག་པོ་བྱ་དགོས། ལྔ་ནི་ཕྱིར་ཕྱོགས་སུ་སྒོ་འབྱེད་མཉམ་ལས་ཟབ་སྤེལ་བྱ་དགོས། དྲུག་ནི་དབུལ་བྲལ་འགག་སྒྲོལ་ལས་ཀར་སྐུལ་འདེད་ཤུགས་ཆེན་གཏང་དགོས། བདུན་ནི་སྐྱེ་ཁམས་ཁོར་ཡུག་སྲུང་སྐྱོང་བྱེད་ཤུགས་ཆེ་རུ་གཏང་དགོས། བརྒྱད་ནི་ས་ཁོངས་དང་གྲོང་ཁྱེར་དང་གྲོང་སྡེའི་འཕེལ་རྒྱས་ཆུ་ཚད་ཇེ་མཐོར་གཏང་དགོས། དགུ་ནི་དམངས་འཚོ་འགན་སྲུང་དང་ལེགས་བཅོས་ཧུར་ཐག་བྱ་དགོས། བཅུ་ནི་སྤྱི་ཚོགས་བཅོས་སྐྱོང་ལ་ཤུགས་སྣོན་དང་གསར་སྐྲུན་བྱ་དགོས་པ་བཅས་སོ།།
ཚོགས་ཆེན་གྱི་གྲོས་རིམ་ལྟར་ཚོགས་ཆེན་དུ་སི་ཁྲོན་ཞིང་ཆེན་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལོ་ལྔའི་འཆར་གཞི་བཅུ་གསུམ་པའི་འཆར་འགོད་རྩ་གནད་ཀྱི་འཆར་ཟིན་དང་། 2015ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འཆར་གཞི་ལག་བསྟར་བྱས་ཚུལ་དང2016ལོའི་འཆར་གཞིའི་འཆར་ཟིན་བཅས་ཀྱི་སྙན་སེང་དང་། སི་ཁྲོན་ཞིང་ཆེན2015ལོའི་ནོར་སྲིད་སྔོན་རྩིས་ལག་བསྟར་བྱས་ཚུལ་དང2016ལོའི་ནོར་སྲིད་སྔོན་རྩིས་འཆར་ཟིན་གྱི་སྙན་སེང་བཅས་འགྲེམས་སྤེལ་བྱས་ནས་འཐུས་མི་རྣམས་ལ་གྲོས་ཞིབ་བྱ་རྒྱུར་སྤྲད་པ་རེད།
འབྲེལ་ཡོད་འགོ་ཁྲིད་གཞན་དག་ཚོགས་ཆེན་དུ་ཞུགས་ཤིང་ཀྲུའུ་ཞིའི་སྟེགས་བུར་བཞུགས་པ་རེད།།