གཅིག ནན་གསུམ་རྣལ་གསུམ་གྱི་ཆེད་དོན་སློབ་གསོ་ཁྱོན་ཡོངས་ནས་སྤེལ།
　　2015ལོའི་ཟླ་བ4པར། ཀྲུང་གུང་ཀྲུང་དབྱང་གཞུང་ལས་ཐིང་གིས《རྫོང་དང་ཁྲུའུ་རིམ་པ་ཡན་ཆད་ཀྱི་ལས་བྱེད་པའི་ཁྲོད་དུ་ནན་གསུམ་རྣལ་གསུམ་གྱི་ཆེད་དོན་སློབ་གསོ་སྤེལ་རྒྱུའི་སྐོར་གྱི་འཆར་གཞི》པར་འགྲེམ་བྱས་ནས་རྫོང་དང་ཁྲུའུ་རིམ་པ་ཡན་ཆད་ཀྱི་ཏང་ཡོན་དང་འགོ་ཁྲིད་ལས་བྱེད་པར་རང་གཅུན་ནན་པོ་དང་། དབང་ཆ་ནན་པོ་སྤྱོད་པ། སྒྲིག་ཁྲིམས་ནན་པོ་སྲུང་བ། མི་དྲང་བདེན་བྱེད་པ། ལས་ཀ་དྲང་པོ་སྒྲུབ་པ། ལས་ལམ་དྲང་པོ་བཏོད་དགོས་པ་བཅས་ཀྱི་བླང་བྱ་ལྟར་ནན་གསུམ་རྣལ་གསུམ་གྱི་ཆེད་དོན་སློབ་གསོ་སྤེལ་ནས་དྲང་གསུམ་རྣལ་གསུམ་ལ་བརྩོན་ལེན་བྱེད་མཁན་གྱི་ལས་བྱེད་པ་བཟང་པོ་བྱ་དགོས་པའི་བླང་བྱ་བཏོན།
　　གཉིས། ཐན་ཅིན་པིང་ཧའེ་སྡེ་ཁུལ་གསར་པར་མེ་སྐྱོན་དང་འབར་གས་ཀྱི་ལས་འཛོལ་ཚབས་ཆེན་པོ་བུད།
　　2015ལོའི་ཟླ་བ8པའི་ཚེས12ཉིན། ཐན་ཅིན་པིང་ཧའེ་སྡེ་ཁུལ་གསར་པའི་རུན་ཧའེ་སྤྱི་གཉེར་ཁང་གི་ཉེན་ཅན་དངོས་རྫས་བང་མཛོད་དུ་མེ་སྐྱོན་དང་འབར་གས་ཀྱི་ལས་འཛོལ་ཚབས་ཆེན་བུད་ནས་མི165རྐྱེན་དབང་དུ་ཤི་བ་རེད།
　　གསུམ། རང་རྒྱལ་གྱིས་རི་འགོག་དམག་འཁྲུག་ལ་རྒྱལ་ཁ་ཐོབ་ནས་ལོ70འཁོར་བར་གཟབ་རྒྱས་ངང་ནས་དྲན་གསོ་ཞུས།
　　རང་རྒྱལ་གྱིས་རྣམ་པ་སྣ་ཚོགས་ཀྱི་ཐོག་ནས་ཀྲུང་གོ་མི་དམངས་ཀྱིས་རི་འགོག་དམག་འཁྲུག་དང་འཛམ་གླིང་གིས་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ70འཁོར་བར་དྲན་གསོ་ཞུས། 2015ལོའི་ཟླ་བ9པའི་ཚེས3ཉིན་དྲན་གསོ་ཞུ་བའི་ཚོགས་ཆེན་དེ་པེ་ཅིན་གནམ་བདེ་སྒོ་མོའི་ཐང་ཆེན་དུ་གཟབ་རྒྱས་ངང་འཚོགས་པར་མ་ཟད། ཐེངས་དང་པོར་གཟབ་རྒྱས་ཀྱི་དམག་གཟིགས་མཛད་སྒོ་སྤེལ་ནས་འཛམ་གླིང་ཡོངས་ཀྱི་མི་དམངས་རྣམས་དང་མཉམ་དུ་རླབས་ཆེན་གྱི་ཉིན་མོ་དེར་དྲན་གསོ་ཞུས།
　　བཞི། ཐུའུ་ཡིའུ་ཡིའུ་ལ་ནོ་པེར་ཨར་གྱི་ཚན་རྩལ་བྱ་དགའ་ཐོབ།
　　2015ལོའི་ཟླ་བ10པའི་ཚེས5ཉིན། ཀྲུང་གོའི་རྒྱ་སྨན་ཚན་རིག་ཁང་གི་ཞིབ་འཇུག་པ་ཐུའུ་ཡིའུ་ཡིའུ་ཡིས་ཕུའུ་ནག་སུའུ་ལ་ཞིབ་འཇུག་བྱས་པར་གཟེངས་སུ་ཐོན་པའི་བྱས་རྗེས་བཞག་སྟེ2015ལོའི་ནོ་པར་ཨར་གྱི་ལུས་ཁམས་རིག་པ་དང་ཡང་ན་གསོ་རིག་གི་བྱ་དགའ་ཐོབ། དེ་ནི་ཀྲུང་གོ་རང་ཉིད་ཀྱི་ཚན་རིག་པར་ཐེངས་དང་པོར་ནོ་པེར་ཨར་གྱི་རང་བྱུང་ཚན་རིག་གི་བྱ་དགའ་ཐོབ་པ་རེད།
　　ལྔ། ཏང་གི་ཚོགས་ཆེན་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པའི་ཐོག་ཇུས་གཞི་ཆེན་མོ་གཏན་འཁེལ་དང་དམིགས་ཡུལ་བཏོན།
　　ཀྲུང་གུང་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པ་དེ2015ལོའི་ཟླ་བ10པའི་ཚེས26ཉིན་ནས29ཉིན་བར་འཚོགས། གྲོས་ཚོགས་ཐོག་ལོ་ལྔའི་འཆར་འགོད་བཅུ་གསུམ་པའི་གྲོས་གཞི་ལ་གྲོས་ཞིབ་བྱས་ཏེ་གྲོས་འཆམ་བྱུང་བ་དང་། འབྱུང་འགྱུར་གྱི་ལོ་ལྔའི་ནང་རང་རྒྱལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་ཁྲིད་སྟོན་བསམ་བློ་དང་། དམིགས་ཡུལ་ལས་འགན། གལ་ཆེ་བའི་བྱེད་ཐབས་གཏན་འཁེལ་བྱས་ཤིང་། གསར་སྐྲུན་དང་། མཐུན་སྦྱོར། ལྗང་མདོག སྒོ་འབྱེད།ཐུན་མོང་དུ་ལོངས་སུ་སྤྱོད་པའི་འཕེལ་རྒྱས་ཀྱི་འདུ་ཤེས་ཆེན་པོ་ལྔ་བཏོན་ནས། ཁྱོན་ཡོངས་ནས་འབྱོར་འབྲིང་སྤྱི་ཚོགས་བསྐྲུན་ཐུབ་པར་རྒྱལ་ཁ་ཕུ་ཐག་ཆོད་པའི་དུས་རིམ་གྱི་རླབས་ཆེན་དམིགས་ཡུལ་བཏོན་པ་རེད།
　　དྲུག། བཟའ་ཟླ་རེས་ཕྲུ་གུ་གཉིས་སྐྱེ་ཆོག་པའི་སྲིད་ཇུས་ཁྱབ་བསྒྲགས་བྱས་ཏེ་ལག་ལེན་བསྟར་འགོ་ཚུགས།
　　སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པའི་ཐོག་བཟའ་ཟླ་རེས་ཕྲུ་གུ་གཉིས་སྐྱེ་ཆོག་པའི་སྲིད་ཇུས་ཁྱོན་ཡོངས་ནས་ལག་བསྟར་བྱ་རྒྱུའི་གྲོས་ཐག་བཅད། འདི་ནི་རང་རྒྱལ་གྱིས་མི་གྲངས་དང་བུ་བཙའི་སྲིད་ཇུས་ལ་ཡང་དུ་ལོ་རྒྱུས་རང་བཞིན་གྱི་ལེགས་སྒྲིག་བྱེད་པ་མཚོན། 2015ལོའི་ཟླ་བ12པའི་ཚེས27ཉིན། སྐབས་བཅུ་གཉིས་པའི་རྒྱལ་ཡོངས་དམངས་ཆེན་རྒྱུན་ཨུའི་གྲོས་ཚོགས་ཐེངས་བཅོ་བརྒྱད་པའི་ཐོག་མི་གྲངས་དང་འཆར་ལྡན་བུ་བཙའི་བཅའ་ཁྲིམས་བཟོ་བཅོས་བྱ་རྒྱུའི་གྲོས་ཆོད་ལ་བརྡས་ཐག་བཅད་དེ་གྲོས་འཆམ་བྱུང་། བཟའ་ཟླ་རེས་ཕྲུ་གུ་གཉིས་སྐྱེ་ཆོག་པའི་སྲིད་ཇུས་དེ2016ལོའི་ཟླ་བ་དང་པོའི་ཚེས1ཉིན་ནས་དངོས་སུ་ལག་བསྟར་བྱ་རྒྱུ་རེད།
　　བདུན། ཞི་ཅིན་ཕིང་དང་མར་ཡིང་ཅིའུ་རྣམ་གཉིས་ལོ་རྒྱུས་རང་བཞིན་གྱི་ཐུགས་འཕྲད་གནང་།
　　2015ལོའི་ཟླ་བ11པའི་ཚེས7ཉིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྲུའུ་ཞི་ཞི་ཅིན་ཕིང་དང་ཐན་ཝེ་ཕྱོགས་ཀྱི་དབུ་ཁྲིད་མར་ཡིང་ཅིའུ་རྣམ་གཉིས་སིང་ཀ་ཕོར་དུ་ཐུགས་འཕྲད་གནང་སྟེ། སྔར་ལས་ལྷག་པར་མཚོ་འགག་ངོགས་གཉིས་ཀྱི་འབྲེལ་བ་ཞི་བདེ་འཕེལ་རྒྱས་གཏོང་བའི་ཐད་དགོངས་འཆར་བརྗེ་རེས་མཛད། དེ་ནི1949ལོ་ནས་བཟུང་མཚོ་འགག་ངོགས་གཉིས་ཀྱི་དབུ་ཁྲིད་པས་ཐེངས་དང་པོ་ཐུགས་འཕྲད་གནང་རེས་བྱེད་པ་རེད།
　　བརྒྱད། རེས་གསར་པའི་དམག་དཔུང་བཅོས་བསྒྱུར་བྱེད་འགོ་ཚུགས།
　　2015ལོའི་ཟླ་བ11པའི་ཚེས24ཉིན་ནས26ཉིན་བར། ཀྲུང་དབྱང་དམག་ཨུའི་བཅོས་བསྒྱུར་ལས་ཀའི་ཚོགས་འདུ་པེ་ཅིན་དུ་འཚོགས། ཚོགས་འདུའི་ཐོག་ཁྱོན་ཡོངས་ནས་བཅོས་བསྒྱུར་བྱས་ཏེ་དམག་དཔུང་སྟོབས་ལྡན་འགྱུར་བའི་ཐབས་ཇུས་ལག་ལེན་བསྟར་དགོས་ཞེས་བཏོན། 2020ལོའི་སྔོན་དུ་འགོ་ཁྲིད་ཀྱི་དོ་དམ་སྒྲིག་གཞི་དང་མཉམ་ལས་དམག་འཐབ་བྱེད་པའི་བཀོད་འདོམས་པའི་སྒྲིག་གཞི་བཅོས་བསྒྱུར་བྱས་པར་ཚད་བརྒལ་རང་བཞིན་གྱི་འཕེལ་རྒྱས་བཏང་ནས་གཞི་ཁྱོན་ཆགས་ཚུལ་ལེགས་སྒྲུག་དང་། སྲིད་ཇུས་ལམ་ལུགས་འཐུས་ཚང་། དམག་དམངས་བར་འབྲེལ་འདྲིས་བྱས་ནས་འཕེལ་རྒྱས་ཡོང་བར་སྐུལ་འདེད་གཏང་རྒྱུའི་ཐད་བཅོས་བསྒྱུར་བྱེད་པར་གལ་ཆེ་བའི་གྲུབ་འབྲས་ཐོབ་པ་བྱ་དགོས།
　　དགུ། ཀྲུང་དབྱང་གིས་མི་ཁྲི7000དབུལ་བྲལ་བྱ་རྒྱུའི་དམིགས་ཡུལ་གཏན་འཁེལ་བྱས།
　　2015ལོའི་ཟླ་བ11པའི་ཚེས27ཉིན་ནས28ཉིན་བར། ཀྲུང་དབྱང་དབུལ་སྐྱོར་གསར་སྦོལ་གྱི་ལས་ཀའི་ཚོགས་འདུ་དེ་པེ་ཅིན་དུ་འཚོགས། ཚོགས་འདུའི་ཐོག་འབྱུང་འགྱུར་གྱི་ལོ5ཡི་ནང་ཆེས་མཐའ་མའི་དབུལ་ཕོངས་མི་གྲངས་ཁྲི7017དབུལ་བྲལ་བྱ་ཐུབ་དགོས་པའི་གྲོས་ཆོད་བཏོན་པ་རེད། 2020ལོར་སླེབས་སྐབས་དབུལ་ཕོངས་ས་ཁུལ་དང་དབུལ་ཕོངས་མི་གྲངས་ཐམས་ཅད་ཁྱོན་ཡོངས་ནས་འབྱོར་འབྲིང་སྤྱི་ཚོགས་སུ་སྐྱོད་ཐུབ་པར་ཁག་ཐེག་བྱ་དགོས་པ་རེད།
　　བཅུ། མི་དམངས་ཤོག་སྒོར་ལ་དམིགས་བསལ་གྱི་དངུལ་ལེན་པའི་དབང་ཆ་ཐོབ།
　　2015ལོའི་ཟླ་བ12པའི་ཚེས1ཉིན། མི་དམངས་ཤོག་སྒོར་དེ་རྒྱལ་སྤྱིའི་དངུལ་ལོར་དངུལ་རྩའི་རྩ་འཛུགས་ཀྱི་དམིགས་བསལ་གྱི་དངུལ་ལེན་པའི་དབང་ཆ་ཐོབ་ཅིང་། མི་དམངས་ཤོག་སྒོར་གྱིས་དེའི་ནང་བརྒྱ་ཆ10.92ཀྱི་དབང་གྲངས་ཟིན་ནས་ལྗར་པན་དང་དབྱིན་ཇིའི་དངུལ་སྒོར་བརྒལ་ནས་ཨང་གསུམ་པར་གནས། དེ་ནི་མི་དམངས་ཤོག་སྒོར་གྱི་རྒྱལ་སྤྱིའི་མཛོད་དངུལ་གྱི་གོ་གནས་དེ་སྔར་ལས་ལྷག་པར་མཐོ་རུ་ཕྱིན་པ་མཚོན་ཞིང་། རང་རྒྱལ་གྱི་དངུལ་རྩ་བཅོས་བསྒྱུར་དང་རྒྱལ་སྤྱིའི་ཤོག་སྒོར་མ་ལག་རིམ་བཞིན་འཕེལ་འགྱུར་ཡོང་བར་ཤུགས་རྐྱེན་གཏིང་ཟབ་མོ་ཐོན་ཐུབ་པ་རེད།།