ཞིང་ཆེན་སྲིད་གཞུང་གཞུང་ལས་ཐིང་གིས༼ཞིང་སྡེའི་མི་སྡོད་ཁོར་ཡུག་ལེགས་བཅོས་བྱེད་པའི་སྐོར་གྱི་ལག་བསྟར་བསམ་འཆར༽ཁྱབ་བསྒྲགས་བཏང་ནས2020ལོར་བསླེབ་དུས་ཞིང་ཆེན་ཡོངས་ཀྱི་བརྒྱ་ཆ80ཡས་མས་ཀྱི་སྲིད་འཛིན་གྲོང་སྡེའི་མི་སྡོད་ཁོར་ཡུག་ལེགས་བཅོས་བྱ་རྒྱུའི་ལས་འགན་འགྲུབ་དགོས་པ་དང་།ཞིང་སྡེའི་སྡོད་དམངས་ཀྱི་སྡོད་ཁང་དང་འཐུང་ཆུ།གློག་སྤྱོད།བརྡ་འཕྲིན།འགྲོ་འོང་སོགས་གཞི་རྩའི་འཚོ་བའི་ཆ་རྐྱེན་ལེགས་བཅོས་མངོན་གསལ་ཕྱིན་ཞིང་ཞིང་སྡེའི་མི་སྡོད་ཁོར་ཡུག་ཧ་ལམ་གཙང་ཞིང་གྲ་འགྲིག་ལ་སྟབས་བདེ་པོ་བཟོ་དགོས་ཞེས་བཏོན་པ་རེད།
འཆར་འགོད་སྣེ་ཁྲིད་བྱེད་པའི་ཐད་རང་རེའི་ཞིང་ཆེན་གྱིས་རྫོང་ཁོངས་ཀྱི་ཞིང་སྡེ་གསར་པ་འཛུགས་སྐྲུན་བྱེད་པའི་སྤྱིའི་འཆར་འགོད་ཟབ་སྤེལ་གཏང་རྒྱུ་དང་།  གྲོང་ཁྱེར་དང་གྲོང་སྡེའི་རྨང་གཞི་སྒྲིག་ཆས་ཕན་ཚུན་སྦྲེལ་མཐུད་ཡོང་བ་དང་།  སྤྱི་ཕན་ཞབས་ཞུའི་སྒྲིག་ཆས་མཉམ་སྐྲུན་མཉམ་སྤྱོད་བྱ་རྒྱུར་དོ་སྣང་བྱ་རྒྱུ།ཤིང་ནགས་གཟབ་གཅོད་དང་རི་རྐོ་མི་ཆོག་པ།མཚོ་མི་སྐོང་བ།ཁང་པ་མང་པོ་མི་བཤིག་པ་བཅས་ཀྱི་རྩ་དོན་བརྩི་སྲུང་བྱེད་ཅིང་།གྲོང་སྡེ་གསར་པའི་འདུས་སྡོད་གནས་ཡུལ་དང་གྲོང་སྡེ་རྙིང་པ་བཟོ་བཅོས་སྤུས་ལེགས་གཏོང་རྒྱུའི་འཆར་འགོད་འཐུས་སྒོ་ཚང་དུ་གཏང་རྒྱུ།སྲོལ་རྒྱུན་གྱི་གྲོང་སྡེ་སྲུང་སྐྱོང་འཕེལ་རྒྱས་ཀྱི་འཆར་འགོད་སྒྲིག་བཟོ་མགྱོགས་པོར་བཟོ་རྒྱུ།ཞིང་སྡེའི་སྡོད་ཁང་གི་ཆ་རྐྱེན་ལེགས་བཅོས་བྱེད་པའི་ཐད་རང་རེའི་ཞིང་ཆེན་གྱིས2017ལོར་བསླེབ་ཚེ།གཞི་རྩའི་ཐོག་ནས་ཆིན་པ་རི་ཁུལ་དང་།  ཝུའུ་མུའུ་རི་ཁུལ།རྒྱལ་ཁབ་ཀྱི་དབུལ་སྐྱོར་འགག་སྒྲོལ་གསར་སྦོལ་ལས་ཀ་སྤེལ་བའི་གཙོ་གནད་རྫོང་བཅས་ཀྱི་ཞིང་སྡེའི་ཉེན་ཁ་ཡོད་པའི་སྡོད་ཁང་བཟོ་བཅོས་བྱེད་པའི་ལས་འགན་འགྲུབ་པར་བྱ་རྒྱུ་དང་།2020ལོར་ཁྱོན་ཡོངས་ནས་ཞིང་སྡེའི་ཉེན་ཁང་བཟོ་བཅོས་བྱ་རྒྱུའི་ལས་འགན་འགྲུབ་པར་བྱ་རྒྱུ།ཞིང་པའི་སྡོད་ཁང་འཛུགས་སྐྲུན་གྱི་སྤུས་ཚད་ཇེ་མཐོར་གཏོང་ཞིང་དྲག་ཤུགས་ཀྱིས་ཞིང་པའི་སྡོད་ཁང་སྐྲུན་པར་ཡོམ་འགོག་གི་ཚད་གཞི་བཟོ་རྒྱུ།གྲོང་སྡེ་དང་གྲོང་རྡལ་གྱི་ཨར་ལས་འཛུགས་སྐྲུན་གྱི་སྤུས་ཚད་ཉེན་མེད་ཡོང་བའི་སྐོར་ཞིབ་དོ་དམ་ལམ་ལུགས་འཛུགས་ཤིང་འཐུས་སྒོ་ཚང་དུ་གཏོང་བ་དང་།ཞིང་སྡེའི་ཨར་ལས་འཛུགས་སྐྲུན་གྱི་བཟོ་པར་རིམ་པ་བགོས་ནས་གསོ་སྦྱོང་བྱེད་ཤུགས་ཆེ་རུ་གཏང་རྒྱུ།
ཞིང་སྡེའི་རྨང་གཞིའི་སྒྲིག་ཆས་འཛུགས་སྐྲུན་བྱེད་པའི་ཐད།2020ལོར་བསླེབ་ཚེ།རང་རེའི་ཞིང་ཆེན་གྱིས་བརྒྱ་ཆ་བརྒྱའི་གྲོང་སྡེར་གཞུང་ལམ་ཤར་གཏོང་ཐུབ་པ་དང་།དེའི་ནང་བརྒྱ་ཆ95ཡི་གཞུ་ང་ལམ་ནི་ཨར་འདམ་དང་ཡང་ན་འགྱིག་སྣུམ་གཞུང་ལམ་ཡིན་པ་རེད།གྲོང་སྡེ་དང་འདུས་སྡོད་བྱེད་ཡུལ་གྱི་གཞུང་ལམ་སྲ་འགྱུར་གཏོང་ཚད་བརྒྱ་ཆ་བརྒྱར་ཟིན་པ་དང་།འབྲུ་རིགས་ཐོན་སྐྱེད་བྱེད་ནུས་ཡོད་པའི་ས་ཁུལ་གཙོ་བོ་དང་འབྲུ་རིགས་དང་དཔལ་འབྱོར་ལོ་ཏོག་སྣ་མང་འདུས་པའི་དཔེ་སྟོན་ས་ཁུལ་གྱི་རྨོ་འདེབས་འཕྲུལ་འཁོར་གྱི་འགྲོ་ལམ་ཤར་གཏོང་ཐུབ་ཚད་བརྒྱ་ཆ85ལ་ཟིན་པ།2020ལོའི་ལོ་མཇུག་ནང་ཚུད་དུ་ཁྱོན་ཡོངས་ནས་གློག་མེད་པའི་ཞིང་སྡེའི་སྡོད་དམངས་ཀྱི་གློག་སྤྱོད་གནད་དོན་ཐག་གཅོད་བྱ་རྒྱུ་དང་།རང་འབབ་ཆུའི་ཁྱབ་ཚད་ཇེ་ཆེར་བཏང་ནས་དུད་ཁྱིམ་སོ་སོར་ཆུ་མཁོ་འདོན་བྱེད་གང་ཐུབ་བྱ་རྒྱུ།འཁྱེར་འཕྲིན་དྲ་བ་（3G）རབས་གསུམ་པའི་ཁེབས་ཚད་ཞིང་སྡེའི་ཁྱབ་ཁོངས་སུ་རྒྱ་སྐྱེད་གཏང་རྒྱུ་བཅས་འགྲུབ་པར་བྱ་རྒྱུ་རེད།