ཀྲུང་གོ་བོད་ཀྱི་དྲ་བའི་འཕྲིན། མཚོ་སྔོན་མི་རིགས་སློབ་ཆེན་གྱིས་ཚེས་ཉེར་ལྔ་ཉིན་དང་ཚེས་ཉེར་དྲུག་ཉིན་གཉིས་ལ་ཞིབ་འཇུག་སློབ་མའི་གསར་སྐྲུན་ལས་སྐྲུན་གྱི་འགྲན་སྡུར་སྐབས་དང་བོ་སྤེལ། སློབ་གྲྭ་ཡོངས་ཀྱི་འབུམ་རམས་པ་དང་། རབ་འབྱམས་པ། དངོས་གཞི་སློབ་མ་བཅས་བསྡོམས་པས་འཐུས་ཚབ་རུ་ཁག་ང་གཅིག་ཐེངས་འདིའི་འགྲན་སྡུར་ལ་ཞུགས།

རྒྱལ་སྲིད་སྤྱི་ཁྱབ་ཁང་དང་། སློབ་གསོ་པུའུ་ཡིས་སྤེལ་བའི་ལས་སྤེལ་གསར་སྐྲུན་དང་ལེན་བྱེད་ཆེད། མཚོ་སྔོན་མི་རིགས་སློབ་གྲྭ་ཆེན་མོས་སྤེལ་བའི་གསར་སྐྲུན་ལས་སྐྲུན་གྱི་ཐུན་མོང་རང་བཞིན་གྱི་གསར་སྐྲུན་གྱི་ལག་ལེན་བྱ་འགུལ་ཞིག་ཡིན་པའི་ཆ་ནས། ཕུལ་བྱུང་ཞིབ་འཇུག་སློབ་མའི་གསར་སྐྲུན་ལས་སྐྲུན་གྱི་ནུས་པ་སྔོག་འདོན་དང་། བསམ་པའི་ཉམས་འགྱུར་བཟང་པོ་འཛུགས་སྐྲུན་བྱེད་པར་སྟེགས་བུ་ཆེན་པོ་ཞིག་བསྐྲུན།

ཐེངས་འདིའི་འགྲན་སྡུརབརྒྱུད་ནས། ཞིབ་འཇུག་སློབ་མའི་ཕྱོགས་བསྡུས་སློབ་གསོ་བཅོས་སྒྱུར་བྱེད་པ་དང་། ཞིབ་འཇུག་སློབ་མའི་སྣ་མང་རང་བཞིན་གྱི་སློབ་གསོ་གསོ་སྐྱོང་དང་འཚོལ་ཞིབ་བྱེད་པར་ཉམས་མྱོང་ཕུན་སུམ་ཚོགས་པ་འདོན་སྤྲོད་བྱས་ཤིང་། འགྲན་སྡུར་སྟེང་དུ་ཚན་རྩལ་གསར་སྐྲུན་དང་། བཟོ་བཀོད་མཛེས་རྩལ། རྒྱང་སྒྲོག་གློག་བརྙན་བརྙན་འཕྲིན། སྐད་ཆ་དང་རྩོམ་རིག མི་རིགས་ཀྱི་ཁྱད་ཆོས་ལྡན་པའི་ཐོན་རྫས་གསར་གཏོད་བཅས་བསྡོམས་པས་འགྲན་སྡུར་རིགས་ཆེན་པོ་ལྔ་རུ་བགོས་ཡོད་ལ། གཞན་ཡང་། གློག་རྡུལ་ཐོན་རྫས་དང་། ཚོད་ལྟ་རང་བཞིན་གྱིས་ཐོན་རྫས་གསར་གཏོད་བྱེད་པ། རི་མོ་དང་ཡིག་གཟུགས། བཟོ་རྩལ་སོགས་བརྗོད་གཞི་ཡིན་པའི་ལས་གཞི་བཅུ་གཉིས་ཁྲོད་ཀྱི་ལས་སྤེལ་གསར་སྐྲུན་བརྩམས་ཆོས་བརྒྱད་ཅུ་ལྷག་འདུ། བྱ་འགུལ་འདིས་སློབ་མ་ཚོའི་སློབ་གསེང་སྐབས་ཀྱི་ནུས་པ་འདོན་སྤེལ་དང་། གཞུང་ལུགས་དང་ལག་ལེན་མཉམ་བསྲེས་བྱེད་པར་སྟེགས་བུ་བཟང་པོ་ཞིག་བསྐྲུན།  །