ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ7པའི་ཚེས2ཉིན་འབྱོར་བའི་གཏམ་གསར།་གོང་ཚེས་ཉིན་ནོར་སྲིད་པུའུ་ཡིས་གསར་འགྱུར་ཁྱབ་བསྒྲགས་བཏང་ནས2013ལོར་ཀྲུང་དབྱང་ནོར་སྲིད་ཀྱིས་ཞིང་ལས་ཀྱི་ཉེན་འགོག་འགན་ལེན་གྲོན་དངུལ་ཐད་ཀྱི་ཁ་གསབ་རོགས་དངུལ་སྒོར་དུང་ཕྱུར126.88བཏང་བ་དེ2007ལོའི་ལྡབ6ཡིན་པས།  རྒྱལ་ཡོངས་ཀྱི་ཞིང་སྡེའི་ཉེན་འགོག་འགན་ལེན་ལས་རིགས་ལ་ཡོང་འབབ་མ་དངུལ་སྒོར་དུང་ཕྱུར306.7ཐོབ་པའི་རྣམ་པར་མངོན་འགྱུར་བྱུང་སྟེ་ཞིང་དུད་མིའི་ཐེངས་གྲངས་ཁྲི3367ལ་ཉེན་འགོག་འགན་ལེན་གྱི་ཁ་གསབ་རོགས་དངུལ་སྒོར་དུང་ཕྱུར208.6འདོན་སྤྲོད་བྱས་པས།   ཞིང་སྡེ་སྟོབས་ལྡན་གཏོང་བ་དང་ཞིང་སྡེར་ཕན་ཐོགས་པའི་སྲིད་ཇུས་ལག་ལེན་བསྟར་བའི་ཕན་ནུས་འདོན་སྤེལ་བྱས་ཡོད།
      མིག་སྔར།   ཀྲུང་དབྱང་ནོར་སྲིད་ཀྱི་ཉེན་འགོག་འགན་ལེན་ཀྱི་ཁ་གསབ་རོགས་དངུལ་སྤྲོད་པའི་ཁྱབ་ཁོངས་དེ་ཐོག་མ་ཚོད་ལྟ་བྱེད་པའི་ཞིང་ཆེན（རང་སྐྱོང་ལྗོངས）དྲུག་ནས་རྒྱལ་ཡོངས་ལ་རྒྱ་སྐྱེད་བཏང་ཡོད།   ཁ་གསབ་རོགས་དངུལ་སྤྲོད་པའི་རིགས་དེ་ཐོག་མའི་འདེབས་འཛུགས་ལས་རིགས་ཀྱི་རིགས5ནས་འདེབས་འཛུགས་དང་།  གསོ་སྤེལ།  ནགས་ལས་བཅས་རིགས་ཆེན་པོ་གསུམ་དང་བཅས་པའི་སྣ་ཁ15ལ་རྒྱ་སྐྱེད་བཏང་བས།  གཞི་རྩའི་ཐོག་ཞིང་ལས་ཐོན་རྫས་ཀྱི་རིགས་ཆེན་པོར་ཁྱབ་ཡོད།   རིམ་པ་སོ་སོའི་ནོར་སྲིད་ཀྱིས་ཉེན་འགོག་འགན་ལེན་གྱི་ཁ་གསབ་རོགས་དངུལ་སྤྲོད་པའི་ཆ་སྙོམས་ཆུ་ཚད་དེ་བརྒྱ་ཆ70དང་བརྒྱ་ཆ80ལ་བསླེབས་ཏེ་ཐོག་མའི་ཚོད་ལྟ་བྱེད་དུས་ལས་ཆེས་ཆེར་མཐོ་རུ་ཕྱིན་ཡོད་པ་རེད།
     དུས་མཚུངས་སུ་ཀྲུང་དབྱང་ནོར་སྲིད་ཀྱིས་འཚོལ་ཞིབ་བྱས་ཏེ་ཕྱོགས་མང་ཞུགས་པ་དང་།  ཐུན་མོང་དུ་ཉེན་ཁའི་འགན་ཁུར་བའི་ཞིང་ལས་ཉེན་འགོག་འགན་ལེན་གྱི་གནོད་སྐྱོན་ཚབས་ཆེན་གྱི་ཉེན་འགོག་འགན་ལེན་ཁ་འགྲེམ་བྱེད་པའི་ནང་རྐྱེན་བཙུགས་ཏེ་ཞིང་ལས་ཀྱི་ཉེན་ཁར་སྔོན་འགོག་བྱེད་པར་དགེ་མཚན་ལྡན་པའི་ནུས་པ་འདོན་སྤེལ་བྱས་ཡོད།  ད་ལྟར།  རང་རྒྱལ་ནི་འཛམ་གླིང་གི་ཨང་གཉིས་པ་དང་ཡ་གླིང་གི་ཨང་དང་པོ་ཡིན་པའི་ཞིང་ལས་ཀྱི་ཉེན་འགོག་འགན་ལེན་གྱི་ཚོང་རར་གྱུར་ཡོད།