ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ10པའི་ཚེས15ཉིན་འབྱོར་བའི་གཏམ་གསར། དེང་སྐབས་དང་ལོ་ལྔའི་འཆར་གཞི་བཅུ་གསུམ་པའི་དུས་སྐབས་ནི་རང་རྒྱལ་གྱིས་སྒོ་ཀུན་ནས་འབྱོར་འབྲིང་སྤྱི་ཚོགས་སྐྲུན་པའི་གནད་འགག་གི་དུས་རིམ་ཡིན་ལ། རང་རྒྱལ་གྱིས་ཞིང་སྡེའི་ཉེན་མེད་འཐུང་ཆུ་དང་། ཞིང་ཁའི་ཆུ་བེད་འཛུགས་སྐྲུན། ཆུ་ལོག་སྔོན་འགོག་དང་ཐན་འགོག་གནོད་སེལ། ཆུའི་ཐོན་ཁུངས་གསར་སྦོལ་དང་སྲུང་སྐྱོང་། ས་ཆུ་སྲུང་སྐྱོང་དང་སྐྱེ་ཁམས་འཛུགས་སྐྲུན། ཞིང་སྡེའི་ཆུ་གློག་གསར་སྦོལ་བཅས་ཕྱོགས་དྲུག་གི་ཐད་ནས་ཆུ་བེད་ཀྱིས་དབུལ་སྐྱོར་འགག་སྒྲོལ་གྱི་ལས་ཀ་ཡག་པོ་སྤེལ་རྒྱུ་རེད།

　ཤེས་རྟོགས་བྱུང་བར་གཞིགས་ན། ཕྱིན་ཆད་དུ་རང་རྒྱལ་གྱིས་སྒོ་ཀུན་ནས་ཞིང་སྡེའི་ཉེན་མེད་འཐུང་ཆུའི་ལས་ཀ་དམ་འཛིན་ཡག་པོ་བྱ་རྒྱུ་དང་། 2020ལོར་སྒོ་ཀུན་ནས་དབུལ་ཕོངས་ས་ཁུལ་གྱི་ཉེན་མེད་འཐུང་ཆུའི་གནད་དོན་ཐག་གཅོད་བྱས་ཏེ། དབུལ་ཕོངས་རྫོང་གི་ཞིང་སྡེར་གཅིག་བསྡུས་ཅན་གྱི་འཐུང་ཆུ་འདོན་སྤྲོད་བྱེད་ཐུབ་པའི་མི་གྲངས་ཀྱི་བསྡུར་ཚད་བརྒྱ་ཆ80སླེབས་གང་ཐུབ་བྱ་རྒྱུ། ཞིང་ཁའི་ཆུ་བེད་འཛུགས་སྐྲུན་ལ་ཤུགས་ཆེན་པོས་སྐུལ་འདེད་གཏང་རྒྱུ། ཆུ་ལོག་འགོག་པ་དང་ཐན་འགོག་གནོད་སེལ་བྱེད་ནུས་མཐོ་རུ་བཏང་སྟེ2020ལོར་རྒྱལ་ཁབ་རིམ་པའི་གཙོ་གནད་ཀྱི་དབུལ་ཕོངས་རྫོང་གི་རྫོང་མཁར་དང་ཤང་དང་གྲོང་རྡལ་གལ་ཆེན་དུ་གཞི་རྩའི་ཐོག་ཆུ་ལོག་འགོག་པའི་ཚད་གཞི་སླེབས་གང་ཐུབ་བྱ་རྒྱུ། ཆུའི་ཐོན་ཁུངས་གསར་སྦོལ་བེད་སྤྱོད་དང་སྲུང་སྐྱོང་ལ་ཤུགས་སྣོན་བརྒྱག་རྒྱུ། དབུལ་ཕོངས་ས་ཁུལ་གྱི་ཆུ་གྲོན་ཆུང་དང་འདོན་སྤྲོད་བྱེད་པའི་གལ་ཆེན་གྱི་ཆུ་བེད་ལས་གྲྭ་ལག་བསྟར་བྱེད་པར་དམིགས་སུ་བཀར་ནས་བཀོད་སྒྲིག་བྱ་རྒྱུ། སྔར་ལས་ལྷག་པར་དབུལ་ཕོངས་ས་ཁུལ་གྱི་ཆུ་འགོ་ས་ཁུལ་གྱི་ཆུ་གསོ་འཁྱོངས་དང་སྲུང་སྐྱོང་། སྐྱེ་ཁམས་ཀྱིས་ཆུ་གསབ་པ་སོགས་ཆུའི་ཐོན་ཁུངས་སྲུང་སྐྱོང་བྱེད་པའི་ཕྱོགས་བསྡུས་བཅོས་སྐྱོང་གི་ལས་གྲྭ་ཡག་པོ་བསྒྲུབ་རྒྱུའོ།

　དུས་མཚུངས་སུ་སྔར་ལས་ལྷག་པར་ས་ཆུ་སྲུང་འཛིན་དང་སྐྱེ་ཁམས་འཛུགས་སྐྲུན་བྱེད་ཤུགས་ཆེ་རུ་བཏང་སྟེ། 2020ལོར་དབུལ་ཕོངས་ས་ཁུལ་གྱི་ས་ཆུ་ཤོར་བའི་ས་ཞིང་གི་གཞི་ཁྱོན་སྤྱི་ལེ་གྲུ་བཞི་ཁྲི8.5ལ་བཅོས་སྐྱོང་བྱེད་གང་ཐུབ་བྱ་རྒྱུ། ཞིང་སྡེའི་ཆུ་གློག་གསར་སྦོལ་བྱེད་པར་སྐུལ་འདེད་ཧུར་ཐག་བཏང་སྟེ2020ལོར་དབུལ་ཕོངས་ས་ཁུལ་དུ་ཞིང་སྡེའི་གློག་འདོན་འཕྲུལ་འཁོར་གྱི་གློག་འདོན་ཚད་སྟོང་ཝ་ཁྲི300ལ་གསར་སྣོན་བྱེད་གང་ཐུབ་བྱ་རྒྱུ་བཅས་སོ།།