ཀྲུང་གོ་བོད་ཀྱི་དྲ་བའི་འཕྲིན། ཉེ་བའི་ལོའི་ནང་།བོད་ལྗོངས་ཀྱིས་སྐྱེ་ཁམས་ཁོར་ཡུག་ལ་སྲུང་སྐྱོབ་བྱེད་རྒྱུ་དེ་མཐའ་ཚད་དང་དམར་ཐིག་གློག་ཆེན་བཅས་ལ་བརྩིས་ནས།སྐྱེ་ཁམས་དཔལ་ཡོན་འཛུགས་སྐྱོང་ལ་སྐུལ་འདེད་ཤུགས་ཆེན་བཏང་བ་དང་།ནན་ཤོས་ཀྱི་ལམ་ལུགས་དང་དམ་ཤོས་ཀྱི་ཁྲིམས་ལུགས་ཐོག་ནས་གངས་ལྗོངས་ས་མཐོའི་རྩི་ཤིང་དང་རི་ཆུར་སྲུང་སྐྱོབ་བྱས་ཏེ།རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་བཅད་བརྟན་པོ་བཙུགས་ཡོད་པ་རེད།ཤེས་རྟོགས་བྱུང་བར་གཞིགས་ན།རང་ལྗོངས་ཀྱིས་མཛེས་སྡུག་ལྡན་པའི་བོད་ལྗོངས་སྐྲུན་རྒྱུའི་སྐོར་གྱི་བསམ་འཆར་དང་།བོད་རང་སྐྱོང་ལྗོངས་ཀྱི་ཁོར་ཡུག་སྲུང་སྐྱོབ་དཔྱད་ཞིབ་བྱ་ཐབས་དང་ལག་བསྟར་ཞིབ་སྲོལ།བོད་རང་སྐྱོང་ལྗོངས་ཀྱི་ཁོར་ཡུག་སྲུང་སྐྱོབ་ལྟ་སྐུལ་དོ་དམ་འགན་འཁྲིའི་གཏན་འབེབས་སོགས་བཏོན་ནས།སྐྱེ་ཁམས་དཔལ་ཡོན་འཛུགས་སྐྲུན་བྱེད་རྒྱུ་དེ་དཔལ་འབྱོར་དང་སྤྱི་ཚོགས་གོང་འཕེལ་གྱི་སྤྱི་ཡོངས་ནང་བཅུག་སྟེ་གཅིག་གྱུར་འཆར་འགོད་དང་བཀོད་སྒྲིག་བྱས་པ་དང་།འགོ་འཁྲིད་ལས་བྱེད་པའི་ཁོར་ཡུག་སྲུང་སྐྱོབ་ཀྱི་གནས་གཅིག་འགན་གཉིས་དང་ཚེ་གང་འགན་འཁྲི་རྩད་གཅོད་ཀྱི་བླང་བྱ་དོན་འཁྱོལ་བྱས་ཐོགཏང་སྲིད་འགོ་ཁྲིད་གཙོ་བོས་སྤྱི་ཡོངས་ཀྱི་འགན་འཁྲི་འཁུར་བ་དང་རིམ་ཁག་སྲིད་གཞུང་གི་འགན་དབང་གཅིག་གྱུར་གྱི་ཁོངས་གཏོགས་ས་ཆའི་དོ་དམ་མ་ལག་བཙུགས་པ་དང་།ལས་རིགས་དང་ཚན་པས་མཉམ་འཛིན་མཉམ་འདོམས་ཀྱི་འགན་འཁྲིའི་ལམ་སྲོལ་བཙུགས་ཡོད་པ་རེད།སྐྱེ་ཁམས་བདེ་འཇགས་སྲུང་བཅད་ཀྱི་སྲུང་སྐྱོབ་དང་འཛུགས་སྐྲུན་ལམ་སྲོལ་གསར་གཏོད་བྱེད་པའི་ཐད་རང་ལྗོངས་ཀྱིས་ནགས་ཚལ་དང་རྩྭ་ཐང་།འདམ་ར་བཅས་ཀྱི་སྐྱེ་ཁམས་སྲུང་སྐྱོབ་ཁ་གསབ་ལམ་སྲོལ་བཙུགས་ཡོད་པ་རེད།སྤྱི་ལོ2015ལོ་བར་ལྗོངས་ཡོངས་ཀྱིས་སྐྱེ་ཁམས་ཀྱི་ཁ་གསབ་མ་དངུལ་སྒོར་དུང་ཕྱུར184དོན་འཁྱོལ་བྱས་པ་དང་།གཙོ་གནད་སྐྱེ་ཁམས་བྱེད་ནུས་ཁུལ་གྱི་མ་དངུལ་སྒྱུར་སྤྲོད་བྱེད་ཁོངས་དེ་སྔའི་རྫོང་བརྒྱད་ནས་ད་ལྟའི་རྫོང་ཁག་བཅོ་བརྒྱད་བར་རྒྱ་ཆེར་བཏང་ཡོད་པ་རེད།སྐྱེ་ཁམས་མཉམ་གཏོད་ལས་ཀའི་ལམ་སྲོལ་འཛུགས་མགྱོགས་སུ་བཏང་བ་བརྒྱུད།གྲོང་ཚོ560དང་ཤང་(གྲོང་རྡལ)54རྫོང་གཉིས་བཅས་ལ་རང་སྐྱོང་ལྗོངས་རིམ་པའི་སྐྱེ་ཁམས་གྲོང་ཚོ་དང་།སྐྱེ་ཁམས་ཤང(གྲོང་རྡལ) སྐྱེ་ཁམས་རྫོང་བཅས་ཀྱི་མཚན་སྙན་རག་ཡོད་པ་རེད།གཞན་ཡང་།རང་ལྗོངས་ཀྱིས་ཁོར་ཡུག་སྲུང་སྐྱོབ་ཀྱི་སྲིད་འཛིན་ཁྲིམས་འཛིན་དང་ཉེས་དོན་ཁྲིམས་འཛིན།སྤྱི་བདེ་ཚན་པའི་ཁྲིམས་འཛིན་བཅས་ཀྱི་སྲུང་སྐྱོབ་ལམ་སྲོལ་ལ་ཤུགས་སྣོན་རྒྱག་པའི་རྨང་གཞིའི་ཐོགཁེ་ལས་ཀྱི་ཁོར་ཡུག་ཡིད་རྟོན་རུང་མིན་གདེང་འཇོག་བྱེད་པ་དང་ཁོར་ཡུག་སྦག་བཙོག་ཕྱོགས་གསུམ་པས་བཅོས་སྐྱོང་བྱེད་པ།ཆེད་ལས་ཀྱི་བདག་སྐྱོང་དང་མང་ཚོགས་ཀྱི་བདག་སྐྱོང་ཟུང་འབྲེལ་བྱེད་པ་བཅས་ཀྱི་ལྟ་སྐུལ་དོ་དམ་ལམ་སྲོལ་ལག་བསྟར་བྱས་ཡོད་པ་དང་།སྐྱེ་ཁམས་ཁོར་ཡུག་རྒྱུན་མཐུད་ལེགས་པོ་ཡོང་རྒྱུ་འགན་སྲུང་ཐུབ་ཡོད་པ་རེད།  །