ཀྲུང་གུང་ཀྲུང་དབྱང་ཆབ་སྲིད་ཅུས་ཀྱིས་ཚོགས་འདུ་འཚོགས་པ།

    མི་དམངས་ཉིན་རེའི་ཚགས་པར་ནས་དྲངས།    2023-11-01

《དུས་རབས་གསར་པའི་བྱང་ཤར་གྱི་ཕྱོགས་ཡོངས་དར་རྒྱས་ལ་ཚད་བརྒལ་གསར་པ་ཡོང་བར་སྔར་བས་སྐུལ་འདེད་གཏོང་བའི་སྲིད་ཇུས་དང་བྱེད་ཐབས་འགའ་ཞིག་སྐོར་གྱི་བསམ་འཆར》ལ་གྲོས་ཞིབ་བྱས་པ། ——ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཚོགས་འདུ་གཙོ་སྐྱོང་གནང་བ།

     ཞིན་ཧྭ་གསར་འགྱུར་ཁང་པེ་ཅིང་ནས་སྤྱི་ཟླ10པའི་ཚེས27ཉིན་གློག་འཕྲིན་འབྱོར་གསལ། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱིས་སྤྱི་ཟླ10པའི་ཚེས27ཉིན་ཚོགས་འདུ་འཚོགས་ནས《དུས་རབས་གསར་པའི་བྱང་ཤར་གྱི་ཕྱོགས་ཡོངས་དར་རྒྱས་ལ་ཚད་བརྒལ་གསར་པ་ཡོང་བར་སྔར་བས་སྐུལ་འདེད་གཏོང་བའི་སྲིད་ཇུས་དང་བྱེད་ཐབས་འགའ་ཞིག་སྐོར་གྱི་བསམ་འཆར》ལ་གྲོས་ཞིབ་བྱས་ཤིང་། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཚོགས་འདུ་གཙོ་སྐྱོང་གནང་བ་རེད།

     ཚོགས་འདུར་བསྟན་དོན། བྱང་ཤར་གྱི་དར་རྒྱས་ལ་སྐུལ་འདེད་གཏོང་བ་ནི་ཏང་ཀྲུང་དབྱང་གིས་བཏོན་པའི་འཐབ་ཇུས་ཀྱི་བཀོད་ཇུས་གལ་ཆེན་ཞིག་རེད། བྱང་ཤར་ས་ཁུལ་གྱི་ཐོན་ཁུངས་ཆ་རྐྱེན་ཅུང་ལེགས་པ་དང་། ཐོན་ལས་ཀྱི་རྨང་གཞི་ཅུང་བརྟན་པ། ས་བབ་ཀྱི་ལེགས་ཆ་དམིགས་བསལ། འཕེལ་རྒྱས་ཀྱི་གཏིང་ཤུགས་ཧ་ཅང་ཆེ་བ་བཅས་ཡིན་པས། རྒྱལ་ཁབ་འཕེལ་རྒྱས་ཀྱི་སྤྱི་ཡོངས་སུ་འཐབ་ཇུས་ཀྱི་གནས་བབ་གལ་ཆེན་ལྡན་ཡོད། འདི་ལོ་ནི་བྱང་ཤར་དར་རྒྱས་གཏོང་བའི་འཐབ་ཇུས་ལག་བསྟར་བྱས་ནས་ལོ20འཁོར་ཞིང་། དུས་རབས་གསར་པ་དང་རྒྱང་ལམ་གསར་པར་བྱང་ཤར་ས་ཁུལ་གྱི་ཕྱོགས་ཡོངས་དར་རྒྱས་ལ་སྐུལ་འདེད་གཏོང་བར་གོ་སྐབས་གལ་ཆེན་གསར་པ་ཕྲད་པས། རྒྱབ་སྐྱོར་སྲིད་ཇུས་སྦབ་ཆ་གཅིག་གཏན་འབེབས་བྱས་ཡོད་ཅིང་། གདེང་ཚོད་སྔར་ལས་བརྟན་དུ་བཏང་ནས་བྱང་ཤར་ས་ཆའི་དགེ་མཚན་ཆེ་རིགས་གང་ལེགས་བཏོན་ནས་བྱང་ཤར་ས་ཆ་སྤུས་ཚད་མཐོ་བའི་འཕེལ་རྒྱས་དང་རྒྱུན་མཐུད་ཆོག་པའི་དར་རྒྱས་ཀྱི་བགྲོད་ལམ་གསར་པ་ཞིག་ཏུ་སྐྱོད་པར་སྐུལ་འདེད་གཏོང་བའི་ཐད་དོན་སྙིང་གལ་ཆེན་ལྡན་ཡོད།

    ཚོགས་འདུར་ནན་གསུང་བྱས་དོན། རྒྱལ་ཁབ་ཀྱི“བདེ་འཇགས་ཆེན་པོ་ལྔ”སྲུང་སྐྱོང་བྱེད་རིང་གི་བྱང་ཤར་ས་ཆའི་ལས་འགན་གལ་ཆེན་ཁོང་དུ་བརྟན་པོ་ཆུད་པར་བྱས་ནས། ལས་འགན་ཨང་དང་པོ་སྤུས་ཚད་མཐོ་བའི་འཕེལ་རྒྱས་དང་འཐབ་ཇུས་ཀྱི་ལས་འགན་འཕེལ་རྒྱས་ཀྱི་རྣམ་པ་གསར་པ་གཏོད་པ་ཁོང་དུ་བརྟན་པོ་ཆུད་པ་དང་། འཕེལ་རྒྱས་དང་བདེ་འཇགས་ལ་སྤྱི་འདོམས། རྒྱབ་སྐྱོར་བྱེད་ཤུགས་ཆེར་གཏོང་དང་ནང་སྐྱེས་ཀྱི་སྒུལ་ཤུགས་འཕེལ་བ་ཟུང་འབྲེལ་མཐའ་འཁྱོངས་བྱས་ཏེ་བྱང་ཤར་ས་ཆའི་འཐབ་ཇུས་ཀྱི་འདེགས་སྐྱོར་ནུས་པ་ཆེ་རུ་གཏང་དགོས། ཚན་རྩལ་གསར་གཏོད་ལ་བརྟེན་ནས་ཐོན་ལས་གསར་གཏོད་ལ་སྐུལ་འདེད་གཏོང་བ་དང་། སྲོལ་རྒྱུན་གྱི་བཟོ་སྐྲུན་ལས་རིགས་སྒྱུར་བཀོད་དང་རིམ་པ་སྤར་ནས་འཐབ་ཇུས་རང་བཞིན་གྱི་གསར་དར་ཐོན་ལས་དང་འབྱུང་འགྱུར་ཐོན་ལས་སྐྱེད་སྲིང་ཧུར་ཐག་བྱས་ཏེ་འཕེལ་རྒྱས་ཀྱི་སྒུལ་ནུས་གསར་པ་ཆེ་རུ་གཏང་དགོས། དེང་རབས་ཅན་གྱི་ཞིང་ལས་ཆེན་པོ་འཕེལ་རྒྱས་གཏོང་བ་དང་། འབྲུ་རིགས་ཀྱི་ཕྱོགས་བསྡུས་ཐོན་སྐྱེད་ནུས་ཤུགས་ཆེ་རུ་གཏོང་བ། འབྲུ་རིགས་ཐོན་ཚད་བརྟན་པོ་དང་མཁོ་སྤྲོད་འགན་ལེན་བྱེད་ཤུགས་ཆེ་རུ་གཏོང་བ་བཅས་བྱ་དགོས། སྐྱེ་ཁམས་སྲུང་སྐྱོང་ལ་ཤུགས་སྣོན་བརྒྱབ་སྟེ་སྔོ་འགྱུར་མང་དུ་གཏོང་བ་ནི་ལེགས་ཆ་ཆེ་རུ་གཏོང་བ་ཞིག་དང་ནགས་ཚལ་སྲུང་སྐྱོང་ནི་རྒྱུ་ནོར་སྲུང་སྐྱོང་བྱེད་པ་ཞིག་ཡིན་པའི་འདུ་ཤེས་བཅངས་ནས་ནགས་གསེབ་དཔལ་འབྱོར་དང་གངས་འཁྱགས་དཔལ་འབྱོར་འཕེལ་རྒྱས་ཧུར་ཐག་བཏང་སྟེ་བྱང་ཕྱོགས་ཀྱི་སྐྱེ་ཁམས་བདེ་འཇགས་སྲུང་བཅད་བརྟན་པོ་སྐྲུན་དགོས། རླུང་གློག་དང་། འོད་གློག། ཉིང་གློག་སོགས་ནུས་རྒྱུ་གཙང་མ་གང་མགྱོགས་འཕེལ་རྒྱས་བཏང་ནས་རླུང་འོད་མེ་ཉིང་གསོག་འཇོག་གཞི་གཅིག་ཅན་གྱི་ནུས་རྒྱུའི་རྟེན་གཞི་སྐྲུན་དགོས། མཐའ་མཚམས་ས་ཁུལ་གྱི་རྨང་གཞིའི་སྒྲིག་བཀོད་འཆར་འགོད་བཀོད་སྒྲིག་འཛུགས་སྐྲུན་ལ་ཤུགས་སྣོན་བརྒྱབ་ནས་ཁྱད་ལྡན་ཐོན་ལས་འཕེལ་རྒྱས་ཧུར་ཐག་བཏང་སྟེ་མཐའ་དར་དམངས་ཕྱུག་དང་མཐའ་བརྟན་ལ་སྐུལ་འདེད་གཏང་དགོས། རྨང་གཞིའི་སློབ་གསོ་འཕེལ་རྒྱས་ཤུགས་ཆེན་གཏོང་བ་དང་བྱང་ཤར་ས་ཆའི་མཐོ་རིམ་སློབ་གྲྭ་གཉེར་བར་རྒྱབ་སྐྱོར་ཤུགས་ཆེན་བྱས་ནས་མི་འབོར་སྤྱི་ཡོངས་ཀྱི་བྱང་ཚད་མཐོ་རུ་གཏོང་བ་དང་མི་འབོར་སྤུས་ཚད་མཐོ་བའི་འཕེལ་རྒྱས་ལ་བརྟེན་ནས་བྱང་ཤར་གྱི་ཕྱོགས་ཡོངས་དར་རྒྱས་ལ་འདེགས་སྐྱོར་བྱ་དགོས།

      ཚོགས་འདུར་ད་དུང་དོན་གནད་གཞན་དག་ལ་ཞིབ་འཇུག་བྱས་པ་རེད།



  • ལེ་ཚན་སྔོན་མ།:བློ་མཐུན་ལི་ཁེ་ཆང་སྐུ་གཤེགས་པ།
  • ལེ་ཚན་རྗེས་མ།: ལྷ་གྲུ་ཨང་བཅུ་བདུན་པའི་མི་ཞུགས་འཕུར་གྲུ་འཕེན་གཏོང་ལམ་ལྷོང་བྱུང་བ།
  • དོ་སྣང་ཆེ་བའི་རྩོམ།