རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་ཚེས་ཉེར་དྲུག་ཉིན་མགོ་འཛིན་མཛད་དེ་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་བསྡུས་ནས། དངུལ་བསྡུའི་བོགས་མར་ལེན་པ་དང་དངུལ་ལོར་བོགས་མར་ལེན་པའི་ལས་རིགས་མྱུར་དུ་འཕེལ་རྒྱས་སུ་གཏོང་བའི་བྱེད་ཐབས་གཏན་འཁེལ་བྱས་ནས་དངོས་ཕུང་དཔལ་འབྱོར་ལ་ཞབས་ཕྱི་བཟང་བོ་བསྒྲུབ་དགོས་ཞེས་བསྟན་པ་དང་། ཕྱིར་གཏོང་ནང་འདྲེན་ཕྱོགས་ཀྱི་གྲོན་དངུལ་བསྡུ་བར་སྔར་ལས་གཙང་བཤེར་དང་ཚད་ལྡན་དུ་བཏང་ནས་ཁེ་ལས་འཕེལ་རྒྱས་ཀྱི་ཁུར་བོ་ཇེ་ཡང་དུ་གཏོང་བར་བཀོད་སྒྲིག་བྱས་ཤིང་། སྲིད་ཇུས་དང་བྱེད་ཕྱོགས་གཙོ་བོ་ལག་ལེན་མཐར་ཕྱིན་བྱེད་པའི་ཕྱོགས་གསུམ་པའི་དཔྱད་འཇོག་ཡར་ཞུར་ཉན་ནས་སྲིད་ཇུས་དངོས་འབེབས་བྱ་བ་དམ་འཛིན་བྱས་ན་དཔལ་འབྱོར་འཕེལ་རྒྱས་སུ་གཏོང་བར་ཤུགས་བསྐྱེད་ཐུབ་ཅེས་བསྟན་པ་དང་། སློབ་གྲྭ་ཆུང་འབྲིང་གི་དགེ་རྒན་གྱི་ཐོབ་ཐང་ལམ་ལུགས་ལ་ཕྱོགས་ཡོངས་ནས་བཅོས་སྒྱུར་བྱས་ནས་རྨང་གཞིའི་སློབ་གསོ་འཕེལ་རྒྱས་སུ་གཏོང་བར་ཤེས་ལྡན་མི་སྣ་འདོན་སྤྲོད་བྱེད་རྒྱུ་ཐག་བཅད།

ཚོགས་ཐོག་ནས་བསྟན་དོན། དངུལ་བསྡུའི་བོགས་མར་ལེན་པ་དང་དངུལ་ལོར་བོགས་མར་ལེན་པའི་ལས་རིགས་མྱུར་དུ་འཕེལ་རྒྱས་སུ་གཏོང་རྒྱུ་ནི་དངུལ་ལོར་བཅོས་སྒྱུར་ཟབ་སྤེལ་བྱེད་པའི་བྱེད་ཐབས་གལ་ཆེན་ཞིག་ཡིན་པ་དང་དེ་དངུལ་བསྡུ་དཀའ་བའི་གནད་དོན་ཐག་བཅད་དེ་ཁེ་ལས་ཀྱི་སྒྲིག་ཆས་དངུལ་གཏོང་ལ་སྣེ་ཁྲིད་བྱེད་པ་དང་ཐོན་ལས་རིམ་འཕར་ལ་སྐུལ་ཁྲིད་བྱེད་པར་ཕན་པ་ཡོད་ཟེར།

ཚོགས་ཐོག་ནས་བལྟས་ན། སློབ་གྲྭ་ཆུང་འབྲིང་གི་དགེ་རྒན་གྱི་ཐོབ་ཐང་ལམ་ལུགས་ལ་བཅོས་སྒྱུར་ཟབ་སྤེལ་བྱེད་རྒྱུ་དེ་སྒྲིག་སྦྱོར་ཐོན་ཁུངས་ལེགས་སྒྱུར་བྱེད་པ་དང་རྨང་གཞིའི་སློབ་གསོའི་དགེ་རྒན་དཔུང་སྡེ་འགན་སྲུང་བྱེད་པར་དོན་སྙིང་ཆེན་པོ་ཡོད། ལོ་འགའི་རིང་ལ་ཁྱོན་ཡོངས་ནས་ཚོད་ལྟ་བྱས་པ་བརྒྱུད། ད་ལྟ་ཕྱོགས་ཡོངས་ནས་བཅོས་སྒྱུར་ལག་བསྟར་བྱེད་པའི་ཆ་རྐྱེན་འཛོམས་ཡོད། ཚོགས་ཐོག་ནས་སློབ་གྲྭ་ཆུང་འབྲིང་གི་དགེ་རྒན་གྱི་ཐོབ་ཐང་ལམ་ལུགས་ལ་བཅོས་སྒྱུར་བྱེད་རྒྱུ་དེ་རྒྱལ་ཡོངས་སུ་ལག་བསྟར་བྱེད་རྒྱུ་ཐག་བཅད།