སྤྱི་ཟླ10པའི་ཚེས15ཉིན་གྱི་ཕྱི་དྲོར། ཀྲུང་གོ་གུང་ཁྲན་ཏང་རྒྱལ་ཡོངས་འཐུས་མི་ཚོགས་ཆེན་ཐེངས་ཉི་ཤུ་པའི་གྲ་སྒྲིག་གྲོས་ཚོགས་མི་དམངས་ཚོགས་ཁང་ཆེན་མོའི་ནང་འཚོགས་པ་རེད།

     བློ་མཐུན་ཞི་ཅིན་ཕིང་གིས་གྲ་སྒྲིག་ཚོགས་འདུ་གཙོ་སྐྱོང་གནང་།

      ཏང་གི་ཚོགས་ཆེན་ཉི་ཤུ་པའི་ནང་ཞུགས་དགོས་པའི་འཐུས་མི་དང་ཆེད་དུ་གདན་འདྲེན་ཞུས་པའི་འཐུས་མི2379ཡིན་པ་རེད། གྲ་སྒྲིག་ཚོགས་འདུར་ཞུགས་མཁན་གྱི་འཐུས་མི་དང་ཆེད་དུ་གདན་འདྲེན་ཞུས་པའི་འཐུས་མི2310ཡོད་པ་རེད།

     གྲོས་ཚོགས་ཐོག་ལག་པ་བཀྱགས་ནས་བརྡས་ཐག་གཅོད་པའི་བྱེད་སྟངས་ཐོག་ནས་མི22ལས་གྲུབ་པའི་འཐུས་མིའི་ཐོབ་ཐང་ཞིབ་བཤེར་ཨུ་ཡོན་ལྷན་ཁང་གི་མིང་ཐོར་གྲོས་འཆམ་བྱུང་བ་དང་། མི243ལས་གྲུབ་པའི་ཚོགས་ཆེན་གྱི་ཀྲུའུ་ཞི་ཚོགས་པའི་མིང་ཐོར་གྲོས་འཆམ་བྱུང་བ། ཝང་ཧུའུ་ཉིང་ཚོགས་ཆེན་གྱི་དྲུང་ཡིག་ཆེན་མོར་གྲོས་འཆམ་བྱུང་བ། ཚོགས་འདུའི་ཐོག་ཚོགས་ཆེན་གྱི་དྲུང་ཡིག་ཁང་གི་ལས་ཁུངས་སྒྲིག་གཞི་དང་ལས་དོན་གྱི་ལས་འགན་ལ་གྲོས་འཆམ་ཡང་བྱུང་བ་རེད།

     གྲོས་ཚོགས་ཐོག་ད་དུང་ཚོགས་ཆེན་ཉི་ཤུ་པའི་གྲོས་རིམ་ལ་གྲོས་འཆམ་བྱུང་བ་རེད། ཚོགས་ཆེན་གྱི་གྲོས་རིམ་ནི་སྐབས་བཅུ་དགུ་པའི་ཀྲུང་དབྱང་ཨུ་ཡོན་ལྷན་ཁང་གི་སྙན་སེང་ལ་ཉན་འཇོག་དང་ཞིབ་དཔྱད་བྱ་རྒྱུ། སྐབས་བཅུ་དགུ་པའི་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ལས་དོན་སྙན་སེང་ལ་ཞིབ་དཔྱད་བྱ་རྒྱུ།《ཀྲུང་གོའི་གུང་ཁྲན་ཏང་གི་སྒྲིག་ཡིག（དག་བཅོས་འཆར་ཟིན）》ལ་གྲོས་ཞིབ་བྱས་ནས་གྲོས་འཆམ་འབྱུང་རྒྱུ། སྐབས་ཉི་ཤུ་པའི་ཀྲུང་དབྱང་ཨུ་ཡོན་ལྷན་ཁང་འདེམས་བསྐོ་བྱ་རྒྱུ། སྐབས་ཉི་ཤུ་པའི་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་འདེམས་བསྐོ་བྱ་རྒྱུ་བཅས་རེད།