ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཉེ་ལམ་རྒྱལ་སྲིད་སྤྱི་ཁྱབ་ཁང་གཞུང་སྒྲིབ་ཐིན་གྱིས་གྲོང་གསེབ་སྡོད་དམངས་ཀྱི་ཚབས་ཆེན་ནད་ཀྱི་འགན་སྲུང་ཁྱོན་ཡོངས་ནས་ལག་བསྟར་དངོས་འབེབ་བྱེད་པའི་འབྲེལ་ཡོད་བསམ་འཆར་དཔར་ནས་བཀྲམས་པར་མ་ཟད། གྲོང་གསེབ་སྡོད་དམངས་ཀྱི་ཚབས་ཆེན་ནད་ཀྱི་འགན་སྲུང་ལམ་ལུགས་འཛུགས་སྐྲུན་ཇེ་མགྱོགས་སུ་གཏོང་བ་དང་དམངས་ཡོངས་ཀྱི་གཞི་རྩའི་སྨན་བཅོས་འགན་སྲུང་རྨང་གཞི་སྲ་བརྟན་དུ་བཏང་སྟེ། མང་ཚོགས་སྔར་ལས་མང་པོར་ཁེ་བཟང་བསྐྲུན་རྒྱུར་བཀོད་སྒྲིག་བྱས།

བསམ་འཆར་ལས་བསྟན་དོན། ཉིས་སྟོང་བཅོ་ལྔ་ལོའི་ལོ་མཇུག་གི་སྔོན་ལ་ཚབས་ཆེན་ནད་ཀྱི་འགན་སྲུང་སྲིད་ཇུས་ཀྱིས་གྲོང་གསེབ་སྡོད་དམངས་ཀྱི་གཞི་རྩའི་སྨན་བཅོས་འགན་སྲུང་ནང་ཞུགས་པའི་མི་ཡོངས་ལ་ཁེབས་པར་བྱས་ནས། ནད་ཚབས་ཆེན་བྱུང་ཡོད་པའི་ནད་པ་རྣམས་ཀྱིས་སྨན་བཅོས་དང་སྨན་པར་སྟོན་པའི་ཁུར་བོ་ཇེ་ཡངས་སུ་གཏོང་དགོས། ཉིས་སྟོང་བཅུ་བདུན་ལོར་ཐོན་དུས་ཅུང་འཐུས་ཚང་ཡིན་པའི་ཚབས་ཆེན་ནད་ཀྱི་འགན་སྲུང་ལམ་ལུགས་ཤིག་གྲུབ་པར་བྱས་ནས་སྨན་བཅོས་རོགས་སྐྱོར་སོགས་ལམ་ལུགས་དང་དམ་པར་སྦྲེལ་ཏེ། ཆེས་དམའ་བའི་འགན་སྲུང་ནུས་པ་ཐུན་མོང་གིས་འདོན་སྤེལ་བྱེད་པ་དང་ཁྱིམ་ཚང་ལ་གནོད་པ་ཚབས་ཆེ་བའི་ནད་རིགས་ཀྱི་འགྲོ་སྒོར་ནུས་ཡོད་སྒོས་ཚོད་འཛིན་བྱས་ནས། གྲོང་གསེབ་སྡོད་དམངས་ཀྱི་སྨན་བཅོས་འགན་སྲུང་གི་དྲང་བདེན་རང་བཞིན་མངོན་གསལ་སྒོས་ཇེ་མཐོར་གཏོང་དགོས་ཞེས་བསྟན།  །