སི་ཁྲོན་རྟོག་ཞིབ་དྲྭ་ལམ་ནས་གསར་འགྱུར་བཀོད་པ་ལྟར་ན། སྤྱི་ཟླ11པའི་ཚེས23ཉིན་གྱི་མཚན་གུང་གི་ཆུ་ཚོད12བར་ལ། ཁྲེང་ཏུའུ་གྲོང་ཁྱེར་ཁྲེང་ཧྭ་ཆུས་ཏོག་གསར་གློ་ཚད་ཀྱི་རིམས་ཚུལ་འགོག་ཟོན་བཀོད་འདོམས་པུའུ་ཡིས་བརྡ་ཁྱབ་འདི་ལྟར་བཏང་བ་སྟེ།

   སྤྱི་ཟླ11པའི་ཚེས23ཉིན་གྱི་བར་ལ། ཁྲེང་ཏུའུ་གྲོང་ཁྱེར་ཁྲེང་ཧྭ་ཆུས་ལི་ཀུང་ཏུང་ཡོན་ནུབ་ཁུལ་དང་། ཞིང་ཡོན་ཧྭ་ཧྲེན་གཞིས་ཁུལ་གཉིས་པ་ལ་ཉིན་བསྟུད་མར14ལ་ས་གནས་དེ་གའི་ཏོག་གསར་གློ་ཚད་ནད་པ་བྱུང་མེད་པ་རེད། རྒྱལ་སྲིད་སྤྱི་ཁྱབ་ཁང་གི་ཏོག་གསར་གློ་ཚད་ལ་ཁ་གཏད་གཅོག་པའི་མཉམ་འགོག་མཉམ་འཛིན་ནང་སྲོལ་གྱི་དབྱེ་འབྱེད་ཚན་རིག་དང་མཐུན་ཞིང་འགོག་ཟོན་གནད་ལ་འཁེལ་པོ་སོགས་ཀྱི་ལས་དོན་བླང་བྱ་ལྟར། ཞིང་ཆེན་དང་གྲོང་ཁྱེར་གྱི་ཆེད་རམས་པས་ཕྱོགས་འདུས་དཔྱད་དཔོག་བྱས་ཏེ། ཁྲེང་ཏུའུ་གྲོང་ཁྱེར་ཁྲེང་ཧྭ་ཆུས་ཏོག་གསར་གློ་ཚད་ཀྱི་རིམས་ཚུལ་འགོག་ཟོན་བཀོད་འདོམས་པུའུ་ཡིས་ཞིབ་འཇུག་ཐག་བཅད་བྱས་དོན། 2021ལོའི་ཟླ་བ11པའི་ཚེས23ཉིན་ནས་བཟུང་། ཁྲེང་ཏུའུ་གྲོང་ཁྱེར་ཁྲེང་ཧྭ་ཆུས་ལི་ཀུང་ཏུང་ཡོན་ནུབ་ཁུལ་དེ་ཉེན་ཁ་ཆེ་བའི་ས་ཁུལ་ནས་ཉེན་ཁ་ཆུང་བའི་ས་ཁུལ་དུ་བསྒྱུར་བ་དང་། ཞིང་ཡོན་ཧྭ་ཧྲེན་གཞིས་ཁུལ་གཉིས་པ་དེ་ཉེན་ཁ་འབྲིང་བའི་ས་ཁུལ་ནས་ཉེན་ཁ་ཆུང་བའི་ས་ཁུལ་དུ་བསྒྱུར་བ་དང་ཆབས་ཅིག། འབྲེལ་ཡོད་བཀག་སྡོམ་ཁུལ་དང་དོ་དམ་ཚོད་འཛིན་ས་ཁུལ་གྱི་གྲལ་རིམ་དོ་དམ་བཀྲོལ་ཡོད།

   ཉེན་ཁ་ས་ཁུལ་ལེགས་སྒྱུར་བྱས་རྗེས། ཁྲེང་ཏུའུ་གྲོང་ཁྱེར་ཁྲེང་ཧྭ་ཆུས་ཀྱི་ཉེན་ཁ་ཆེ་འབྲིང་ས་ཁུལ་མེད་པ་དང་། ས་ཁོངས་ཡོངས་ཉེན་ཁ་ཆུང་བའི་ས་ཁུལ་དུ་གྱུར་ཡོད། ཆེད་དུ་བརྡ་ཁྱབ་བྱ་རྒྱུ།

ཁྲེང་ཏུའུ་གྲོང་ཁྱེར་ཁྲེང་ཧྭ་ཆུས་ཏོག་གསར་གློ་ཚད་ཀྱི་རིམས་ཚུལ་འགོག་ཟོན་བཀོད་འདོམས་པུའུ་ནས།

2021ལོའི་ཟླ་བ11པའི་ཚེས23ཉིན་ལ།