སྤྱི་ཟླ10པའི་ཚེས24ཉིན། ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐེངས་བཅུ་དགུ་པ་པེ་ཅིན་མི་དམངས་ཚོགས་ཁང་ཆེན་མོའི་ནང་བསྒྲོལ། 

སྤྱི་ཟླ10པའི་ཚེས24ཉིན། ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐེངས་བཅུ་དགུ་པ་པེ་ཅིན་མི་དམངས་ཚོགས་ཁང་ཆེན་མོའི་ནང་བསྒྲོལ།

    ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐེངས་བཅུ་དགུ་པས་སྐབས་གསར་པའི་ཀྲུང་དབྱང་ཨུ་ཡོན་ལྷན་ཁང་དང་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་བདམས་ཐོན་བྱུང་བ་དང་། སྐབས་བཅོ་བརྒྱད་པའི་ཀྲུང་དབྱང་ཨུ་ཡོན་ལྷན་ཁང་གི་སྙན་ཞུའི་གྲོས་ཆོད་དང་སྐབས་བཅོ་བརྒྱད་པའི་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་བྱ་བའི་སྙན་ཞུའི་གྲོས་ཆོད། «ཀྲུང་གོ་གུང་ཁྲན་ཏང་གི་སྒྲིག་ཡིག་བཟོ་བཅོས་འཆར་ཟིན»སྐོར་གྱི་གྲོས་ཆོད་བཅས་ལ་གྲོས་འཆམ་བྱུང་རྗེས། ཚེས24ཉིན་གྱི་སྔ་དྲོར་མི་དམངས་ཚོགས་ཁང་ཆེན་མོའི་ནང་རྒྱལ་ཁའི་ངང་བསྒྲོལ་བ་རེད།

བློ་མཐུན་ཞི་ཅིན་ཕིང་གིས་ཚོགས་ཆེན་གྱི་གཙོ་སྐྱོང་གནང་།

སྔ་དྲོའི་ཆུ་ཚོད་དགུ་པའི་སྟེང་། ཚོགས་འདུ་བསྒྲོལ་བའི་མཛད་སྒོ་དངོས་སུ་འགོ་བརྩམས།

ཚོགས་ཆེན་ལ་འབྱོར་དགོས་པའི་འཐུས་མི་དང་ཆེད་དུ་གདན་འདྲེན་ཞུས་པའི་འཐུས་མི་སྟོང་གཉིས་དང་སུམ་བརྒྱ་ང་བཞི་ཡོད་ཅིང་། མི་སྟོང་གཉིས་དང་སུམ་བརྒྱ་སོ་དྲུག་ཚོགས་ཐོག་ཏུ་འབྱོར། དངོས་སུ་ཚོགས་ཐོག་ཏུ་འབྱོར་བའི་འཐུས་མིའི་གྲངས་ཀ་དེ་འབྱོར་དགོས་པའི་འཐུས་མིའི་གྲངས་ཀའི་ཕྱེད་ཀ་ལས་བརྒལ་བས། ཚོགས་ཆེན་གྱི་འདེམ་བསྐོའི་བྱེད་ཐབས་ཀྱི་གཏན་ཁེལ་དང་མཐུན་པ་རེད།

གྲོས་ཚོགས་སྟེང་ཐོག་མར་སྤྱིའི་འདེམ་ཤོག་ལྟ་སྐུལ་པ་གཉིས་དང་འདེམ་ཤོག་ལྟ་སྐུལ་པ་སོ་དྲུག་གི་མིང་ཐོ་ལ་གྲོས་འཆམ་བྱུང་།

སྤྱི་ཁྱབ་འདེམ་ཤོག་ལྟ་སྐུལ་པ་དང་འདེམ་ཤོག་ལྟ་སྐུལ་པའི་ལྟ་སྐུལ་འོག་ཏུ། ཚོགས་འདུར་ཞུགས་པའི་འཐུས་མི་དང་ཆེད་དུ་གདན་འདྲེན་ཞུས་པའི་འཐུས་མིས་མིང་མི་འགོད་པར་འདེམ་ཤོག་འཕེན་པའི་བྱེད་ཐབས་སྤྱད་དེ་ཨུ་ཡོན་ཉིས་བརྒྱ་དང་བཞི་དང་། རྗེས་སྣོན་ཨུ་ཡོན་བརྒྱ་དང་དོན་གཉིས་ཀྱིས་གྲུབ་པའི་སྐབས་བཅུ་དགུ་པའི་ཀྲུང་དབྱང་ཨུ་ཡོན་ལྷན་ཁང་བདམས་ཐོན་བྱུང་བ་དང་། སྐབས་བཅུ་དགུ་པའི་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ཨུ་ཡོན་བརྒྱ་དང་སོ་གསུམ་བདམས་ཐོན་བྱུང་བ་རེད།

ཆུ་ཚོད་བཅུ་གཅིག་དང་སྐར་མ་བཅུ་གཉིས་སྟེང་། ཞི་ཅིན་ཕིང་གིས་སྐབས་བཅུ་དགུ་པའི་ཀྲུང་དབྱང་ཨུ་ཡོན་ལྷན་ཁང་དང་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་དེ་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐེངས་བཅུ་དགུ་པའི་སྟེང་བདམས་ཐོན་བྱུང་བ་བསྒྲགས་པ་ན། ཚོགས་ར་ཡོངས་སུ་དུས་ཡུན་རིང་པོར་སྤྲོ་སེམས་འཁོལ་བའི་ཐལ་མོ་རྡེབ་སྒྲས་ཁེངས།

དེའི་རྗེས་སུ། ཚོགས་ཆེན་སྟེང་སྐབས་བཅོ་བརྒྱད་པའི་ཀྲུང་དབྱང་ཨུ་ཡོན་ལྷན་ཁང་གི་སྙན་ཞུའི་གྲོས་ཆོད་ལ་གྲོས་འཆམ་བྱུང་། ཚོགས་ཆེན་གྱིས་བློ་མཐུན་ཞི་ཅིན་ཕིང་གིས་སྐབས་བཅོ་བརྒྱད་པའི་ཀྲུང་དབྱང་ཨུ་ཡོན་ལྷན་ཁང་གི་ཚབ་མཛད་དེ་ཕུལ་བའི་སྙན་ཞུ་ལ་ཆོག་མཆན་བཀོད།

ཚོགས་ཆེན་སྟེང་སྐབས་བཅོ་བརྒྱད་པའི་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་བྱ་བའི་སྙན་ཞུའི་གྲོས་ཆོད་ལ་གྲོས་འཆམ་བྱུང་། ཚོགས་ཆེན་སྟེང་སྐབས་བཅོ་བརྒྱད་པའི་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་བྱ་བར་ཁས་ལེན་གང་ལེགས་བྱས།

ཚོགས་ཆེན་སྟེང«ཀྲུང་གོ་གུང་ཁྲན་ཏང་གི་སྒྲིག་ཡིག་བཟོ་བཅོས་འཆར་ཟིན»སྐོར་གྱི་གྲོས་ཆོད་ལ་གྲོས་འཆམ་བྱུང་ནས། བཟོ་བཅོས་འཆར་ཟིན་དེར་གྲོས་འཆམ་བྱུང་བ་ཉིན་ནས་བཟུང་ནུས་པ་ལྡན་པའི་ཐག་བཅད། ཚོགས་ཆེན་སྟེང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བསམ་བློ་དེ་མར་ཁེ་སི་ལེ་ཉིན་རིང་ལུགས་དང་། མའོ་ཙེ་ཏུང་དགོངས་པ། ཏེང་ཞའོ་ཕིང་གི་རིགས་པའི་གཞུང་ལུགས། མཚོན་བྱེད་གསུམ་གྱི་དགོངས་པ་གལ་ཆེན། ཚན་རིག་གི་འཕེལ་རྒྱས་ལྟ་བ་བཅས་དང་མཉམ་དུ་ཏང་གི་འགུལ་སྐྱོད་ཕྱོགས་སྟོན་དུ་གཏན་འཁེལ་བྱེད་པར་ཚང་མ་འཐད་པ་བྱུང་བ་རེད།

ཚོགས་ཆེན་གྱི་གྲོས་རིམ་སྣ་ཚོགས་ཡོངས་སུ་འགྲུབ་རྗེས། ཞི་ཅིན་ཕིང་གིས་སྤྲོ་སེམས་འཁོལ་བའི་ཐལ་མོ་རྡེབ་སྒྲའི་ཁྲོད་གསུང་བཤད་གལ་ཆེན་གནང་བ་རེད།

ཚོགས་ཆེན་རྔམ་བརྗིད་ལྡན་པའི་རྒྱལ་སྤྱིའི་གླུ་སྒྲའི་ཁྲོད་ནས་ཕུན་སུམ་ཚོགས་པའི་ངང་བསྒྲོལ་བ་རེད།