ཱ
སློབ་དཔོན་ཆེན་མོ་བདེ་མཆོག་གིས་མཚོ་ལྷོ་ཁུལ་མང་རྫོང་མི་རིགས་སློབ་འབྲིང་དུ་སློབ་ཁྲིད་གནང་།

     སྤྱི་ཟླ6པའི་ཚེས8དེ་རེས་གཟའ་ཟླ་བ་ཉིན་གྱི་ཕྱི་དྲོའི་སློབ་ཐུན་གཉིས་ཀྱི་རིང་ལ། མཚོ་སྔོན་མི་རིགས་སློབ་གྲྭ་ཆེན་མོའི་སློབ་དཔོན་ཆེན་མོ་བདེ་མཆོག་ལགས་ཀྱིས་མཚོ་ལྷོ་ཁུལ་མང་རྫོང་མི་རིགས་སློབ་འབྲིང་གི་ཚོགས་ཁང་དུ་སུམ་ཅུ་པའི་རྣམ་བཤད་ཀུན་བཟང་དགོངས་རྒྱན་གྱི་སློབ་ཁྲིད་མཛད་ཅིང་། སློབ་ཁྲིད་དེའི་ཆེད་དུ་བྱ་བའི་གདུལ་བྱར་མང་རྫོང་མི་རིགས་སློབ་འབྲིང་གི་གཙོ་འཛིན་རྣམ་པ་དང་བོད་ཡིག་དགེ་རྒན་རྣམ་པ། དེ་བཞིན་མང་རྫོང་སློབ་ཆུང་གི་བོད་ཡིག་དགེ་རྒན་རྣམ་པ། ད་དུང་ཡང་ཁམས་སྟོད་ཡུལ་ཤུལ་གྱི་སློབ་གྲྭ་ཆུང་འབྲིང་གི་བོད་ཡིག་དགེ་རྒན་ཁག་ཅིག་བཅས་སློབ་ཞུགས་དགེ་རྒན55ཡོད་པ་རེད།

སློབ་ཁྲིད་མཛད་བཞིན་པའི་ཡུལ་དངོས་ཀྱི་རྣམ་པ།

     སློབ་ཁྲིད་འདི་ནི་སློབ་གྲྭའི་དགེ་རྒན་རྣམ་པའི་མི་རིགས་རིག་གནས་ཀྱི་ཤེས་ཡོན་ཆུ་ཚད་མུ་མཐུད་དུ་ཡར་རྒྱས་གོང་འཕེལ་ཡོང་བ་དང་། སློབ་མ་རྣམ་པ་དང་ས་གནས་སྤྱི་ཚོགས་བཅས་ལ་ཕན་ནུས་བཟང་པོ་ཞིག་ཐོན་པར་དམིགས་ཏེ། མང་རྫོང་མི་རིགས་སློབ་འབྲིང་གིས་སྔ་ལོ་ནས་རྒན་ཁོང་ལ་གདན་ཞུ་ཕུལ་ལྟར། ད་ཐེངས་དངོས་སུ་སློབ་གྲྭ་འདིར་ཕེབས་འབྱོར་བྱུང་སྟེ་སློབ་ཁྲིད་མཛད་པ་ཞིག་ཡིན་ལ། སློབ་ཁྲིད་འདིའི་དུས་ཡུན་ནི་ཕལ་ཆེར་ཟླ་བ་གཅིག་ཙམ་གྱི་རིང་དུ་ཡིན་ཞིང་། ཁྲིད་བྱའི་གཞུང་ནི་པྲ་ཏི་རིན་ཆེན་དོན་གྲུབ་ཀྱིས་བརྩམས་པའི་བོད་ཀྱི་བརྡ་སྤྲོད་པའི་བསྟན་བཅོས་སུམ་ཅུ་པ་ཞེས་བྱ་བའི་རྣམ་བཤད་ཀུན་ཏུ་བཟང་པོའི་དགོངས་པ་རབ་ཏུ་གསལ་བར་བྱེད་པའི་རྒྱན་ཞེས་བྱ་བ་དང་། ཚེ་ཏན་ཞབས་དྲུང་གིས་མཛད་པའི་བོད་གངས་ཅན་གྱི་སྒྲ་རིག་པའི་བསྟན་བཅོས་ལེ་ཚན་འགའ་ཕྱོགས་བསྡུས་ཞེས་པ་དང་། ཚེ་ཏན་ཞབས་དྲུག་གིས་མཛད་པའི་ཐོན་མིའི་ཞལ་ལུང་བཅས་ཡིན།