ཀྲུང་གོ་བོད་ཀྱི་དྲ་བའི་འཕྲིན། སྤྱི་ཚེས9ཉིན་གྱི་ཕྱི་དྲོ་ཡིག་རྒྱུགས་དཔྱད་བསྡུར་དགེ་རྒན180ཙམ་གྱིས་གཅིག་མཇུག་གཉིས་མཐུད་ངང་བོད་རང་སྐྱོང་ལྗོངས་སློབ་གསོ་ཡིག་རྒྱུགས་ཁང་དུ་འབྱོར་ཐོ་བཀོད་པ་དང་། རང་ལྗོངས་ཀྱི་མཐོ་རྒྱུགས་དཔྱད་བསྡུར་ལས་དོན་གོ་རིམ་ལྡན་པའི་སྒོ་ནས་སྤེལ་གྲབས་ཡོད་པ་རེད། ཤེས་རྟོགས་བྱས་པར་གཞིགས་ན། ད་ལྟ་ལྷ་ས་གྲོང་ཁྱེར་དང་ལྷོ་ཁ་ས་ཁུལ་གྱི་རྒྱུགས་ཤོག་བདེ་འཇགས་ངང་གནས་སུ་འབྱོར་བ་དང་དེ་མིན་ས་ཁུལ་གྱི་རྒྱུགས་ཤོག་ཀྱང་གནས་སུ་འབྱོར་གྲབས་ཡོད་པ་རེད།

སྤྱི་ཚེས10ཉིན་ནས་བཟུང་རང་སྐྱོང་ལྗོངས་སློབ་གསོ་ཡིག་རྒྱུགས་ཁང་གིས་ཡིག་རྒྱུགས་དཔྱད་བསྡུར་དགེ་རྒན་གྱི་སྦྱོང་བརྡར་ལས་དོན་གཅིག་གྱུར་ཐོག་བཀོད་སྒྲིག་བྱས་པ་དང་། སྦྱོང་བརྡར་གྱི་ཚད་གཞི་ལོན་རྗེས་དངོས་སུ་ཡིག་རྒྱུགས་དཔྱད་བསྡུར་བྱེད་རྒྱུ་རེད། ངོ་སྤྲོད་བྱས་པར་གཞིགས་ན། ད་ལོའི་མཐོ་རྒྱུགས་གཏོང་མཁན་སློབ་མས་བོད་ལྗོངས་སློབ་གསོ་ཡིག་རྒྱུགས་ཁང་གི་གཞུང་ཕྱོགས་དྲ་ཚིགས་དང་མཐོ་རྒྱུགས་སྐར་གྲངས་བློ་འདྲི་བྱེད་སའི་ཁ་པར་ཨང་གྲངས96833513བརྒྱུད་ནས་སྐར་གྲངས་ཤེས་རྟོགས་བྱེད་ཆོག་པ་ཕུད། ད་དུང་ལག་ཐོག་ཁ་པར་དམངས་འཚོའི་དངོས་སྤྱོད་སྟེགས་བུ་གྲོང་ཁྱེར་ལ་དགའ་ཞེས་པའི་ཐོག་ནས། རང་ཉིད་ཀྱི་སྐར་གྲངས་དང་སློབ་བསྡུའི་ཆ་འཕྲིན་ཤེས་རྟོགས་བྱེད་ཆོག་གི་ཡོད་པ་རེད།  །