ཞིན་ཧྭ་གསར་འགྱུར་ཁང་ལྷ་ས་ནས་འབྱོར་བའི་གཏམ་གསར། སྐབས་གཉིས་པའི་བོད་རང་སྐྱོང་ལྗོངས་ཀྱི་བཟོ་རྩལ་མཛེས་རྩལ་ཆེ་མོ་བའི་མཚན་སྙན་སྤྲོད་པའི་གཟེངས་བསྟོད་ཚོགས་ཆེན་ཐོག་ནས་ཤེས་རྟོགས་བྱུང་བར། བོད་རང་སྐྱོང་ལྗོངས་མི་དམངས་སྲིད་གཞུང་གིས་དཀོན་མཆོག་རྒྱལ་སོགས་མི25ལ་བཟོ་རྩལ་མཛེས་རྩལ་ཆེ་མོ་བའི་མཚན་སྙན་སྤྲད་པ་དང་ཆབས་ཅིག་གཟེངས་བསྟོད་བྱས་ནས་བོད་ཀྱི་བཟོ་རྩལ་མཛེས་རྩལ་ལས་དོན་པའི་ཧུར་བརྩོན་རང་བཞིན་སྐོང་འཐེན་གང་ལེགས་བྱེད་པ་དང་མི་རིགས་ཀྱི་བཟོ་རྩལ་མཛེས་རྩལ་སྲུང་སྐྱོང་དང་། བརྒྱུད་འཛིན། འཕེལ་རྒྱས་བཅས་ཀྱི་ལས་དོན་ལ་སྐུལ་འདེད་ཤུགས་ཆེན་བཏང་བ་རེད།

ཤེས་རྟོགས་བྱུང་བར་གཞིགས་ན། བོད་ཀྱི་བཟོ་རྩལ་མཛེས་རྩལ་གྱི་བརྩམས་ཆོས་མང་ཆེ་བ་བོད་རུམ་དང་། བོད་ཆས། སྤོས། ཐང་ག མི་རིགས་ཀྱི་ཁྱད་ལྡན་ཡུལ་སྐོར་ཚོང་ཟོག་སོགས་མི་རིགས་ཀྱི་ལག་ཤེས་བཟོ་རྩལ་གཞི་རྟེན་དུ་བྱེད་པ་དང་།  མི་རིགས་ལག་ཤེས་བཟོ་རྩལ་ཐོན་རྫས་ཀྱི་སྣ་ཁ2000ལྷག་ཙམ་ཟིན་ནས་གཞི་ཁྱོན་རགས་ཙམ་ཆགས་ཡོད། ན་ནིང་ལོ་མཇུག་བར་བོད་ཀྱི་མངོན་མིན་རིག་གནས་ཤུལ་བཞག་གི་རིམ་པ་བཞིའི་མིང་གཞུང་ནང་རྒྱལ་ཁབ་རིམ་པའི་རྣམ་གྲངས89ཡོད་པ་དང་། ཐང་ག་བཞེངས་མཁན་བསྟན་པ་རབ་བསྟན་སོགས་མི71རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་བརྒྱུད་འཛིན་པར་བདམས་པ་རེད།