ཉེ་ཆར། ཞིང་ཆེན་སློབ་གསོ་རྒྱུགས་ལེན་ཁང་གིས་རང་རེའི་ཞིང་ཆེན་གྱི2015ལོའི་སྤྱིར་བཏང་གི་མཐོ་རིམ་སློབ་གྲྭ་ནང་དུ་བོད་ཡིག་དང་དབྱིས་ཡིག་གི་རིགས་དང་པོའི་མཐོ་རིམ་སློབ་གྲྭའི་རྒྱུགས་ལེན་དང་སློབ་མ་བསྡུ་ལེན་གྱི་འཆར་གཞི་ཁྱབ་བསྒྲགས་བྱས་པ་རེད།རྒྱུགས་སྤྲོད་པའི་དུས་ཚོད་ནི་སྔར་བཞིན་ཟླ་བ6པའི་ཚེས7ནས་ཚེས9ཉིན་གྱི་བར་ཡིན་ཞིང་།སློབ་ཚན་དང་སྐར་གྲངས་ཀྱི་གྲངས་ཐང་ལ་འགྱུར་བ་མེད།དྲྭ་ལམ་སྟེང་ནས་རྒྱུགས་ཡིག་བཅོས་རྒྱུ་ཡིན་པར་མ་ཟད་དྲྭ་ལམ་སྟེང་ནས་འདོད་མོས་རེའུ་མིག་འགོད་རྒྱུ་ཡིན་པ་རེད།

　གཏན་འབེབས་ལྟར་ན་བོད་ཡིག་རིགས་དང་པོའི་རྒྱུགས་སྤྲོད་སློབ་མ་ནི་དཀར་མཛེས་དང་རྔ་བ་ཁུལ་གྱི2015ལོའི་བོད་ཡིག་རིགས་དང་པོའི་མཐོ་རིམ་སློབ་འབྲིང་གི༼འབྲིང་རིམ་ཆེད་སྦྱོང་སློབ་གྲྭའི༽སློབ་མཐར་ཕྱིན་པའི་སློབ་མ་དང་དབྱིས་ཡིག་རིགས་དང་པོའི་མཐོ་རིམ་རྒྱུགས་སྤྲོད་སློབ་མ་ནི་ལིའང་ཧྲན་ཁུལ་གྱི2015ལོའི་དབྱིས་ཡིག་རིགས་དང་པོའི་མཐོ་རིམ་སློབ་འབྲིང་གི༼འབྲིང་རིམ་ཆེད་སྦྱོང་སློབ་གྲྭའི༽མཐར་ཕྱིན་པའི་སློབ་མ་ཡིན།ད་ལོའི་སློབ་མ་བསྡུ་ལེན་བྱ་རྒྱུའི་འཆར་གཞི་ནང་ཞིང་ཆེན་ཕྱི་ནང་གི་མི་རིགས་སློབ་གླིང་དང་།སྤྱིར་བཏང་གི་མཐོ་རིམ་སློབ་ཆེན་གྱིས་བོད་ཡིག་དང་དབྱིས་ཡིག་རིགས་དང་པོའི་མཐོ་རིམ་སློབ་འབྲིང་གི་མཐར་ཕྱིན་སློབ་མ་བསྡུ་ལེན་བྱེད་པའི་དངོས་གཞིའི་ཚན་ཁག་དང་ཆེད་སྦྱོང་ཚན་ཁག་རྐྱང་པ་བསྡུ་ལེན་བྱ་རྒྱུའི་འཆར་གཞི་དང་།རང་རེའི་ཞིང་ཆེན་གྱི་ཁོངས་སུ་གཏོགས་པའི་སྤྱིར་བཏང་མཐོ་རིམ་སློབ་ཆེན་གྱིས་བོད་ཡིག་དང་དབྱི་ཡིག་གི་རིགས་དང་པོའི་དངོས་གཞིའི་ཚན་ཁག་དང་ཆེད་སྦྱོང་ཚན་ཁག་ལ་སློབ་ཡོན་མི་དགོས་པར་དགེ་འོས་སློབ་གྲྭའི་སློབ་མ་བསྡུ་ལེན་གྱི་འཆར་གཞི་དང་།བོད་ཡིག་དང་དབྱིས་ཡིག་རིགས་དང་པོའི་དངོས་གཞིའི་ཚན་ཁག་དང་ཆེད་སྦྱོང་ཚན་ཁག་གི་གྲ་སྒྲིག་ཚན་ཁག་སོགས་ཀྱི་འཆར་གཞི་འདུས་ཡོད།

　　ངོ་སྤྲོད་བྱས་པར་གཞིགས་ན།རིག་གནས་ལོ་རྒྱུས་རིགས་ཀྱི་ཆེད་སྦྱོང་སོ་སོའི་རྒྱུགས་སྤྲོད་སློབ་མས་བོད་ཡིག་དང་ཡང་ན་དབྱིས་ཡིག རྒྱ་ཡིག རྩིས་རིག དབྱིན་ཡིག རིག་གནས་ཚན་ཁག་ཕྱོགས་བསྡུས་བཅས་ཀྱི་ཡིག་རིགས་རྒྱུགས་སྤྲད་རྒྱུ་དང་།རང་བྱུང་རིག་པ་དང་བཟོ་སྐྲུན་རིག་པའི་རྒྱུགས་སྤྲོད་སློབ་མས་བོད་ཡིག་དང་ཡང་ན་དབྱིས་ཡིག རྒྱ་ཡིག རྩིས་རིག དབྱིན་ཡིག རང་བྱུང་རིག་གནས་ཚན་ཁག་གི་ཕྱོགས་བསྡུས་ཡིག་རིགས་བཅས་རྒྱུགས་སྤྲད་རྒྱུ། གྲངས་ཉུང་མི་རིགས་ཀྱིས་རྒྱ་ཡིག་རྒྱུགས་སྤྲད་ནས་རིམ་པ་གསུམ་པའི་དཔང་ཡིག་ཐོབ་པའི་རྒྱུགས་སྤྲོད་སློབ་མ་རྣམས་རྒྱའི་སྐད་ཡིག་གི་རྒྱུགས་སྤྲད་མི་དགོས། བོད་ཡིག་དང་དབྱིས་ཡིག རྒྱ་ཡིག རྩིས་རིག དབྱིན་ཡིག་བཅས་ཚན་པ་སོ་སོའི་སྐར་མ་ཆ་ཚང150རེ་ཡིན་པ་དང་།རིག་ཚན་ཕྱོགས་བསྡུས་དང་རྩིས་ཚན་ཕྱོགས་བསྡུས་ཀྱི་སྐར་མ་ཆ་ཚང300རེ་ཡིན།བོད་ཡིག་དང་དབྱི་ཡིག རྒྱ་ཡིག   ཡང་ན་གྲངས་ཉུང་མི་རིགས་ཀྱི་རྒྱ་ཡིག་གི་རྒྱུགས་སྤྲད་ནས་རིམ་པ་གསུམ་པ་ཅན་གྱི་སྦྱངས་འབྲས་དེ་ཚོ་སོ་སོ་བརྒྱ་ཆ50བརྩིས་ཏེ་རྒྱ་ཡིག་ཚན་ཁག་གི་སྦྱངས་འབྲས་སུ་འགོད་རྒྱུ་རེད།སྤྱིའི་སྦྱངས་འབྲས་ཀྱི་སྐར་གྲངས་ནི750ཡིན་པ་རེད།

　　ད་ལོ་ཡང་སྔར་ལྟར་དྲྭ་ལམ་ཐོག་ནས་འདོད་མོས་རེའུ་མིག་འགོད་པའི་བྱེད་སྟངས་ལྟར། རྒྱུགས་སྤྲོད་མཁན་སློབ་མ་ཚོས་རང་ཉིད་ཡོད་སའི་ས་གནས་ཀྱི་དྲྭ་ལམ་ཐོག་ནས་རང་གི་རེ་འདུན་ལྟར་ཐོ་འགོད་བྱ་དགོས་པ་དང་། རང་གིས་འགོད་པའི་མཐོ་རིམ་སློབ་གྲྭ་ཡོད་སའི་ཚན་པ་དང་གོ་རིམ་བཞིན་ཐོ་འགོད་བྱ་དགོས།།