ཀྲུང་གོ་བོད་ཀྱི་དྲ་བའི་འཕྲིན། ཉིན་ཤས་གོང་མངའ་རིས་ས་ཁུལ་གྱི་དཔེ་དེབ་ལྟ་ཀློག་ལྟེ་གནས་ཀྱིས་རིན་མེད་ངང་སྒོ་མོ་འབྱེད་པའི་མཛད་སྒོ་འཚོགས་པ་དེ་ཐོག་ནས་མངའ་རིས་སུ་བོད་ཡིག་གི་དཔེ་དེབ་མང་བ་དང་ནུས་པ་ཀུན་འཛོམས་ཀྱི་དཔེ་དེབ་ལྟ་ཀློག་ལྟེ་གནས་དངོས་སུ་བེད་སྤྱོད་གཏོང་འགོ་ཚུགས་པ་མཚོན་པ་དང་དེ་ནི་མངའ་རིས་ས་ཁུལ་གྱི་མི་རིགས་ཁག་གི་ལས་བྱེད་པ་དང་མང་ཚོགས་ཚོས་དྲ་ཞུགས་སློབ་སྦྱོང་བྱེད་པ་དང་། དཔེ་དེབ་ཀློག་པ་དང་ཚགས་པར་ལྟ་བ། དཔྱད་གཞིའི་ཡིག་ཆ་འཚོལ་ཞིབ་བཅས་བྱེད་པའི་རིག་གནས་ཚོམས་ཆེན་ཞིག་ཏུ་འགྱུར་རྒྱུ་ཡིན་པ་རེད།

ཤེས་རྟོགས་བྱུང་བར་གཞིགས་ན། མངའ་རིས་ས་ཁུལ་གྱི་དཔེ་དེབ་ལྟ་ཀློག་ལྟེ་གནས་ནི་དེ་སྔོན་མངའ་རིས་ས་ཁུལ་གྱི་དཔེ་མཛོད་ཁང་དང་རིག་གནས་ཐོན་ཁུངས་མཉམ་སྤྱོད་འདུ་འགོད་ཀྱི་ཐོན་ཁུངས་བསྡུ་སྒྲིལ་བྱས་པའི་རྨང་གཞིའི་ཐོག་བཙུགས་པ་ཞིག་རེད།

སྒྲིག་བཀོད་སྔར་བས་འཐུས་ཚང་དུ་གཏོང་བ་དང་ལྟ་ཀློག་གི་ཁོར་ཡུག་སྔར་བས་ལེགས་སུ་བཏང་ནས་ཁྱོན་བསྡོམས་གློག་རྡུལ་དཔེ་དེབ་ལྟ་ཀློག་དང་། ཤོག་རིགས་དཔེ་དེབ་ལྟ་ཀློག བརྙན་ལམ་ལྟ་ཀློག རིག་གནས་སྒྱུ་རྩལ་བརྩམས་ཆོས་འགྲེམས་སྟོན། རིག་གནས་སློབ་ཁང་བཅས་ནུས་ཁུལ5བཙུགས་ཡོད་ཅིང་། དེའི་ནང་ཤོག་རིགས་དཔེ་དེབ་ལྟ་ཀློག་ཁུལ་དུ་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་དང་། སྤྱི་ཚོགས་ཚན་རིག འཚོ་བ། བྱིས་པ་སོགས་ཀྱི་རིགས་མི་འདྲ་བའི་དཔེ་དེབ་ངོ་གྲངས་ཁྲི1ཙམ་ཡོད་པ་དང་། གློག་རྡུལ་དཔེ་དེབ་ལྟ་ཀློག་ཁུལ་དུ་གློག་ཀླད་ངོ་གྲངས45སྒྲིག་སྦྱོར་བྱས་པ་ཚང་མ་རིན་མེད་ངང་མཁོ་འདོན་བྱས་པ། བརྙན་ལམ་ལྟ་ཀློག་ཁུལ་དུ་ལྟ་སྐོར་བརྙན་ལམ་དང་རོལ་དབྱངས་མྱོང་རོལ་གྱི་ཞབས་ཞུ་མཁོ་འདོན་བྱས་པ། རིག་གནས་སྒྱུ་རྩལ་བརྩམས་ཆོས་འགྲེམས་སྟོན་ཁུལ་དུ་རིགས་ཁག་གི་པར་རིས་བརྩམས་ཆོས་དང་སྒྱུ་རྩལ་བརྩམས་ཆོས་མཁོ་འདོན་གྱིས་རྒྱ་ཆེའི་ཀློག་པ་པོར་ལོངས་སྤྱོད་དང་གདེང་འཇོག་དཔྱད་ཞིབ་བྱ་རྒྱུར་མཁོ་འདོན་བྱས་པ། རིག་གནས་སློབ་ཁང་དུ་རིགས་ཁག་གི་ཆེད་དོན་འཆད་ཁྲིད་གཉེར་ནས་སྤྱི་དམངས་ཚོར་སློབ་སྦྱོང་དང་། སྤེལ་རེས། གསོ་སྦྱོང་སོགས་ཀྱི་ཞབས་ཞུ་མཁོ་འདོན་བྱས་ཡོད་པ་རེད།  །