ཀྲུང་གོ་བོད་ཀྱི་དྲ་བའི་འཕྲིན། མཚོ་སྔོན་གྱི་ཉིས་སྟོང་བཅུ་བདུན་ལོའི་མཐོ་རྒྱུགས་ཟླ་དྲུག་པའི་ཚེས་བདུན་ཉིན་ལེན་མགོ་བརྩམས་ཤིང་། སྔ་དྲོའི་རྒྱུགས་མ་བླངས་པའི་སྔོན་ལ་མཚོ་སྔོན་ཞིང་ཆེན་ཏང་ཨུའི་རྒྱུན་ལས་ཨུ་ཡོན། ཧྲིན་ཀྲང་གཞོན་པ་ཝང་ཡུས་པོ་ཡིས་མཚོ་སྔོན་ཞིང་ཆེན་རྒྱལ་ཁབ་རྒྱུགས་དོན་བཀོད་འདོམས་ལྟེ་གནས་ནས། སློབ་གསོ་སྡེ་ཁག་གི་རྒྱུགས་དོན་བརྙན་རིས་གྲོས་ཚོགས་སུ་ཞུགས་ཏེ། བརྙན་རིས་བརྒྱུད་ནས་ཞིང་ཆེན་ཡོངས་ཀྱི་མཐོ་རྒྱུགས་བྱ་བར་ཞིབ་བཤེར་ལྟ་སྐུལ་མཛུབ་སྟོན་བྱས། ཝང་ཡུས་པོ་ཡིས་གྲོང་ཁྱེར་དང་ཁུལ་སོ་སོའི་སྲིད་གཞུང་གི་འབྲེལ་ཡོད་མི་སྣར་བརྙན་རིས་ཀྱི་ལམ་ནས་ཁ་བརྡ་བྱས་ཏེ། ས་གནས་སོ་སོའི་མཐོ་རྒྱུགས་སྟ་གོན་བྱ་བའི་གནས་ཚུལ་ལ་རྒྱུས་ལོན་བྱས་རྗེས། ཝང་ཡུས་པོ་ཡིས་ས་གནས་སོ་སོའི་འབྲེལ་ཡོད་སྡེ་ཁག་གིས་མགོ་ཁྲིད་བྱེད་ཤུགས་ཇེ་དྲག་ཏུ་གཏོང་བ་དང་། འོས་འགན་ཇེ་གསལ་དུ་གཏོང་བ། འགན་འཁྲི་དངོས་འབེབས་དོན་འཁྱོལ་བྱེད་པ། ཆེས་གཟབ་ནན་ཅན་གྱི་བྱེད་ཐབས་བཀོལ་ནས་མཐོ་རྒྱུགས་ཀྱི་བདེ་འཇགས་ལ་འགན་སྲུང་བྱེད་པ་དང་། ཆེས་བཙན་པའི་ཐབས་ལམ་བཀོལ་ནས་རྒྱུགས་རའི་ལུགས་འགལ་གྱི་བྱ་བར་རྡུང་རྡེག་གཏོང་བ། ཆེས་ནན་ཏན་གྱི་བྱ་སྤྱོད་ཀྱིས་རྒྱུགས་ཞུགས་པར་ཞབས་འདེགས་ཞུ་བ། ཆེས་གསང་བའི་གོ་རིམ་བརྒྱུད་དེ་རྒྱུགས་ཤོག་ལ་ལྟ་བ་དང་སློབ་མ་བསྡུ་བའི་བྱ་བ་བསྒྲུབ་པ་བཅས་ལ་འབད་དགོས་པའི་བླང་བྱ་བཏོན།

ཝང་ཡུས་པོ་ཧུའུ་ཐའེ་སློབ་འབྲིང་གི་རྒྱུགས་རར་སོང་ནས། ཡུལ་དངོས་ནས་རྒྱུགས་དོན་ཚན་ཁག་དང་རྒྱུགས་ལེན་པའི་གནས་ཚུལ་ལ་རྟོག་ཞིབ་བྱས། ཁོས་ནན་གྱིས་བསྟན་དོན། མཐོ་རྒྱུགས་ནི་ཁྱིམ་ཚང་ཁྲི་འབུམ་དང་འབྲེལ་བ་ཡོད་པས། ངེས་པར་དུ་དེར་མཐོང་ཆེན་བླ་མེད་གནང་དགོས་ཤིང་། རྒྱུགས་སྤྲོད་གོ་རིམ་ཁྲོད་ཀྱི་ལྟ་སྐུལ་ཚོད་འཛིན་དོ་དམ་བྱེད་ཤུགས་ཇེ་དྲག་ཏུ་གཏོང་དགོས། རྒྱུགས་རའི་ཉེ་འཁོར་གྱི་སྐོར་ཞིབ་དང་འགྲིམ་འགྲུལ་བརྒྱུད་ལམ་གེགས་མེད་ཡོང་བར་ཤུགས་བསྣན་ནས། ཁྱོན་ཡོངས་ནས་ཞབས་ཞུ་མཐའ་འཁྱོལ་ཡོང་བར་འགན་སྲུང་གང་ལེགས་བྱས་མཐར། རྒྱུགས་སྤྲོད་སློབ་མར་རྒྱུགས་སྤྲོད་པར་འཚམ་པའི་ཁོར་ཡུག་ལེགས་པོ་ཞིག་བསྐྲུན་དགོས་ཞེས་བསྟན།  །