ཟླ་ལྔ་བའི་ཚེས་བརྒྱད་ཉིན། མཚོ་སྔོན་ཞིང་ཆེན་སྲིད་གྲོས་ཀྱིས་མཚོ་སྔོན་དགེ་ཐོན་སློབ་ཆེན་གྱི་སློབ་ཆེན་སློབ་མའི་ལས་ཞུགས་ལས་སྐྲུན་ལས་གཞིར་རོགས་སྐྱོར་མ་དངུལ་འབུལ་བའི་བྱེད་སྒོ་སྤེལ་ཞིང་། སློབ་ཆེན་སློབ་མའི་ལས་སྐྲུན་ཚོགས་པ་བཅོ་ལྔ་ལ་རོགས་དངུལ་སྒོར་འབུམ་ལྔ་ཐོབ། མཚོ་སྔོན་ཞིང་ཆེན་སྲིད་གྲོས་ཀྱི་ཀྲུའུ་ཞི་རིན་ཆེན་རྒྱལ་ཐེངས་འདིའི་བྱེད་སྒོར་ཞུགས་ཤིང་། ཀྲུའུ་ཞི་གཞོན་པ་ཅི་རིན་ཧྥུན་གྱིས་ཞིང་ཆེན་སྲིད་གྲོས་ཀྱིས་སློབ་ཆེན་སློབ་མའི་ལས་ཞུགས་ལས་སྐྲུན་བྱ་བར་རོགས་སྐྱོར་བྱས་པའི་གནས་ཚུལ་མཚམས་སྦྱོར་བྱས།

ཞིང་ཆེན་སྲིད་གྲོས་ཀྱིས་ཐོག་མཐའ་བར་གསུམ་ཀུན་ཏུ་སློབ་ཆེན་སློབ་མའི་ལས་ཞུགས་ལས་སྐྲུན་བྱ་བར་མཐོང་ཆེན་བྱེད་ཀྱིན་ཡོད་པར་མ་ཟད། དེར་རྟོག་ཞིབ་གཏིང་ཟབ་བྱེད་ཀྱིན་ཡོད། དེའི་རྨང་གཞིའི་སྟེང་དུ། སློབ་ཆེན་སློབ་མའི་ལས་སྐྲུན་གོ་རིམ་ཁྲོད་མ་དངུལ་འདང་ངེས་མེད་པ་སེལ་རོགས་བྱེད་པ་དང་། སློབ་ཆེན་སློབ་མའི་ཁྲོད་གསར་གཏོད་ལས་སྐྲུན་གྱི་མཁའ་དབུགས་ལེགས་པོ་ཞིག་གྲུབ་པར་བྱེད་ཆེད། ཞིང་ཆེན་སྲིད་གྲོས་ཀྱིས་ཞིང་ཆེན་ཧོས་ཨེ་སྤྱི་ཕན་ཐེབས་རྩ་ཚོགས་པའི་སྒྲིག་ཡིག་གཏན་འབེབས་དང་རོགས་སྐྱོར་བྱེད་མཁན་གྱི་འདོད་མོས་ལྟར། གྲོས་མོལ་བརྒྱུད་དེ་མཚོ་སྔོན་དགེ་ཐོན་སློབ་ཆེན་དང་རོགས་སྐྱོར་བྱེད་ཐབས་བཏོན་པར་མ་ཟད། སྙན་ཞུ་འབུལ་བ་དང་དཔྱད་ཞིབ་བྱེད་པ། སྤྱི་བསྒྲགས་བྱེད་པ་སོགས་ཀྱི་ལས་རིམ་བརྒྱུད་དེ། ཐེབས་རྩ་ཚོགས་པའི་ལས་འཛིན་ལྷན་ཚོགས་ཀྱི་ཞིབ་འཇུག་བརྒྱུད་དེ། སློབ་གྲྭ་ཡོངས་ཀྱི་ལས་སྐྲུན་ཚོགས་པ་བཞི་བཅུའི་ནང་ནས་ཚོགས་པ་བཅོ་ལྔ་བསལ་ནས་རོགས་སྐྱོར་བྱས།

རིན་ཆེན་རྒྱལ་གྱིས་ལས་སྐྲུན་སློབ་མའི་འཐུས་མི་དང་ལྷན་དུ་བསམ་ཚུལ་བརྗེ་རེས་བྱས་ཤིང་། ལས་སྐྲུན་སློབ་མ་རྣམས་ཀྱི་སློབ་སྦྱོང་གནས་ཚུལ་ལ་རྒྱུས་ལོན་དང་སེམས་ཁུར་བྱས། ཁོས་བཤད་རྒྱུར། རྒྱལ་ཡོངས་སྲིད་གྲོས་ཨུ་ཡོན་ལིས་ཅན་མེན་དང་རྒྱ་ཆེ་བའི་སྲིད་གྲོས་ཨུ་ཡོན་རྣམས་ཀྱིས་མཚོ་སྔོན་གྱི་ན་གཞོན་ལས་སྐྲུན་བྱ་བ་ཐུགས་ལ་བཟུང་ནས། མཚོ་སྔོན་གྱི་སློབ་ཆེན་སློབ་མའི་ལས་སྐྲུན་ལས་གཞིར་མ་དངུལ་བརྩོན་ལེན་བྱེད་དགོས་པར་མ་ཟད། རིམ་པ་སོ་སོའི་སྲིད་གྲོས་ཨུ་ཡོན་རྣམས་ཀྱིས་ཀྱང་སྤྱི་ཚོགས་ཀྱི་འགན་འཁྲི་ཕྲག་སྟེང་དུ་བླངས་ནས། སྤྱི་ཚོགས་ལ་བརྩེ་སེམས་ཕུལ་ནས་མ་དཔེ་བཟང་བོ་སྟོན་དགོས་ཟེར།