ཟླ་བ3པའི་ཚེས20ཉིན། སི་ཁྲོན་ཞིང་ཆེན་གྱི་འཕྲོད་བསྟེན་དང་བདེ་ཐང་ཚོགས་ཆེན་དེ་ཁྲེང་ཏུའུ་རུ་འཚོགས་པ་རེད། ཚོགས་ཐོག་རྒྱལ་ཡོངས་འཕྲོད་བསྟེན་དང་བདེ་ཐང་ཚོགས་ཆེན། ལྷག་དོན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་བྱས་ཤིང་། ཉེ་བའི་ལོ་ཤས་རིང་རང་རེའི་ཞིང་ཆེན་གྱི་འཕྲོད་བསྟེན་དང་བདེ་ཐང་བྱ་གཞག་ལ་ཕྱོགས་བསྡོམས་བྱས་པ་དང་། བདེ་ཐང་སི་ཁྲོན་ཇེ་མགྱོགས་སུ་སྐྲུན་པའི་འབྲེལ་ཡོད་ལས་ཀར་བཀོད་སྒྲིག་བྱས་པ་རེད།

     ཞིང་ཆེན་ཏང་ཨུའི་ཧྲུའུ་ཅི་ཝང་ཏུང་མིང་ཚོགས་ཆེན་དུ་ཞུགས་ཤིང་གསུང་བཤད་གལ་ཆེན་གནང་བ་དང་། ཁོང་གིས་བསྟན་དོན། སྔོན་འགོག་གཙོ་བོར་བྱ་རྒྱུ་དེ་མངོན་གསལ་གྱི་གོ་གནས་སུ་བཞག་པ་རྒྱུན་འཁྱོངས་བྱས་ཏེ་ཁྱོན་ཡོངས་ནས་མང་ཚོགས་ཀྱི་བདེ་ཐང་གི་ཆུ་ཚད་ཇེ་མཐོར་གཏང་དགོས་པ་དང་། ཁྱོན་ཡོངས་ནས་སྨན་བཅོས་འཕྲོད་བསྟེན་ལམ་ལུགས་བཅོས་བསྒྱུར་བཏང་སྟེ་མང་ཚོགས་ཀྱིས་ནད་བརྟག་སྨན་བསྟེན་བྱེད་དཀའ་བའི་གནད་དོན་ཐག་གཅོད་ཧུར་ཐག་བྱ་དགོས། སེམས་ཐག་གཙང་བཅད་ཀྱིས་བདེ་ཐང་དབུལ་སྐྱོར་འགག་སྒྲོལ་བྱས་ཏེ་དབུལ་ཕོངས་མང་ཚོགས་ཀྱི་གཞི་རྩའི་སྨན་བཅོས་ལ་འགན་སྲུང་ཡོད་པའི་དམིགས་དབེན་འགྲུབ་པར་བྱ་དགོས། སྔར་ལྷག་གིས་བདེ་ཐང་ཐོན་ལས་འཕེལ་སྟོབས་ཆེ་རུ་བཏང་ནས་མང་ཚོགས་ཀྱི་བདེ་ཐང་གི་དགོས་མཁོ་སྔར་བས་ཆེ་རུ་བསྐང་དགོས། འཕྲོད་བསྟེན་དང་བདེ་ཐང་བྱ་གཞག་འཕེལ་རྒྱས་གཏོང་བའི་གནད་འགག་ནི་མི་ལ་ཐུག་པས་ངེས་པར་དུ་ཤེས་ལྡན་མི་སྣའི་འདེགས་སྐྱོར་བྱེད་ཤུགས་ཆེ་རུ་བཏང་ནས་མི་དམངས་ཡི་རང་བའི་འཕྲོད་བསྟེན་དང་བདེ་ཐང་གི་ལས་སྒྲུབ་དཔུང་སྡེ་ཞིག་འཛུགས་དགོས། ཏང་གིས་འཕྲོད་བསྟེན་དང་བདེ་ཐང་ལས་ཀར་ཁྲིད་སྟོན་བྱེད་ཤུགས་ཆེ་རུ་གཏོང་བ་དང་། འཕྲོད་བསྟེན་དང་བདེ་ཐང་གི་བྱ་གཞག་དེ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་སྤྱིའི་འཆར་འགོད་ནང་དུ་འཇུག་ཅིང་། སྔར་ལྷག་གིས་གཅིག་གྱུར་འཆར་འགོད་ཀྱིས་མཐུན་སྦྱོར་དང་དཔྱད་ཞིབ་འགན་འདྲི། དྲིལ་བསྒྲགས་སྣེ་ཁྲིད་བཅས་བྱས་ཏེ་བདེ་ཐང་སི་ཁྲོན་འཛུགས་སྐྲུན་བྱེད་པར་འགན་སྲུང་བརྟན་པོ་བྱ་དགོས།

     བདེ་ཐང་སི་ཁྲོན་འཛུགས་སྐྲུན་བྱ་རྒྱུ་ནི་ཞིང་ཆེན་ཏང་ཨུས་ཞིང་ཆེན་མི་དམངས་ཡོངས་ལ་ཁས་ལེན་བྱས་ཟིན་ནི་རེད། དེ་ནས་ཁྱེད་ཀྱི་ཚེ་ལ་བར་ཆད་མེད་ན་ནད་བརྟག་སྨན་བསྟེན་བྱེད་དཀའ་མོ་མེད་རྒྱུ་ནི་ཐག་གི་ཆོད་ནི་རེད་ཡ།