ཀྲུང་གོ་བོད་ཀྱི་དྲ་བའི་འཕྲིན། གསར་འགོད་པས་མཚོ་སྔོན་ཞིང་ཆེན་ཆུ་བེད་ཐིན་ནས་ཤེས་གསལ་བྱུང་བ་ལྟར་ན།ད་ལོར་རང་ཞིང་གིས་རྣམ་གྲངས་བརྩོན་ལེན་བྱེད་པ་དང་མ་དངུལ་གཏོང་ཚད་ཇེ་མང་དུ་གཏོང་བ་ནི་བྱ་བ་ཀུན་གྱི་གཙོ་གནད་དུ་བཞག་ཡོད་པ་དང་། ཐབས་ལམ་མང་པོ་དང་རིམ་པ་མང་པོ་བརྒྱུད་དེ་ཆུ་བེད་འཛུགས་སྐྲུན་ལ་ཤུགས་བསྣན་པ་རེད།ཟླ4བའི་ཚེས28ཉིན་བར་ཞིང་ཆེན་ཡོངས་ནས་ཆུ་བེད་འཛུགས་སྐྲུན་ཐད་མ་དངུལ་སྒོར་ཁྲི254349དངོས་འབེབས་བྱས་ཡོད་ལ།ཕན་འབྲས་ཡོད་པའི་སྒོ་ནས་ཆུ་བེད་འཛུགས་སྐྲུན་རྣམ་གྲངས་སྐོར་ཞིག་བདེ་བླག་ངང་ལག་བསྟར་བྱེད་པར་རྒྱབ་སྐྱོར་བྱས།རང་ཞིང་གི“ལོ་ལྔའི་ཚན་བཅུ་གཉིས”སྐབས་ཀྱི་ཆུ་བེད་འཕེལ་རྒྱས་འཆར་འགོད་བདེ་བླག་ངང་ལེགས་འགྲུབ་འབྱུང་ཆེད།ད་ལོར་ཞིང་ཆེན་ཆུ་བེད་ཐིན་གྱིས་ནན་ནན་ཏིག་ཏིག་གིས་ཀྲུང་དབྱང་དང་ཞིང་ཆེན་ཏང་ཨུ་སྲིད་གཞུང་བཅས་ཀྱིས་ཆུ་བེད་འཛུགས་སྐྲུན་ཐད་ལ་གནང་བའི་འཐབ་ཇུས་བཀོད་སྒྲིག་ལག་བསྟར་བྱས་ཏེ།རྒྱུན་ཆད་མེད་པར་ཆུ་བེད་འཛུགས་སྐྲུན་ལ་རྒྱབ་སྐྱོར་བྱས།ཟླ4བའི་ཚེས28ཉིན་བར་ཞིང་ཆེན་ཡོངས་ནས་ཆུ་བེད་འཛུགས་སྐྲུན་ཐད་བསྡོམས་པས་མ་དངུལ་སྒོར་ཁྲི254349དངོས་འབེབས་བྱས་པ་དང་། དེའི་ནང་ཀྲུང་དབྱང་གིས་མ་དངུལ་སྒོར་ཁྲི85480དང་ཞིང་ཆེན་རིམ་པས་སྒོར་ཁྲི168869བཅས་བཏང་བ་རེད།ཀྲུང་དབྱང་གིས་མ་དངུལ་གཏོང་བར་འཐུང་ཆུའི་བདེ་འཇགས་བཟོ་འགོད་དང་བོད་ཁུལ་གྱི་འཐུང་ཆུའི་བདེ་འཇགས་བཟོ་འགོད།རྫོང་རིམ་པའི་ཆུའི་རྒྱུ་སྤུས་ལྟ་ཞིབ་ས་ཚིགས་འཛུགས་སྐྲུན་དང་གཞི་རྒྱ་ཆུང་བའི་ཞིང་སའི་ཆུ་བེད་གཙོ་གནད་རྫོང་ཁག་འཛུགས་སྐྲུན།ཆུ་ལོག་བཅས་རང་བྱུང་ཁམས་ཀྱི་གནོད་འཚེ་སྔོན་འགོག་མ་དངུལ་སོགས་འདུས།ཞིང་ཆེན་རིམ་པས་མ་དངུལ་གཏོང་བར་ནོར་སྲིད་ཕྱོགས་ཀྱི་ཆེད་སྤྱོད་མ་དངུལ་དང་ཆུ་བེད་འཛུགས་སྐྲུན་ཐེབས་རྩ།ཆུའི་འབྱུང་ཁུངས་སྲུང་སྐྱོང་མ་དངུལ་སོགས་འདུས།  །