ཞིན་ཧྭ་གསར་འགྱུར་ཁང་གཞིས་ཀ་རྩེ་ནས་ཟླ་བ5པའི་ཚེས9ཉིན་འབྱོར་བའི་གཏམ་གསར། གཟའ་འཁོར་གཉིས་ལ་སྦྲེལ་མཐུད་དུ་འབད་འཐབ་བྱས་པར་བརྒྱུད། བོད་ལྗོངས་ཀྱི་འགུལ་འགོག་གནོད་སེལ་ལས་ཀར་དུས་རིམ་རང་བཞིན་གྱི་རྒྱལ་ཁ་ཐོབ། གནོད་སྐྱོན་ཚབས་ཆེན་ཐེབས་ཡུལ་དུ་བགྲོད་པའི་གཞུང་ལམ་ཐམས་ཅད་ཉམས་གསོ་བྱས་པས། གནོད་སྐྱོན་ཐེབས་ཡུལ་དུ་དགག་པའི་མང་ཚོགས་ལ་བཀོད་སྒྲིག་ལེགས་པོ་བྱས་ཡོད་ཅིང་། གནོད་སྐྱོན་ཐེབས་རྗེས་ཀྱི་ཁྱིམ་གཞིས་བསྐྱར་འཛུགས་ལས་ཀ་དེ་གོ་རིམ་ལྡན་པའི་ངང་གོང་དུ་སྤེལ་བཞིན་ཡོད།བོད་ལྗོངས་གཞིས་ཀ་རྩེ་ས་ཁུལ་དུ་གནོད་སྐྱོན་ཐེབས་རྗེས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་དེ་མ་ཐག་མཐོང་ཆེན་གནང་བ་དང་། སྤྱི་ཁྱབ་ཧྲུའུ་ཅི་ཞི་ཅི་ཕིང་དང་ཙུང་ལི་ལི་ཁེ་ཆང་རྣམ་གཉིས་ཀྱིས་འགུལ་འགོག་གནོད་སེལ་གྱི་ལས་ཀར་མཆན་བཀོད་མཛུབ་སྟོན་གནང་བ་རེད། དམངས་སྲིད་པུའུ་ཡིས་སྔོན་རྗེས་སུ་ཚན་ཁག་བཞི་བགོས་ཏེ་བོད་ལྗོངས་ཀྱི་གནོད་སྐྱོན་ཐེབས་ཡུལ་ལ་རྒུད་སྐྱོབ་གུར་ཁྲི3དང་། ཉལ་ཆས་ཁྲི6.5 དགུན་ཆས་ཁྲི6.5སོགས་ཀྲུང་དབྱང་གི་རྒུད་སྐྱོབ་གསོག་འཇོག་དངོས་རྫས་གཏོང་སྤྲོད་བྱས་ཡོད།
རྒུད་སྐྱོབ་ལས་ཀ་སྤེལ་རིམ་བོད་ལྗོངས་ཀྱི་ཏང་སྲིད་དམག་དང་། དྲག་ཆས་ཉེན་རྟོག་པ། མི་དམངས་བཅས་ཀྱིས་མཐུན་སྦྱོར་མཉམ་ལས་བྱས་ཏེ་གནོད་ཐེབས་མང་ཚོགས་ཉེན་མེད་ས་ཡུལ་དུ་བསྒྱུར་སྤོས་བྱེད་པར་སྐུལ་སློང་བྱས་ཤིང་། རིགས་སྣ་ཚོགས་ཀྱི་རླངས་འཁོར2700བཏང་བ་དང་། སྨན་བཅོས་ཀྱི་རོགས་སྐྱོར་གནང་རོགས་ཞུ་ས19བཙུགས་ཏེ་རིམ་རྩིས་བྱས་ན་རྨས་སྐྱོན་ཐེབས་པའི་མང་ཚོགས་མི་ཐེངས་ཁྲི1.76ལ་སྨན་བཅོས་བྱས་ཡོད། མིག་སྔར། འགུལ་འགོག་གནོད་སེལ་གྱི་ལས་ཀ་དེ་བབ་བསྟུན་རོགས་སྐྱོབ་བྱེད་པ་ནས་སྔར་ལས་ལྷག་པར་གནོད་ཐེབས་མང་ཚོགས་བཀོད་སྒྲིག་བྱེད་པ་དང་། སྟོབས་ཤུགས་ཡོད་དགུས་གནོད་སྐྱོན་ཐེབས་རྗེས་ཀྱི་ཁྱིམ་གཞིས་བསྐྱར་འཛུགས་ལས་ཀ་སྤེལ་བའི་དུས་རིམ་གསར་པར་ཕྱོགས་ཡོད།གསར་འགོད་པས་གཞིས་ཀ་རྩེ་གྲོང་ཁྱེར་དང་ས་ཁུལ། ལྷ་རྩེ་རྫོང་དང་གཉའ་ལམ་རྫོང་སོགས་བཀོད་སྒྲིག་བྱེད་ཡུལ་དུ་གནོད་ཐེབས་མང་ཚོགས་ལ་མཁོ་འདོན་བྱས་པའི་རྒུད་སྐྱོབ་དངོས་རྫས་འབེལ་པོ་ཡིན་པ་དང་། སྨན་བཅོས། ཆ་འཕྲིན། གློག་ཤུགས། འཐུང་ཆུ་སོགས་གནས་སྐབས་ཀྱི་རྨང་གཞི་སྒྲིག་ཆས་ཀྱང་འགན་སྲུང་བྱས་ཐུབ་ཡོད་པར་མཐོང་། ལྷ་རྩེའི་གནོད་ཐེབས་མང་ཚོགས་བཀོད་སྒྲིག་བྱེད་ཡུལ་དུ་ལོ་ན68ལོན་པའི་བགྲེས་པོ་ངག་དབང་ནོར་བུས་གསར་འགོད་པར་སྲིད་གཞུང་གིས་ངེད་ཚང་ལ་རྒུད་སྐྱོབ་གུར2བགོས་བྱུང་ལ། ཉིན་གཅིག་གི་ཟ་ཐུན་གསུམ་ཡང་བཟའ་རྒྱུ་ཡོད་པས། ཁོ་བོའི་སེམས་བདེ་ཞེས་བཤད།གནོད་སྐྱོན་ཚབས་ཆེན་ཐེབས་པའི་སྐྱིད་གྲོང་རྫོང་སྐྱིད་གྲོང་གྲོང་རྡལ་དང་དིང་རི་རྫོང་རོང་ཤར་ཤང་དུ་ཉིན་ཁ་ཤས་ལ་རྒུད་སྐྱོབ་བྱས་པ་བརྒྱུད། གནོད་ཐེབས་མང་ཚོགས་ཀྱི་གྱོན་རྒྱུ་དང་བཟའ་རྒྱུ་སོགས་གཞི་རྩའི་འཚོ་བའི་ཆ་རྐྱེན་བསྐངས་ཡོད་ཅིང་། སློབ་མ་ཚོ་ལའང་རྒུད་སྐྱོབ་གུར་ནང་སློབ་ཁྲིད་བྱེད་ཡོད་དོ།།