ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ5པའི་ཚེས6ཉིན་འབྱོར་བའི་གཏམ་གསར། ཉེ་ཆར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་བོད་ལྗོངས་གཞིས་ཀ་རྩེ་དང་མངའ་རིས་སོགས་ས་ཁུལ་གྱི་འགུལ་འགོག་གནོད་སེལ་གྱི་ལས་ཀར་ཡང་བསྐྱར་མཛུབ་སྟོན་གལ་ཆེན་གནང་ཞིང་། འགུལ་འགོག་གནོད་སེལ་གྱི་ལས་ཀར་དུས་རིམ་རང་བཞིན་གྱི་རྒྱལ་ཁ་ཐོབ་པར་ཁས་ལེན་མཛད་དེ། མུ་མཐུད་ནས་འབད་བརྩོན་བྱ་དགོས་པ་དང་དུས་ཚོད་དམ་འཛིན་བྱས་ནས་འཚོལ་སྐྱོབ་བྱ་དགོས་ཤིང་། ནུས་ཤུགས་ཡོད་དགུ་བཏོན་ནས་རྨས་མར་སྲོག་སྐྱོབ་སྨན་བཅོས་བྱ་དགོས་ལ། གནོད་ཐེབས་མང་ཚོགས་བཀོད་སྒྲིག་ལེགས་པོ་བྱས་ནས་གནོད་སྐྱོན་ཐེབས་རྗེས་ཀྱི་ཁྱིམ་གཞིས་བསྐྱར་འཛུགས་ལས་ཀ་ཡག་པོ་བསྒྲུབས་ཏེ། བོད་ལྗོངས་དང་ཁྱད་པར་དུ་གནོད་སྐྱོན་ཐེབས་ཁུལ་གྱི་སྤྱི་ཚོགས་འཆམ་མཐུན་བརྟན་བརླིང་ཡོང་བར་སྲུང་སྐྱོང་བྱ་དགོས་ཞེས་ཐུགས་རེ་གནང་བ་རེད།ཟླ་བ4པའི་ཚེས25ཉིན་ནེ་པ་ལར་ས་འགུལ་རིམ་པ8.1དང་རྗེས་སུ་བྱུང་བའི་འཕྲོ་ལུས་ས་འགུལ་གྱིས་བོད་ལྗོངས་ཀྱི་གཞིས་ཀ་རྩེ་དང་མངའ་རིས་སོགས་མཐའ་མཚམས་ས་ཁུལ་དུ་ཤུགས་རྐྱེན་ཐེབས་ཏེ་ཚེས6ཉིན་གྱི་ཆུ་ཚོད17གྱི་བར་དུ། མི26ཤི་བ་དང་མི3གར་སོང་ཆ་མེད་དུ་གྱུར། མི856ལ་རྨས་སྐྱོན་ཐེབས། མི་ཁྲི30ལ་ཉེ་བ་ཞིག་ལ་གནོད་སྐྱོན་ཐེབས། ཁང་མིག2699དང་དགོན་པ་གཅིག་ལོག་པ། ཞིང་དུད39943གྱི་ཁང་པ་དང་དགོན་པ242རིག་གནས་དངོས་རྫས་སྡེ་ཁག་གི་སྤྱོད་ཁང་ཚང་མར་གནོད་སྐྱོན་ཐེབས་པ་རེད།གནོད་སྐྱོན་ཐེབས་རྗེས། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་མཐོང་ཆེན་གནང་། ཞི་ཅིན་ཕིང་གིས་དུས་ཐོག་ཏུ་བོད་ལྗོངས་ཀྱི་ཏང་ཨུ་དང་སྲིད་གཞུང་། འབྲེལ་ཡོད་སྡེ་ཁག་གིས་མགྱོགས་མྱུར་དུ་བྱ་སྤྱོད་སྤེལ་བ་དང་ཁྱོན་ཡོངས་ནས་བཀོད་སྒྲིག་བྱ་དགོས་ཤིང་། ཏང་སྲིད་དམག་དང་དྲག་ཆས་ཉེན་རྟོག་དམག མི་དམངས་བཅས་མཐུན་སྦྱོར་མཉམ་འབྲེལ་བྱས་ཏེ་ཤུགས་གང་ཡོད་ཀྱིས་འགུལ་འགོག་གནོད་སེལ་གྱི་ལས་ཀ་ཡག་པོ་བསྒྲུབ་དགོས་ཞེས་མཛུབ་སྟོན་གལ་ཆེན་གནང་།ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་གཅིག་འགྱུར་གྱིས་བཀོད་སྒྲིག་དང་ཀྲུང་དབྱང་དང་རྒྱལ་ཁབ་དོན་གཅོད་ཨུ་ལྷན་གྱིས་རྒྱབ་སྐྱོར་འོག བོད་ལྗོངས་ཏང་ཨུ་དང་སྲིད་གཞུང་གིས་དེ་མ་ཐག་བཀོད་སྒྲིག་བྱས་པ་དང་མི་རིགས་ཁག་གི་མང་ཚོགས་ཀྱིས་བློ་སེམས་གཅིག་ལ་བརྟེན་ནས་ཏང་སྲིད་དམག་དང་། དྲག་ཆས་ཉེན་རྟོག་དམག མི་དམངས་བཅས་མཐུན་སྦྱོར་མཉམ་འགུལ་བྱས་པ་དང་ནུས་ཤུགས་ཡོད་དགུས་འགུལ་འགོག་གནོད་སེལ་གྱི་ལས་ཀ་ལེགས་པོ་བསྒྲུབས་པས། མིག་སྔར། མི63989བསྒྱུར་སྤོས་བྱས་ཏེ་བཀོད་སྒྲིག་ལེགས་པོ་བྱས་པ་དང་གནོད་ཐེབས་མང་ཚོགས་ལ་སྡོད་ས་དང་ཟ་རྒྱུ། གོས་གྱོན་རྒྱུ། ཆུ་འཐུང་རྒྱུ་བཅས་ཡོད་ལ། ནད་ཡོད་ན་བསྟེན་ས་ཡོད་པར་མ་ཟད། གནོད་ཐེབས་ཁུལ་དུ་གློག་ཤུགས་དང་ཆུ། བརྡ་འཕྲིན་བཅས་ཐོག་མར་བསླར་གསོ་བྱུང་ཞིང་། སྤྱི་ཚོགས་ཀྱི་སྒྲིག་ལམ་རྒྱུན་ལྡན་དང་སྤྱི་ཡོངས་བརྟན་བརླིང་ཡིན་པ་རེད།བོད་ལྗོངས་དང་འབྲེལ་ཡོད་སྡེ་ཁག་གིས་ཏན་ཏིག་གིས་ཞི་ཅིན་ཕིང་གི་མཛུབ་སྟོན་གལ་ཆེན་ལག་ལེན་མཐར་ཕྱིན་བྱས་པ་དང་མུ་མཐུད་ནས་དུས་ཚོད་དམ་འཛིན་བྱས་ཏེ་འགུལ་འགོག་གནོད་སེལ་གྱི་ལས་ཀ་ལེགས་པོ་བསྒྲུབས་ནས་བར་བརྒལ་བཀོད་སྒྲིག་དང་གནོད་སྐྱོན་ཐེབས་རྗེས་ཀྱི་ཁྱིམ་གཞིས་བསྐྱར་འཛུགས་ལེགས་པོ་སྒྲུབ་གང་ཐུབ་བྱས་ཏེ། འགུལ་འགོག་གནོད་སེལ་གྱི་ལས་ཀ་ཁྱོན་ཡོངས་ནས་རྒྱལ་ཁ་ཐོབ་པར་འབད་འབུངས་བྱ་རྒྱུའོ།།