རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཚེས་ཉེར་གསུམ་ཉིན་ཡ་ཅ་ཏ་ནས་དབྱི་ལང་གི་ཙུང་ཐུང་ལུའུ་ཧ་ཉི་ལ་མཇལ་འཕྲད་གནང་།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཚེས་ཉེར་གསུམ་ཉིན་ཡ་ཅ་ཏ་ནས་དབྱི་ལང་གི་ཙུང་ཐུང་ལུའུ་ཧ་ཉི་ལ་མཇལ་འཕྲད་གནང་།མཇལ་འཕྲད་གནང་སྐབས་ཞི་ཅིན་ཕིང་གིས་གསུངས་རྒྱུར།ཀྲུང་གོ་ཕྱོགས་ཀྱིས་ཀྲུང་གོ་དང་དབྱི་ལང་བར་གྱི་འབྲེལ་བ་འཕེལ་རྒྱས་སུ་འགྲོ་བར་ཧ་ཅང་མཐོང་ཆེན་བྱེད་ཀྱིན་ཡོད་པ་དང་།དེང་སྐབས་རྒྱལ་ཁབ་གཉིས་ཀྱི་འབྲེལ་བ་དེ་སྔར་སྲོལ་རྗེས་མཐུད་ཀྱི་དུས་སྐབས་གལ་ཆེན་ཏུ་བསླེབས་ཡོད་པས།ཕྱོགས་གཉིས་ཀྱིས་མཐོ་རིམ་མགོ་ཁྲིད་པའི་འགྲོ་འོང་དང་ཁྱབ་ཁོངས་སོ་སོའི་འབྲེལ་འདྲིས་སྲུང་འཛིན་བྱས་ནས་འཐབ་ཇུས་ཀྱི་ཕན་ཚུན་ཡིད་ཆེས་ལ་སྐུལ་འདེད་གཏོང་དགོས།ཀྲུང་གོ་ཕྱོགས་ཀྱིས་མུ་མཐུད་དུ་དབྱི་ལང་གི་འབྲེལ་ཡོད་ཕྱོགས་སོ་སོ་དང་འབྲེལ་འདྲིས་དམ་པོ་བྱས་ཏེ།ཕྱོགས་གཉིས་ཀྱི་དངོས་གཉེར་གཉིས་ཕན་མཉམ་ལས་དེ་སྔར་ལས་རྒྱ་བསྐྱེད་འདོད་ཡོད་ཟེར།ལུའུ་ཧ་ཉི་ཡིས་བཤད་རྒྱུར།དབྱི་ལང་དང་ཀྲུང་གོ་བར་གྱི་མཛའ་བཤེས་འབྲེལ་བ་གཏིང་ཟབ་པ་དང་།དབྱི་ལང་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་ཁྱབ་ཁོངས་སོ་སོའི་བརྗེ་རེས་དང་མཉམ་ལས་གཏིང་ཟབ་ཏུ་སྤེལ་འདོད་ཡོད།དབྱི་ལང་གིས་རྒྱལ་ཁབ་གཉིས་བར་གྱི་ནུས་ཁུངས་དང་ཚན་རྩལ།ལྕགས་ལམ།གྲུ་ཁ་སོགས་རྨང་གཞིའི་སྒྲིག་ཆས་ཁྱབ་ཁོངས་ཀྱི་མཉམ་ལས་རྒྱ་བསྐྱེད་འདོད་ཡོད་ཟེར།  །