མི་དམངས་དྲ་བའི་འཕྲིན།“བོད་ལྗོངས་ཀྱིས་དམངས་ཁྲོད་རྟེན་རྫས་བཤམས་མཛོད་ཁང་འཛུགས་སྐྲུན་བྱ་རྒྱུར་ནུས་ཤུགས་ཡོད་རྒུས་རྒྱབ་སྐྱོར་བྱས་ཏེ་དམངས་ཁྲོད་རྟེན་རྫས་བཤམས་མཛོད་ཁང་དང་པོ་སྟེ།ཆོས་འབྱོར་གནའ་བོའི་གོ་མཚོན་རྟེན་རྫས་བཤམས་མཛོད་ཁང་བསྐྲུན་ཟིན་པ་དང་ཐོན་མིའི་བོད་ཡིག་རྟེན་རྫས་བཤམས་མཛོད་ཁང་ཐོ་འགོད་ལས་དོན་ལེགས་གྲུབ་ཟིན་ཡོད”ཅེས་བོད་རང་སྐྱོང་ལྗོངས་རིག་དངོས་ཅུས་ཀྱི་ཅུས་ཀྲང་བཟང་པོས་ཉེ་ཆར་དེ་ལྟར་བཤད།ཆོས་འབྱོར་གནའ་བོའི་གོ་མཚོན་རྟེན་རྫས་བཤམས་མཛོད་ཁང་འདི་ཉིད་བོད་ལྗོངས་ལྷ་ས་གྲོང་ཁྱེར་མལ་གྲོ་གུང་དཀར་རྫོང་དུ་གནས་པ་དང་བསྡོམས་མ་དངུལ་སྒོར་ཁྲི་500བཏང་བ་དང་འཛུགས་སྐྲུན་རྒྱ་ཁྱོན་སྨི་ངོས་གྲུ་1500ཟིན་ཞིང་།ཐོག་སོ་དང་པོ་ནི་གསོག་ཉར་དངོས་རྫས་རིགས་ཀྱི་འགྲེམས་སྟོན་ཁུལ་ལྔ་ཡིན་པ་དང་ཐོག་སོ་གཉིས་པ་ནི་གཞུང་དོན་ཁང་དང་ལས་བཟོའི་ཉལ་ཁང་གཙོ་བོར་བྱས་པའི་འཚོ་བའི་ཁུལ་ཡིན་པ་རེད།གསར་འགོད་པས་ཤེས་རྟོགས་བྱུང་བར་གཞིགས་ན།ཆོས་འབྱོར་གནའ་བོའི་གོ་མཚོན་རྟེན་རྫས་བཤམས་མཛོད་ཁང་གི་་གསོག་ཉར་དངོས་རྫས་གཙོ་བོ་ནི་བོད་རིགས་ཀྱི་དམངས་ཁྲོད་རིག་དངོས་ཉར་ཚགས་བྱེད་མཁན་ཆོས་འབྱོར་གྱིས་ཉེ་བའི་ལོ་30ལྷག་ཙམ་ནང་དམངས་ཁྲོད་ཀྱི་རྩ་ཆེའི་རིག་དངོས་ཆིག་ཁྲི་ཙམ་ཉར་ཚགས་བྱས་པ་དེ་དག་ཡིན་ཞིང་།གནའ་བོའི་གོ་མཚོན་དང་།རྟ་ཆས།དར་བསླས།ཁྱིམ་ཆས།རྫ་ཆས།རྡོ་ཆས།ཤིང་ཆས་བཅས་དང་དེ་བཞིན་གནའ་གཞུང་གི་ཚད་ལྡན་ཡིག་ཆ་ཁག་གཅིག་ཡོད་པ་རེད།
ངོ་སྤྲོད་བྱས་པར་གཞིགས་ན།ཆོས་འབྱོར་གནའ་བོའི་རྟེན་རྫས་བཤམས་མཛོད་ཁང་གི་རིག་དངོས་གསོག་ཉར་དངོས་རྫས་ལ་བོད་རིགས་དང།རྒྱ་རིགས།མན་ཇུ་རིགས།སོག་རིགས་སོགས་ཀྱི་མི་རིགས་ཁྱད་ཆོས་ལྡན་པ་དང་དངོས་རྫས་ཀྱི་ལོ་རྒྱུས་དུས་རབས་ཡུན་རིང་ལྡན་ཞིང་།བོད་ཀྱི་ལོ་རྒྱུས་དུས་མཚམས་གཙོ་བོ་ཁག་ཧ་ལམ་ཚུད་ཡོད།མིག་སྔར་གསོག་ཉར་དངོས་རྫས་དེ་དག་བོད་ཀྱི་རིག་དངོས་ཆོད་སྡོམ་རིགས་གཅིག་མཁས་ཅན་ཚོགས་ཆུང་གིས་ཆོད་སྡོམ་བྱས་པ་དང་འབྲེལ་ལག་ཁྱེར་ཡང་སྤྲད་པ་དང་།རྒྱལ་ཁབ་ཕྱི་ནང་གི་ཡུལ་སྐོར་བས་རིན་མེད་ངང་ལྟ་སྐོར་བྱེད་ཆོག་གི་ཡོད་པ་རེད།