ཀྲུང་གུང་ཀྲུང་དབྱང་།རྒྱལ་སྲིད་སྤྱི་ཁྱབ་ཁང་གིས་ཉེ་ཆར《འཆམ་མཐུན་གྱི་ངལ་རྩོལ་འབྲེལ་བ་འཛུགས་པའི་སྐོར་གྱི་བསམ་འཆར》ཞེས་པ་སྤེལ། ཡིག་ཆ་དེ་ནི་ཚེས8ཉིན་ཞིན་ཧྭ་གསར་འགྱུར་ཁང་གིས་པར་དབང་བླངས་ནས་འགྲེམ་སྤེལ་བྱས་པ་རེད།ཡིག་ཆ་ལས།རང་རྒྱལ་ནི་སྤྱི་ཚོགས་དང་དཔལ་འབྱོར་གྱི་རྣམ་པ་བརྗེ་བསྒྱུར་བྱེད་པའི་དུས་རིམ་དུ་སླེབས་ཡོད་ལ།ངལ་རྩོལ་འབྲེལ་བ་དང་ཁེ་དབང་གཏུག་བཤེར་གྱི་གནས་ཚུལ་ཇེ་མང་ནས་ཇེ་མང་འགྱུར་བཞིན་ཡོད་པས།ངལ་རྩོལ་འབྲེལ་བའི་འགལ་བ་འབུར་ཐོན་དང་འབྱུང་ཐེངས་མང་བའི་དུས་རིམ་དུ་སླེབས་ཡོད་པ་དང་།ངལ་རྩོལ་རྩོད་གཞིའི་གྱོད་དོན་ཚད་གྲངས་མཐོན་པོར་གནས་ཡོད།ས་གནས་ལ་ལས་ཞིང་པ་གླ་བའི་གླ་ཕོགས་ཆད་ལྷག་གཏོང་བ་སོགས་ལས་བཟོ་བའི་ཁེ་ཕན་ལ་གནོད་འཚེ་བཟོ་བའི་སྣང་ཚུལ་སྔར་བཞིན་འབུར་ཐོན་ཡིན་པས།ལས་བཟོ་བས་མཉམ་གཅིག་ཏུ་ལས་མཚམས་འཇོག་པ་དང་དོན་རྐྱེན་སྣ་མང་འབྱུང་བཞིན་ཡོད་པས།འཆམ་མཐུན་གྱི་ངལ་རྩོལ་འབྲེལ་བ་འཛུགས་པའི་ལས་འགན་ཧ་ཅང་ལྗིད་པ་རེད་ཅེས་བསྟན་ཡོད།བསམ་འཆར་ལས།གླ་ཕོགས་སྤྲོད་པའི་སྐོར་གྱི་གཏན་འབེབས་ཆ་ཚང་བཟོ་བ་དང་ལག་བསྟར་བྱ་དགོས་ལ།གླ་ཕོགས་སྤྲད་རྒྱུར་ལྟ་ཞིབ་ཚོད་འཛིན་དང་།གླ་ཕོགས་འགན་ལེན་མ་དངུལ་དང་སྦག་གླ་ཆད་པའི་བབ་བསྟུན་འཁོར་སྐྱོད་མ་དངུལ་ལམ་ལུགས་བཅས་ཆ་ཚང་འཛུགས་པ།སྦག་གླ་ཆད་པའི་འགན་ལེན་མ་དངུལ་ལམ་ལུགས་འཛུགས་པ།སྦག་གླ་ཆད་ལྷག་གཏོང་བའི་འགན་གཙང་ལེན་མཁན་ཁེ་ལས་ཀྱི་འོས་འགན་ལམ་ལུགས།ཁྲིམས་ལྟར་ངལ་རྩོལ་གླ་ཕོགས་མི་སྤྲོད་མཁན་ལ་ཆད་པ་གཅོད་པ་སོགས་ལག་བསྟར་བྱས་ནས།ལས་བཟོ་བ་དང་ལྷག་པར་དུ་ཞིང་པ་གླ་བར་དུས་ལྟར་གླ་ཕོགས་སྤྲད་རྒྱུ་འགན་ལེན་བྱ་དགོས་པ་བཏོན་ཡོད།བསམ་འཆར་ལས།རྒྱལ་ཁབ་ཀྱིས་གཏན་ཁེལ་བྱས་པའི་ལས་བཟོ་བའི་ལས་སྒྲུབ་དུས་ཡུན་དང་།རྒྱལ་ཡོངས་ཀྱི་དུས་ཆེན་དང་རྗེས་དྲན་ཉིན་མོ།གླ་ཕོགས་ལེན་བཞིན་དུ་གུང་གསེང་གཏོང་ཆོག་པ་སོགས་སྐོར་གྱི་གཏན་འབེབས་ལག་བསྟར་བྱེད་པ་དང་།ཁེ་ལས་ཀྱིས་དམིགས་བསལ་ལས་སྒྲུབ་དུས་ཚོད་ཀྱི་ལམ་ལུགས་ལག་བསྟར་བྱེད་པར་ཞིབ་མཆན་གནང་རྒྱུ་ཚད་ལྡན་གཏོང་བ།ཁེ་ལས་ཀྱིས་ཁྲིམས་ལྟར་ལས་བཟོ་བའི་ངལ་གསོ་དུས་ཚོད་བཀོད་སྒྲིག་བྱ་རྒྱུར་ལྟ་སྐུལ་བཅས་བྱ་དགོས།ཐོན་སྐྱེད་དང་ཚོང་གཉེར་དགོས་མཁོའི་དབང་གིས་ཁེ་ལས་ཀྱིས་ལས་བཟོ་བའི་ལས་སྒྲུབ་དུས་ཡུན་ཇེ་རིང་གཏང་དགོས་ཚེ།བཟོ་ཚོགས་དང་བཟོ་ལས་མཐུན་ཚོགས་ལ་གྲོས་མོལ་བྱ་དགོས་པར་མ་ཟད།ད་དུང་ཁྲིམས་ལྟར་ལས་བཟོ་བར་གླ་ཕོགས་ཁ་སྣོན་བྱ་དགོས་པ་སོགས་ནན་དུ་བསྟན་ཡོད་པ་རེད།བསམ་འཆར་ལས།ལས་བཟོ་བར་ངལ་རྩོལ་བདེ་འཇགས་དང་འཕྲོད་བསྟེན་སྲུང་སྐྱོང་གི་ཁེ་དབང་ཐོབ་པར་འགན་ལེན་བྱ་དགོས་པ་དང་།དོན་དངོས་སུ་ཁོ་ཚོར་སྤྱི་ཚོགས་ཉེན་འགོག་འགན་ལེན་དང་ལས་རིགས་ལག་རྩལ་གསོ་སྦྱོང་གི་ཁེ་དབང་རེག་པར་འགན་ལེན་བྱ་དགོས།གཟབ་ནན་གྱིས་སྤྱི་ཚོགས་ཉེན་འགོག་བཅའ་ཁྲིམས་ལག་བསྟར་དོན་འཁྱོལ་བྱས་ནས།མུ་མཐུད་དུ་སྤྱི་ཚོགས་ཉེན་འགོག་འགན་ལེན་འབྲེལ་བ་བརྗེ་བསྒྱུར་ཐབས་ལམ་ཆ་ཚང་གཏོང་བ་དང་།ཧུར་ཐག་གིས་སྤྱི་ཚོགས་ཉེན་འགོག་འགན་ལེན་གྱིས་ཡོངས་སུ་ཁེབས་ཐུབ་པ་བྱས་ནས།རྒྱ་ཆེའི་ལས་བཟོ་བ་དང་ལྷག་པར་དུ་ཞིང་པ་གླ་བ།མངག་གཏོང་གླ་བའི་སྤྱི་ཚོགས་ཉེན་འགོག་འགན་ལེན་གྱི་ཁེ་དབང་ལག་བསྟར་ཐུབ་པ་བྱ་དགོས་ཞེས་བསྟན་ཡོད་པ་རེད།།