ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་ཚེས་བཅོ་བརྒྱད་ཉིན་མགོ་འཛིན་མཛད་དེ་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་བསྡུས་ཏེ། སྲིད་གཞུང་བྱ་བའི་སྙན་ཞུའི་ལས་ཁུངས་ཀྱི་འགན་འཁྲི་དང་ལས་བགོས་གཏན་འཁེལ་བྱས་ནས། ལོ་ཧྲིལ་བོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་འབེན་དང་ལས་འགན་གཙོ་བོ་ཡོངས་འགྲུབ་བྱེད་རྒྱུ་འགན་སྲུང་བྱས་ཤིང་། ཞིང་ལས་རྒྱུན་མཐུད་སྒོས་འཕེལ་རྒྱས་སུ་འགྲོ་བར་སྐུལ་འདེད་བཏང་ནས་ཞིང་ལས་མྱུར་དུ་དེང་རབས་ཅན་ཏུ་འགྱུར་བར་བཀོད་སྒྲིག་བྱས་པ་དང་། གྲུ་ཁའི་བྱ་བ་ལེགས་སྒྱུར་བྱེད་པའི་སྲིད་ཇུས་དང་བྱེད་ཐབས་གཏན་འཁེལ་བྱས་ནས། སྒོ་འབྱེད་རྒྱ་སྐྱེད་དང་ཕྱི་ཚོང་བརྟན་འཇགས་སྒོས་འཕེལ་རྒྱས་སུ་འགྲོ་བར་སྐུལ་འདེད་བཏང་།

ཚོགས་ཐོག་ནས་བསྟན་དོན། རྒྱལ་ཡོངས་དམངས་ཆེན་གྱིས་ཆོག་མཆན་བཀོད་པའི་སྲིད་གཞུང་བྱ་བའི་སྙན་ཞུ་ནི་སྲིད་གཞུང་གིས་རྒྱལ་ཡོངས་མི་དམངས་ལ་ཁས་བླངས་པའི་འགན་འཁྲིའི་ཡི་གེ་ཡིན་པས། རྙོག་འཛིང་ཆེ་བའི་རྒྱལ་ཁབ་ཕྱི་ནང་གི་དཔལ་འབྱོར་གནས་བབ་ཀྱི་མདུན་དུ་ལས་ཁུངས་སོ་སོ་དང་སྡེ་ཁག་སོ་སོས་སྲིད་གཞུང་བྱ་བའི་སྙན་ཞུའི་བཀོད་སྒྲིག་ལྟར་འགན་འཁྲི་སྣ་ཚོགས་ལག་བསྟར་བཟང་བོ་བྱེད་དགོས་ཟེར། ཚོགས་ཐོག་ནས་ད་ལོའི་སྲིད་གཞུང་བྱ་བའི་ཕྱོགས་བཅུ་གཉིས་ནས་ལས་འགན་གཙོ་བོ་རེ་གཉིས་དང་འགན་འཁྲིའི་ལས་ཁུངས་གཏན་འཁེལ་བྱས། ཚོགས་ཐོག་ནས་བསྟན་དོན། གཅིག དཔལ་འབྱོར་འཁོར་རྒྱུགས་དེ་ལུགས་མཐུན་གྱི་བར་གནས་སུ་འགན་སྲུང་བྱེད་དགོས། གཉིས། ཕྱོགས་གཉིས་ཀྱི་ནུས་པ་མྱུར་དུ་ཇེ་ཆེར་གཏོང་དགོས། གསུམ། འགན་འཁྲིའི་བསམ་པ་དང་དགོས་གལ་བསམ་པ་ཇེ་དྲག་ཏུ་གཏོང་དགོས་ཟེར།

ཚོགས་ཐོག་ནས་རྒྱལ་ཡོངས་ཀྱི་ཞིང་ལས་རྒྱུན་མཐུད་སྒོས་འཕེལ་རྒྱས་སུ་གཏོང་བའི་འཆར་འགོད་ལ་གྲོས་འཆམ་བྱུང་བར་མ་ཟད། གཅིག་ནས་ཞིང་ལས་ཐོན་སྐྱེད་ཀྱི་བཀོད་སྒྲིག་ལེགས་སྒྱུར་བྱེད་པ་དང་། གཉིས་ནས་སྒྲིག་སྲོལ་བཅོས་སྒྱུར་ལ་སྦས་ཤུགས་ཡོད་དགོས་ལ། གསུམ་ནས་ས་ཆུའི་ཐོན་ཁུངས་སྲུང་སྐྱོབ་དང་ཞིང་ལས་དང་ཞིང་སྡེའི་ཁོར་ཡུག་བཅོས་སྐྱོང་བྱེད་པ་སོགས་ཀྱི་བཟོ་སྐྲུན་གལ་ཆེན་ལག་བསྟར་བྱེད་རྒྱུ་བཅས་གཏན་འཁེལ་བྱས།

ཚོགས་ཐོག་ནས་གཅིག ད་ཡོད་ཀྱི་རྨང་གཞིའི་སྟེང་གྲུ་ཁའི་འགྲོ་འོང་དང་ཕྱིར་གཏོང་ནང་འདྲེན་ལ་འབྲེལ་བ་ཡོད་པའི་ཞིབ་བཤེར་མཆན་འགོད་ལས་གཞི་སྐོར་ཞིག་ཡང་བསྐྱར་མེད་པར་གཏོང་བ་དང་ཞིབ་བཤེར་མཆན་འགོད་དབང་ཆ་མར་སྟེར་དགོས། གཉིས། གྲུ་ཁའི་འགྲོ་འོང་ཞབས་ཕྱི་ལེགས་སྒྱུར་བྱེད་དགོས། གསུམ། གྲུ་ཁའི་འགྲོ་འོང་གི་རོགས་ལས་ནང་རྐྱེན་གསར་སྐྲུན་བྱེད་དགོས། བཞི། གྲུ་ཁའི་བཀོད་སྒྲིག་བྱ་བ་ལེགས་སྒྱུར་བྱེད་དགོས་པ་བཅས་གཏན་འཁེལ་བྱས།

ཚོགས་ཐོག་ནས་ད་དུང་དོན་དག་གཞན་དག་ལ་ཞིབ་འཇུག་བྱས།  །