ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ11པའི་ཚེས17ཉིན་གློག་འཕྲིན་འབྱོར་གསལ། གོང་ཚེས་ཉིན་རྒྱལ་ཡོངས་ཀྱི་བསམ་པའི་དཔལ་ཡོན་འཛུགས་སྐྱོང་གི་གཟེངས་བསྟོད་ཚོགས་ཆེན་པེ་ཅིན་དུ་འཚོགས་པ་རེད།

     ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་མི་དམངས་ཚོགས་ཁང་ཆེ་མོར་ཚོགས་ཆེན་ལ་ཞུགས་མཁན་སྐབས་གསར་པའི་རྒྱལ་ཡོངས་ཀྱི་དཔལ་ཡོན་གྲོང་ཁྱེར་དང་། དཔལ་ཡོན་གྲོང་སྡེ་དང་གྲོང་རྡལ། དཔལ་ཡོན་སྡེ་ཚན་པ། དཔལ་ཡོན་སློབ་གྲྭ། ན་སོ་དར་ལ་མ་བབས་པའི་མིའི་བསམ་བློ་ཀུན་སྤྱོད་འཛུགས་སྐྱོང་ལས་དོན་བཅས་ཀྱི་སྔོན་ཐོན་འཐུས་མི་དང་རྒྱལ་ཡོངས་ཀྱི་ཀུན་སྤྱོད་དཔེ་བཟང་འཐུས་མིར་བྱམས་བརྩེའི་ངང་མཇལ་འཕྲད་གནང་ནས་འཐུས་མི་ཡོངས་ལ་བཀྲ་ཤིས་བདེ་ལེགས་ཞུས་གནང་བ་དང་འབྲེལ་ཁོ་ཚོར་ཡང་འབད་བསྐྱར་འབད་ཀྱིས་སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་འཛུགས་སྐྱོང་བྱེད་རིང་སླར་ཡང་བྱས་རྗེས་གསར་པ་འཇོག་པ་དང་མིག་དཔེ་འདོན་དགོས་པའི་ལྕག་སྐུལ་གནང་བ་རེད། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ། ཀྲུང་དབྱང་དཔལ་ཡོན་ཨུ་ལྷན་གྱི་ཀྲུའུ་རེན་ཝང་ཧུའུ་ཉིང་མཇལ་འཕྲད་ལ་ཞུགས་པ་དང་འབྲེལ་གཟེངས་བསྟོད་ཚོགས་ཆེན་ལའང་ཕེབས་པ་རེད།

     ཚེས17ཉིན་གྱི་སྔ་དྲོར། མི་དམངས་ཚོགས་ཁང་ཆེ་མོའི་གསེར་མདོག་ཚོམས་ཆེན་དུ་དགའ་སྤྲོའི་རྣམ་པས་ཁེངས་ཤིང་། རྒྱལ་ཡོངས་ཀྱི་བསམ་པའི་དཔལ་ཡོན་འཛུགས་སྐྱོང་གི་གཟེངས་བསྟོད་ཚོགས་ཆེན་ལ་ཞུགས་མཁན་འཐུས་མི600ལྷག་ཙམ་སྙིང་སྟོབས་རབ་ཏུ་འཕེལ་བ་དང་དགའ་བས་མྱོས་ཡོད། ཆུ་ཚོད་དགུ་དང་ཕྱེད་ཀར་ཞི་ཅིན་ཕིང་སོགས་དེ་གར་ཕེབས་སྐབས་ཚོགས་ར་ཡོངས་སུ་ཐལ་མོའི་རྡེབ་སྒྲས་ཁེངས། ཞི་ཅིན་ཕིང་སོགས་ཀྱིས་དགྱེས་ཚོར་ཆེན་པོས་འཐུས་མི་ཚོ་དང་ཕྱག་གཏོང་རེས་གནང་བ་དང་སྦྲགས་བྱམས་བརྩེའི་ངང་གླེང་མོལ་གནང་བ་རེད། འཐུས་མི་ཚོས་ཀྱང་གཅིག་རྗེས་གཉིས་མཐུད་ངང་སྤྱི་ཁྱབ་ཧྲུའུ་ཅིར་ཁམས་བདེའི་འཚམས་འདྲི་ཞུས་ཤིང་། ཞི་ཅིན་ཕིང་གིས་རྒྱལ་ཡོངས་ཀུན་སྤྱོད་དཔེ་བཟང་གི་འཐུས་མི་ལོ་ན93ལ་སོན་པའི་ཀྲུང་གོ་གྲུ་གཟིངས་ལྕི་བའི་བཟོ་ལས་ཚོགས་པའི་སྤྱི་གཉེར་ཁང719ཞིབ་འཇུག་སུའོ་ཡི་མཚན་འཛིན་སུའོ་ཀྲང་ཧོང་ཤུས་ཧྭ་དང་ལོ་ན82ལ་སོན་པའི་ཀུའེ་ཀྲོའུ་ཞིང་ཆེན་ཙུན་དབྱི་གྲོང་ཁྱེར་པོ་ཀྲོའུ་ཆུས་ཕིང་ཀྲེང་ཀེ་ལའོ་རིགས་ཤང་ཡོན་ཚའོ་ཝང་པ་གྲོང་སྡེའི་ཏང་ཀྲི་པུའི་ཧྲུའུ་ཅི་ཧོང་ཏ་ཧྥ་རྣམ་གཉིས་ལ་གཟིགས་སྐབས། ཞི་ཅིན་ཕིང་གིས་འཐུས་མི་གཉིས་པོའི་དབུས་སུ་བཞུགས་ནས་ཁོང་གཉིས་ཀྱི་ལག་པར་དམ་པོར་འཇུས་གནང་སྟེ་འཐུས་མི་རྣམ་གཉིས་ཁོང་གི་འཁྲིས་སུ་སྡོད་དུ་བཅུག་གནང་། འཐུས་མི་རྣམ་གཉིས་ཀྱིས་འཚེར་སྣང་བྱས་ཀྱང་སྤྱི་ཁྱབ་ཧྲུའུ་ཅིས་སླར་ཡང་གདན་ཞུ་གནང་བས། མཐར་ཁོང་རྣམ་གཉིས་སྤྱི་ཁྱབ་ཧྲུའུ་ཅིའི་ཉེ་འགྲམ་དུ་བསྡད། སྤྱི་ཁྱབ་ཧྲུའུ་ཅིས་དཔེ་བཟང་བ་རྒན་གྲས་གཉིས་པོར་ཐུགས་ཁུར་དང་བརྩི་འཇོག་འདི་འདྲ་གནང་བར་ཚོགས་འདུར་ཞུགས་མཁན་ཚང་མ་སེམས་འགུལ་ཆེན་པོ་ཐེབས་ནས་ཐལ་མོའི་རྡེབ་སྒྲ་ཡུན་རིང་གྲགས། དེ་རྗེས་ཞི་ཅིན་ཕིང་སོགས་ཀྱིས་འཐུས་མི་ཚོ་དང་ལྷན་དུ་དྲན་རྟེན་སྐུ་པར་བསྐྱོན་པ་རེད།

     ཏིང་ཤོའེ་ཞང་དང་ལིའུ་ཡན་ཏུང་མཇལ་འཕྲད་ལ་ཞུགས་པ་དང་འབྲེལ་ཚོགས་འདུའི་ཐོག་གཟེངས་བསྟོད་ཀྱི་གཏན་འབེབས་སྒྲོག་སྦྱངས་གནང་བ། ཧོང་ཁུན་མིང་མཇལ་འཕྲད་ལ་ཞུགས་པ་དང་འབྲེལ་གཟེངས་བསྟོད་ཚོགས་ཆེན་གཙོ་སྐྱོང་གནང་བ་རེད།ཚོགས་ཆེན་ཐོག་གཟེངས་བསྟོད་ཐོབ་མཁན་འཐུས་མིར་བྱ་དགའ་སྤྲད་པ་རེད།།