ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། 2015ལོ་ནི་ཀྲུང་གོའི་ཁྱོན་ཡོངས་ནས་བསྒྱུར་བཅོས་གཏིང་ཟབ་ཏུ་སྤེལ་བའི་གནད་འགག་གི་ལོ་ཡིན་པ་དང་།ཁྱོན་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་ལོ་དང་པོ་དང་།ཁྱོན་ཡོངས་ནས་ལོ་ལྔའི་འཆར་གཞི་བཅུ་གཉིས་པའི་འཆར་འགོད་ལེགས་སྒྲུབ་བྱུང་བའི་ལོའང་ཡིན་པ་རེད།ཚོགས་ཆེན་གཉིས་ཀྱི་སྔོན་དུ།ཀྲུང་གོ་ནི་འཛམ་གླིང་ཡོངས་ནས་དོ་ཁུར་བྱ་ཡུལ་ཏུ་གྱུར་ཡོད་པ་རེད།འཛམ་གླིང་གིས་ཀྲུང་གོའི་གོང་འཕེལ་གྱི་ཕྱི་ནང་གི་ཁོར་ཡུག་ལ་དོ་ཁུར་བྱེད་བཞིན་ཡོད།སི་ཕེན་གྱི་ཅ་ལེ་ཞི་ཡ་རྒྱལ་སྤྱིའི་འབྲེལ་བ་ཞིབ་འཇུག་ཁང་གི་འགོ་གཙོ།ཀྲུང་གོའི་གནད་དོན་གྱི་རིགས་གཅིག་མཁས་པ་ལེ་ཨའོ་སིས།ཀྲུང་གོའི་དཔལ་འབྱོར་དང་བདེ་འཇགས་ཕྱོགས་ཀྱི་འཐབ་ཇུས་འགྲན་རྩོད་ཇེ་དྲག་ཏུ་འགྲོ་བཞིན་ཡོད་པ་དང་།དེར་གཟབ་ནན་བྱེད་དགོས་པ་དང་ཆབས་ཅིག་འབད་བརྩོན་མི་བྱེད་པར་སྡོད་མི་རུང་ཞེས་པ་དང་།ཀྲུང་གོའི་དེང་རབས་ཅན་འཛུགས་སྐྲུན་གྱི་དམིགས་འབེན་མངོན་འགྱུར་ཐུབ་མིན་དེ་ད་ཆ་བསྒྱུར་བཅོས་བྱེད་ཐུབ་མིན་ལ་རག་ལས་ཡོད་པའི་ངེས་འཛིན་གནང་ཡོད་པ་རེད།རྙོག་འཛིང་ཆེ་བའི་རྒྱལ་ཁབ་ཕྱི་ནང་གི་ཁོར་ཡུག་འཕྲད་ཡོད་རུང་།རྒྱལ་སྤྱིའི་གླེང་ཕྱོགས་ཀྱིས་ཀྲུང་གོར་ཡིད་ཆེས་བཟུང་ཡོད་པ་རེད།འཛམ་གླིང་གིས་ཀྲུང་གོར་འཕྲད་ཡོད་པའི་འགྲན་རྩོད་ལ་དོ་ཁུར་བྱེད་བཞིན་ཡོད།ཀྲུང་གོས་འགྲན་རྩོད་དེ་དག་ལ་ཇི་ལྟར་ཁ་གཏད་བཅོག་རྒྱུ་རེད་ཅེས་པར།ཕྱིའི་རྒྱལ་ཁབ་ཀྱི་ཀྲུང་གོའི་གནད་དོན་གྱི་རིགས་གཅིག་མཁས་པའི་དོ་ཁུར་བྱ་ཡུལ་ཕྱོགས་གསུམ་དུ་འདུས་ཡོད་དེ།གཅིག་ནི་བསྒྱུར་བཅོས་གཏིང་ཟབ་ཏུ་གཏོང་རྒྱུ་དེ་རེད།པོ་ལོ་ཅིན་སི་སློབ་ཚོགས་ཆིན་ཧྭ་ལྟེ་གནས་ཞིབ་འཇུག་པ་རྒན་གྲས་ཀི་དབྱི་ཧའོ་ཡིས།ཐེངས་འདིས་ཀྲུང་གོས་བསྒྱུར་བཅོས་དེ་གཙོ་བོ་སྲིད་འཛིན་ལམ་ལུགས་དང་ཁྲོམ་རའི་སྒྲིག་གཞིར་དམིགས་ནས།ཀྲུང་གོའི་དཔལ་འབྱོར་གྱི་རྒྱུན་མཐུད་གོང་འཕེལ་ཁེག་ཐག་ཡོང་བར་བྱ་རྒྱུ་དེ་ཡིན་པ་རེད།གཉིས་ནི་ཁྲིམས་ལྟར་རྒྱལ་ཁབ་སྐྱོང་རྒྱུ་དེ་རེད།ཨེ་ཅིབ་ཀྱི་ཧི་ལི་ཝན་སློབ་ཆེན་ཀྲུང་གོའི་གནད་དོན་གྱི་ཞིབ་འཇུག་ལྟེ་གནས་ཀྱི་དགེ་རྒན་ཆེན་མོ་ཨན་ལ་ཡིས།ཉེ་བའི་ལོ་ངོ་གཉིས་རིང་གི་རུལ་སུངས་ལ་ངོ་རྒོལ་བྱེད་པའི་ཁྲོད་རུལ་སུངས་བ་མང་པོ་ཞིག་ཞིབ་བཤེར་ཐག་གཅོད་བྱས་ཡོད་པ་དང་།མིག་སྔར་རུལ་སུངས་ལ་ངོ་རྒོལ་བྱེད་པའི་ལས་དོན་དེ་གནད་འགག་གི་དུས་མཚམས་སུ་སླེབས་ཡོད།གོ་རིམ་རྗེས་མར་དུས་ཡུན་ཐུང་ངུའི་ནང་ཁྲིམས་ལྟར་རུལ་སུངས་འགོག་པའི་སྒྲིག་གཞི་འཛུགས་ཐུབ་མིན་ནི་གནད་འགག་ཡིན་པ་རེད།གསུམ་ནི་དམངས་ཀྱི་འཚོ་བ་དང་ཁོར་ཡུག་ལ་སྲུང་སྐྱོབ་བྱ་རྒྱུ་དེ་ཡིན་པ་རེད།རོ་མ་ནེ་ཡའི་དཔལ་འབྱོར་མཁས་པ་གྲགས་ཅན།ནོར་སྲིད་པུའུ་ཀྲང་ཟུར་པ་དང་རྒྱལ་ཁབ་དངུལ་ཁང་གི་འགོ་གཙོ་ཏོ་མེ་ཐི་ལེ་སི་ཁོས།ཀྲུང་གོའི་དཔལ་འབྱོར་དེ་མྱུར་ཚད་ལེགས་སྒྲིག་བྱས་ཡོད་པའི་རྒྱུན་རྣམ་གསར་བ་ཞིག་ཏུ་སླེབས་ཡོད་པ་དང་།དེས་ཁོར་ཡུག་སྲུང་སྐྱོབ་དང་སྐྱེ་ཁམས་འཛུགས་སྐྲུན་སོགས་གནད་དོན་མཐོ་ཚད་གསར་པ་ཞིག་ཏུ་སླེབས་པར་མཚོན་ཡོད་པ་རེད།འཛམ་གླིང་གིས་མུ་མཐུད་དུ་ཀྲུང་གོའི་ཁེ་ཕན་དང་བཟང་ཆ་མཉམ་སྤྱོད་བྱེད་པར་རེ་སྒུག་བྱས་ཡོད་པ་རེད།པ་ཙེར་གྱི་མེ་ན་སི་ཅི་ལ་སི་སློབ་ཆེན་གྱི་རིགས་གཅིག་མཁས་པ་ཝ་ཏིར་གྱིས།ཀྲུང་གོས་ཐེངས་འདིའི་བསྒྱུར་བཅོས་ཁྲོད་ཁྲོམ་རའི་ནུས་པ་དང་རྒྱལ་ཁབ་ཀྱི་ཐེ་གཏོགས་བར་ཇི་ལྟར་སྙོམས་སྒྲིག་བྱེད་པར་འཚོལ་ཞིབ་བྱ་རྒྱུ་ཡིན་པ་དང་།ཕྱིར་གཏོང་འཁོར་སྐྱོད་དེ་འཛད་སྤྱོད་དང་གསར་གཏོད་འཁོར་སྐྱོད་ཀྱི་དཔལ་འབྱོར་ཕྱོགས་སུ་ཇི་ལྟར་བསྒྱུར་རྒྱུ་འཚོལ་ཞིབ་བྱེད་རྒྱུ་འདི་དག་ནི་ལ་ཏེང་ཨ་མེ་རི་ཁའི་རྒྱལ་ཁབ་ལ་མཚོན་ནས་བཤད་ན་གལ་ཆེའི་དཔྱད་འཇོག་གི་དོན་སྙིང་ལྡན་པ་རེད།  །