ཀྲུང་གོ་བོད་ཀྱི་དྲ་བའི་འཕྲིན། བོད་ལྗོངས་རིག་དངོས་ཅུའུ་ཡི་ཅུའུ་ཀྲང་བཟང་པོས་བཤད་རྒྱུར།2014ལོའི་ལོ་མཇུག་བར་དུ།སྨིན་གྲོལ་གླིང་དགོན་པ་བཅས་བསྡུས་པའི་བོད་ལྗོངས་ཀྱི་རིག་དངོས་གནའ་ཤུལ14ཉམས་གསོ་བྱེད་པའི་ལས་གཞི་ལེགས་འགྲུབ་བྱུང་ཞིང་། བོད་ལྗོངས་ཀྱི་རིག་དངོས་སྲུང་སྐྱོང་སྡེ་ཁག་གིས་རིག་དངོས་ཉམས་གསོ་བྱེད་པའི་སྤྱི་གྲངས་ཀྱི35%ཟིན་ཡོད་ཟེར།བཟང་པོས་བཤད་རྒྱུར།བོད་ལྗོངས་ནི་རྒྱལ་ཡོངས་ཀྱི་རིག་དངོས་ཞིང་ཆེན་གཙོ་བོ་ཡིན་ཞིང་།རིག་དངོས་ཐོན་ཁུངས་ཕུན་སུམ་ཚོགས་པས། རྒྱལ་ཁབ་ཀྱིས་བོད་ལྗོངས་ཀྱི་རིག་དངོས་ལས་དོན་ལ་མཐོང་ཆེན་གནང་བཞིན་ཡོད། ལོ་ལྔའི་འཆར་གཞི་བཅུ་གཉིས་པའི་སྐབས་སུ།རྒྱལ་ཁབ་ཀྱིས་མ་དངུལ་སྒོར་དུང་ཕྱུར10ལས་བརྒལ་བ་བཏང་སྟེ།བོད་ལྗོངས་ཀྱི་རིག་དངོས་གཙོ་བོའི་སྲུང་སྐྱོང་སྡེ་དག40དང་ས་ཁུལ6གི་རིག་དངོས་བཤམས་སྟོན་ཁང་ལ་སྲུང་སྐྱོང་བྱེད་པར་ཉམས་གསོ་དང་འཛུགས་སྐྲུན་བྱས་ཡོད་ཟེར།2014ལོའི་ལོ་མཇུག་བར་དུ།བོད་ལྗོངས་སུ་བསྡོམས་པས་གནའ་ཤུལ་གྲགས་ཅན་དང་།གནའ་བོའི་བཟོ་སྐྲུན།གནའ་བོའི་བང་སོ་སོགས་འདུས་པའི་སྤོ་འགུལ་བྱེད་མི་ཆོག་པའི་རིག་དངོས་ས་ཚིགས4277ཡོད་པ་དང་།ཐོ་འགོད་བྱས་ཡོད་པའི་རིམ་པ་སོ་སོའི་རིག་དངོས་སྲུང་སྐྱོང་སྡེ་ཁག1424ཡོད།དེའི་ཁྲོད་རྒྱལ་ཡོངས་ཀྱི་རིག་དངོས་གཙོ་བོའི་སྲུང་སྐྱོང་སྡེ་ཁག55ཡོད་ཅིང་། རང་སྐྱོང་ལྗོངས་རིམ་པའི་རིག་དངོས་སྲུང་སྐྱོང་སྡེ་ཁག391ཡོད་དེ། རྫོང་རིམ་པའི་རིག་དངོས་སྲུང་སྐྱོང་སྡེ་ཁག978བཅས་འདུས་ཡོད་པ་རེད།མིག་སྔར། ཚན་རིག་དང་མཐུན་པར“ལོ་ལྔའི་འཆར་གཞི་བཅུ་གསུམ་པའི”རིག་དངོས་སྲུང་སྐྱོང་འཆར་གཞི་བཟོ་འགོད་བྱ་ཆེད།བོད་ལྗོངས་རིག་དངོས་ཅུའུ་ཡིས“ལོ་ལྔའི་འཆར་གཞི་བཅུ་གསུམ་པའི”རྣམ་གྲངས་མཛོད་ཀྱི་གསོག་འཇོག་བྱ་བ་སྤེལ་འགོ་བརྩམས་ཤིང་།དེ་ལས་བོད་ལྗོངས་ཀྱི་རིག་དངོས་བདེ་འཇགས་ལས་གཞི་དང་།བོད་ལྗོངས་ཀྱི་གནའ་བོའི་བཟོ་སྐྲུན་སྲུང་སྐྱོང་ལས་གཞི།བོད་ལྗོངས་ཀྱི་རྒྱལ་གཅེས་གསར་བརྗེ་ལོ་རྒྱུས་རིག་དངོས་སྲུང་སྐྱོང་འགྲེམ་སྟོན་ལས་གཞི།གནའ་རྫས་ཞིབ་བཤེར་སྲུང་སྐྱོང་ལས་གཞི་དང་། རིག་དངོས་ཚན་རྩལ་སྲུང་སྐྱོང་བཅས་ཀྱི་ཕྱོགས་ལ་འབྲེལ་བ་ཡོད་པ་རེད།  །