ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་ཚེས་ཉེར་དྲུག་ཉིན་གྱི་ཕྱི་དྲོར་མགོ་འཛིན་མཛད་དེ་བཞུགས་མོལ་ཚོགས་འདུ་བསྡུས་ནས། ཆེད་མཁས་པ་དང་རིག་གནས་པ། ཁེ་ལས་ལས་རིགས་ཀྱི་མི་སྣ་བཅས་ཀྱི་སྲིད་གཞུང་བྱ་བའི་སྙན་ཞུའི་སྐོར་གྱི་བསམ་འཆར་དང་གྲོས་གཞི་ལ་ཉན།

ཚོགས་ཐོག་ནས་མཐོ་རིམ་སློབ་གྲྭ་ཆེན་མོ་དང་ཚན་རིག་ཞིབ་འཇུག་ལས་ཁུངས། དངུལ་ལོར་ལས་ཁུངས་བཅས་ཀྱི་ཆེད་མཁས་པ་དང་རིག་གནས་པས་དེང་སྐབས་ཀྱི་དཔལ་འབྱོར་གནས་བབ་ཐད་ནས་རང་རང་གི་ལྟ་ཚུལ་བརྗོད། མཉམ་འབྲེལ་དྲ་རྒྱ་དང་གློག་རྡུལ་ཆ་འཕྲིན། ལས་སྐྲུན་དངུལ་གཏོང་། བཟོ་སྐྲུན་རྒྱུ་ཆ་བཅས་ལས་རིགས་ཕྱོགས་ཀྱི་ཁེ་ལས་ཀྱི་འགན་ཁུར་བས་སོ་སོར་ལས་རིགས་འཕེལ་རྒྱས་དང་དཔལ་འབྱོར་འཕེལ་ཕྱོགས་ཐད་ནས་རང་གི་ལྟ་ཚུལ་བརྗོད།

ཆིན་ཧྭ་སློབ་གྲྭ་ཆེན་མོའི་ཝུའུ་ཞའོ་ལིན་དང་དབྱིན་ཧི་དངུལ་འཛིན་གྱི་ཙོ་ཞའོ་ལོས། ཀྲུང་གོ་དངུལ་ཁང་གི་ཚའོ་ཡོན་ཀྲིན་བཅས་ཀྱིས་དངུལ་ལོར་སྲིད་ཇུས་འོས་འཚམ་སྒོས་ཇེ་ལྷོད་དུ་གཏོང་བ་དང་། དངུལ་ལོར་བཅོས་བསྒྱུར་མྱུར་དུ་སྤེལ་བ། ཚོང་ར་བརྟན་འཇགས་སུ་གཏོང་བ་བཅས་སྐོར་གྱི་གནད་དོན་གླེང་སྐབས། ལིས་ཁི་ཆང་གིས་ད་ལོར་ནོར་ཁྲལ་དང་དངུལ་ལོར་སོགས་ཕྱོགས་ཀྱི་བཅོས་བསྒྱུར་བྱ་བ་གཙོ་བོར་བཟུང་སྟེ་བཟང་བོར་སྒྲུབ་དགོས་ལ། སྟོབས་ཤུགས་ཇེ་ཆེར་གཏོང་བ་དང་། གསར་སྐྲུན་ལ་སྐུལ་འདེད་གཏོང་བ། མང་ཚོགས་ལ་ཕན་བདེ་བསྐྲུན་པ། ཉེན་ཁ་སྔོན་འགོག་བྱེད་པ་སོགས་ཐད་ནས་སྔར་ལས་འབད་བརྩོན་བྱེད་དགོས་ཞེས་ནན་གྱིས་གསུངས།

རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཀྲང་ཀའོ་ལིས་དང་ལིག་ཡན་ཏུང་། ཝང་ཡང་། མཱ་ཁེ། རྒྱལ་སྲིད་ཨུ་ཡོན་དབྱང་ཅིན་དང་ཝང་ཡུང་བཅས་བཞུགས་མོལ་ཚོགས་འདུར་ཞུགས།  །