ཞིན་ཧྭ་གསར་འགྱུར་ཁང་ཝུའུ་ལུའུ་མུའུ་ཆི་ནས་ཟླ་བ8པའི་ཚེས3ཉིན་འབྱོར་བའི་གཏམ་གསར།    ཞིན་ཅང་ཡུ་གུར་རིགས་རང་སྐྱོང་ལྗོངས་ཀྱིས་མ་དངུལ་སྒོར་དུང་ཕྱུར3 སྤྱད་དེ་ཉེ་དུས་བསྐོར་བཅོམ་གྱི་ཆེད་ལས་བྱེད་སྒོར་ཞུགས་པའི་མང་ཚོགས་དང་འབྲེལ་ཡོད་མི་སྣར་བྱ་དགའ་སྤྲོད་རྒྱུའི་གྲོས་ཐག་བཅད།   ཚེས3ཉིན་གྱི་ཕྱི་དྲོར་འབྲེལ་ཡོད་སྡེ་ཁག་གིས་མོ་ཡུས་རྫོང་མི་དམངས་ཐང་ཆེན་དུ་མི་ཁྲི་ཞུགས་པའི་ཚོགས་ཆེན་འཚོགས་ཏེ་སྔོན་ཚུད་བསྐོར་བཅོམ་གྱི་ཆེད་ལས་བྱེད་སྒོར་ཞུགས་པའི་ཁག་དང་པོ་ཐོན་པའི་སྔོན་ཐོན་ཅན་གྱི་ཚོགས་པ་དང་མི་སྒེར་ལ་གཟེངས་བསྟོད་གནང་བ་དང་བྱ་དགའ་མ་དངུལ་སྒོར་ཁྲི423སྤྲད་ཡོད།
      ཉེ་བའི་ལོ་ཤས་རིང་།   ཧོ་ཐན་ས་ཁུལ་རིམ་པ་ཁག་གི་ཏང་ཨུ་སྲིད་གཞུང་དང་མི་རིགས་སོ་སོའི་ལས་བྱེད་པ་དང་མང་ཚོགས་ཀྱི་འཇིགས་རྒོལ་ལ་ངོ་རྒོལ་བྱེད་པ་དང་བརྟན་བརླིང་འཚོ་སྲུང་བྱེད་པའི་འདུ་ཤེས་ཇེ་དྲག་ཏུ་ཕྱིན་ཡོད།  ཉེ་དུས་མོ་ཡུས་རྫོང་དུ་སྤེལ་བའི་བསྐོར་བཅོམ་གྱི་ཆེད་ལས་བྱེད་སྒོ་ནང་མི་རིགས་སོ་སོའི་ལས་བྱེད་པ་དང་མང་ཚོགས་ཀྱིས་བྱ་སྤྱོད་དངོས་ཀྱི་ཐོག་ནས་ཞིན་ཅང་གིས་རྩུབ་སྤྱོད་དང་འཇིགས་སྐུལ་གྱི་བྱ་སྤྱོད་ལ་རྡུང་རྡེག་ནན་པོར་རྒྱབ་པའི་བྱ་སྤྱོད་ཁག་ལ་རོགས་སྐྱོར་བྱས་ཤིང་།  སྤྱི་ཚོགས་ཀྱི་སྲོལ་བཟང་དར་སྤེལ་གཏོང་བ།  འཇིགས་སྐུལ་ལ་ངོ་རྒོལ་བྱེད་པ་དང་བརྟན་བརླིང་ལ་འཚོ་སྲུང་བྱེད་པའི་རྨང་གཞི་བཟང་པོ་ཡོད་པར་མཚོན་ཡོད།   མི་རིགས་སོ་སོའི་ལས་བྱེད་པ་དང་མང་ཚོགས་ཀྱིས་བློ་བརྟན་འགྱུར་མེད་ཀྱིས་འཇིགས་སྐུལ་ཅན་དང་འཐབ་རྩོད་བྱ་རྒྱུའི་ཡིད་ཆེས་དང་སྤྱི་ཚོགས་ཡུན་རིང་བདེ་འགོད་ཡོང་བར་འཚོ་སྲུང་བྱ་རྒྱུའི་ཆོད་སེམས་སྟོན་ཡོད་པ་རེད།
       ཚོགས་ཆེན་ཐོག་འཐབ་ཕྱོགས་སོ་སོའི་རྒྱ་ཆེ་བའི་གུང་ཁྲན་ཏང་ཡོན་དང་།  མི་རིགས་སོ་སོའི་ལས་བྱེད་པ་དང་མང་ཚོགས་ལ་གཟེངས་བསྟོད་ཐོབ་པའི་སྔོན་ཐོན་གྱི་ཚོགས་པ་དང་མི་སྒེར་དེ་དག་མིག་དཔེར་བྱས་ཏེ་འཇིགས་སྐུལ་གྱིས་བྱས་ཉེས་བསགས་པར་རྡུང་རྡེག་གཏོང་བ་དང་སྤྱི་ཚོགས་ཉེན་མེད་བདེ་འཇགས་ཡོང་བར་སྲུང་སྐྱོབ་བྱ་རྒྱུའི་ཟངས་གྱང་ལྕགས་རྩིག་བསྐྲུན་དགོས་པའི་འབོད་སྐུལ་བཏང་བ་རེད།