ཞིན་ཧྭ་གསར་འགྱུར་ཁང་པེ་ཅིན་ནས་འབྱོར་བའི་གཏམ་གསར།ཉིན་ཤས་གོང་ཀྲུང་དབྱང་རྩ་འཛུགས་པུའུ་ཡིས༼ཝང་ཧྲེང་དང་ཡུས་ཧེ་ཧོ།པི་ཧྲི་ཞང་།ཝུན་ཚའོ་རུང་བཅས་བློ་མཐུན་བཞི་ལ་རྒྱལ་ཡོངས་ཀྱི་ཕུལ་བྱུང་གུང་ཁྲན་ཏང་ཡོན་གྱི་མཚན་སྙན་རྗེས་སྤྲོད་གནང་རྒྱུའི་སྐོར་གྱི་ཆོད་དོན༽པར་དུ་བསྐྲུན་ནས་འགྲེམ་སྤེལ་བྱས་པའི་ནང་དོན་གཙོ་བོ་གཤམ་གསལ།   ཏང་གི་མང་ཚོགས་ལམ་ཕྱོགས་སློབ་གསོ་ལག་ལེན་གྱི་བྱེད་སྒོ་སྤེལ་བ་ནས་བཟུང་།ས་གནས་ཁག་ནས་དམངས་ཀྱི་དོན་དུ་བྱ་བ་དངོས་སྒྲུབ་བྱས་ཤིང་སྤྱོད་གཙང་ཡིན་པའི་ཏང་ཡོན་དང་ལས་བྱེད་པའི་སྔོན་ཐོན་དཔེར་འོས་ཚན་པ་ཅིག་བྱུང་དང་འབྱུང་བཞིན་ཡོད་པ་རེད།དེའི་ནང་ཝང་ཧྲེང་དང་ཡུས་ཧེ་ཧོ།པི་ཧྲི་ཞང་།ཝུན་ཚའོ་རུང་བཅས་བློ་མཐུན་བཞི་ནི་ཕུལ་བྱུང་གི་འཐུས་མི་ཡིན་ཞིང་།ཁོང་རྣམ་པས་རང་སྲོག་བློས་བཏང་བྱས་ནས་མང་ཚོགས་ལམ་ཕྱོགས་ལག་ལེན་བསྟར་ཡོད་པས་དུས་རབས་གསར་པའི་གུང་ཁྲན་ཏང་མིའི་མིག་དཔེ་ཡིན་པ་རེད།   སྔོན་ཐོན་ལ་གཟེངས་བསྟོད་དང་སྤྱོད་བཟང་དར་སྤེལ་གཏོང་བ་དང་།རྒྱ་ཆེའི་ཏང་ཡོན་དང་ལས་བྱེད་པར་སེམས་སུ་ཕུགས་འདུན་བཅངས་ཤིང་དད་སེམས་བརྟན་པོར་ཡོང་བ།མི་དམངས་ལ་ཞབས་འདེགས་དང་བྱས་རྗེས་འཇོག་རྒྱུ་མི་བརྗེད་ཅིང་།ཁྱོན་ཡོངས་ནས་འབྱོར་འབྲིང་སྤྱི་ཚོགས་སྐྲུན་ཐུབ་པ་དང་།སྤྱི་ཚོགས་རིང་ལུགས་དེང་རབས་ཅན་ལ་སྐུལ་འདེད་ཇེ་མགྱོགས་སུ་གཏོང་བའི་འཕེལ་རིམ་ཁྲོད་དུ་བྱས་རྗེས་དེ་བས་གསར་ཞིང་ཆེ་བ་འཇོག་པའི་ཆེད་དུ་ཀྲུང་དབྱང་འགོ་ཁྲིད་ཀྱིས་མོས་མཐུན་གནང་བར་ལྟར།ཀྲུང་དབྱང་རྩ་འཛུགས་པུའུ་ཡིས་བློ་མཐུན་ཝང་ཧྲེང་དང་ཡུས་ཧེ་ཧོ།པི་ཧྲེ་ཞང་།ཝུན་ཚའོ་རུང་བཅས་བཞི་ལ་རྒྱལ་ཡོངས་ཀྱི་ཕུལ་བྱུང་གི་གུང་ཁྲན་ཏང་ཡོན་གྱི་མཚན་སྙན་རྗེས་སྤྲོད་གནང་རྒྱུའི་གཏན་འབེབས་བྱས་པ་རེད།    ཀྲུང་དབྱང་རྩ་འཛུགས་པུའུ་ཡིས་རྒྱལ་ཡོངས་ཀྱི་འཐབ་ཕྱོགས་སོ་སོའི་ཐོག་གི་གུང་ཁྲན་ཏང་ཡོན་དང་རྒྱ་ཆེ་བའི་ལས་བྱེད་པས་ཁོང་རྣམ་པ་བཞིའི་མཛད་རྗེས་ལ་སློབ་སྦྱོང་བྱེད་དགོས་པའི་འབོད་སྐུལ་གནང་བ་རེད།