ཉེ་ཆར།ཁྲེན་ཏུའུ་ནས་ཞི་ཨན་བར་གྱི་ལྕགས་ལམ་གྱི་འགྲུལ་སྐྱེལ་ཆེད་སྤྱོད་ལྕགས་ལམ་དང་།ཁྲེན་ཏུའུ་ནས་ཁྲུང་ཆིང་བར་གྱི་ལྕགས་ལམ་གྱི་འགྲུལ་སྐྱེལ་ཆེད་སྤྱོད་ལྕགས་ལམ།ཁྲེན་ཏུའུ་ནས་གཡག་རྔ་བར་གྱི་ལྕགས་ལམ་གྱི་འགྲུལ་སྐྱེལ་ཆེད་སྤྱོད་ལྕགས་ལམ་སོགས་ལྕགས་ལམ་འཛུགས་སྐྲུན་གྱི་རྣམ་གྲངས་བདུན་དེ་ཁྲེན་ཏུའུ་ལ་ལས་འགོ་ཚུགས་རྒྱུའི་མཛད་སྒོ་སྤེལ་བ་རེད།རྣམ་གྲངས་དེ་དག་ལ་མ་དངུལ་འཇོག་གྲངས་བསྡོམས་འབོར་སྒོར་དུང་ཕྱུར་སྟོང་ལས་བརྒལ་བ་རེད།
གསར་དུ་བསྐྲུན་པའི་ཁྲེང་ཏུའུ་ནས་ཞི་ཨན་བར་གྱི་ལྕགས་ལམ་གྱི་གྲུལ་སྐྱེལ་ཆེད་སྤྱོད་ལྕགས་ལམ་དེ་ནི་བྱང་ཕྱོགས་ཞི་ཨན་ནས་འགོ་ཚུགས་ཏེ་ཆིང་ལིང་རི་བོ་དང་ཏ་པའེ་ཧྲན་རི་བོ་དང་ཅང་ཡུའུ་བརྒྱུད་ནས་འཛུགས་སྐྲུན་བྱེད་བཞིན་པའི་ཁྲེང་ཏུའུ་ནས་མེན་དབྱང་དང་ལུའོ་ཧྲན་བར་གྱི་འགྲུལ་སྐྱེལ་ཆེད་སྤྱོད་ལྕགས་ལམ་ལ་མཐུད་ཅིང་།ཆུ་ཚོད་གཅིག་ལ་སྤྱི་ལེ250རྒྱུག་ཐུབ་པ་རེད།ལྕགས་ལམ་དེའི་སྤྱི་རིང་ཚད་སྤྱི་ལེ510ཡོད་པར་བབས་ཚུགས12བཙུགས་ཡོད་པ་རེད།ལྕགས་ལམ་དེ་བསྐྲུན་རྗེས་སི་ཁྲོན་ས་ཁུལ་ནས་བྱང་རྒྱུད་ས་ཁུལ་ལ་མྱུར་བགྲོད་འགྲུལ་སྐྱེལ་བྱེད་སའི་ལྕགས་ལམ་གཙོ་བོར་གྱུར་པར་མ་ཟད།ཡུན་ནན་དང་ཀུའེ་ཀྲོའུ།པེ་པུའུ་ཝན་ས་ཁུལ་དུ་མྱུར་བགྲོད་འགྲུལ་སྐྱེལ་བྱེད་སའི་ལྕགས་ལམ་གཙོ་བོར་གྱུར་རྒྱུ་རེད།
ཁྲེང་ཏུའུ་ནས་ཁྲུང་ཆིང་བར་གྱི་ལྕགས་ལམ་གྱི་འགྲུལ་སྐྱེལ་ཆེད་སྤྱོད་ལྕགས་ལམ་མགྱོགས་ཚད་ནི་ཆུ་ཚོད་གཅིག་ལ་སྤྱི་ལེ350རྒྱུག་ཐུབ་པ་རེད།སྤྱི་རིང་ཚད་སྤྱི་ལེ308ཡོད་པ་རེད།ནུབ་ཕྱོགས་ཀྱི་བབས་ཚུགས་ནི་ཁྲེང་ཏུའུ་ཡི་ཤར་ཕྱོགས་མེ་འཁོར་འབབ་ཚུགས་ལ་མཐུད་ནས་ཁྲུང་ཆིང་ཕྱོགས་སུ་བསྲིངས་པ་རེད།འཛུགས་སྐྲུན་བྱེད་ཡུན་ལོ4ཡིན་པ་རེད།
ཤེས་རྟོགས་བྱུང་བར་གཞིགས་ན།ལྕགས་ལམ་འཛུགས་སྐྲུན་གྱི་རྣམ་གྲངས7གྱི་ནང་ད་དུང་ཁྲེང་ཏུའུ་ལྕགས་ལམ་གྱི་བཀོད་གཏོང་ཁང་དང་ནུས་པ་མང་ལྡན་གྱི་མེ་འཁོར་ཉམས་གསོ་བྱེད་ས།འགྲུལ་སྐྱེལ་ཆེད་སྤྱོད་ལྕགས་ལམ་ཕྱོགས་བསྡུས་རང་བཞིན་གྱི་ཉམས་གསོ་བྱེད་ས་བཅས་འདུས་པ་རེད།
ཁྲེང་ཏུའུ་ལྕགས་ལམ་ཅུས་ཀྱི་ཅུས་ཀྲང་ཝུའུ་ཡུང་གིས་ངོ་སྤྲོད་བྱས་རྒྱུར།ལྕགས་ལམ་འཛུགས་སྐྲུན་གྱི་རྣམ་གྲངས7དེ་མཇུག་བསྒྲིལ་རྗེས།མིག་སྔར་སི་ཁྲོན་འགྲུལ་སྐྱེལ་ལྕགས་ལམ་ནུབ་བྱང་དང་ལྷོ་ནུབ་ས་ཁུལ་ལ་སྦྲེལ་བའི་རྣམ་པ་ཆེས་ཆེར་ལེགས་བཅོས་བྱུང་ནས་ཁྲེང་ཏུའུ་ནས་ཞི་ཨན་བར་ཆུ་ཚོད་གཉིས་ཀྱི་སླེབས་ཐུབ་པ་དང་།ཁྲེང་ཏུའུ་ནས་ཁྲུང་ཆིང་བར་ཆུ་ཚོད་གཅིག་གི་སླེབས་ཐུབ་པ།ཁྲེང་ཏུའུ་ནས་ཡ་ཨན་བར་ཆུ་ཚོད་ཕྱེད་ཀའི་སླེབས་ཐུབ་པས་ནུབ་རྒྱུད་གསར་སྦོལ་ཆེན་པོ་ཇེ་མགྱོགས་སུ་གཏོང་བར་དོན་སྙིང་གལ་ཆེན་ལྡན་པ་རེད།
ཁྲོན་བོད་ལྕགས་ལམ་གྱི་ཁྲེང་ཏུའུ་ནས་དར་མདོ་བར་གྱི་ལྕགས་ལམ་དུམ་བུ་ནི་གྲོང་ཁྱེར་བར་དུ་འགྲུལ་སྐྱེལ་བྱེད་སའི་ལྕགས་ལམ་གཙོ་བོ་ཡིན་པ་དང་ཆབས་ཅིག   དངོས་ཟོག་སྐྱེལ་འདྲེན་གཅིག་ལྕོགས་བྱེད་སའི་ལྕགས་ལམ་ཞིག་བྱེད་རྒྱུ་ཡིན་པ་རེད།ཁྲེང་ཏུའུ་ནས་ཡ་ཨན་བར་གྱི་ལྕགས་ལམ་གྱི་དུམ་བུས་གྲོང་ཁྱེར་སྦྲེལ་སའི་ནུས་པ་འདོན་རྒྱུ་ཡིན་པ་རེད།ལྕགས་ལམ་བརྒྱུད་ཡུལ་ནི་ཀྲུང་གོ་ལྕགས་ལམ་ཅུས་ཀྱི་ཞིབ་འཇུག་ཁང་གཉིས་པས་ཞིབ་འཇུག་བྱས་ནས་འཚམས་སྦྱོར་བྱས་པར་གཞིགས་ན།ཁྲོན་བོད་ལྕགས་ལམ་གྱི་འགྲོ་ཕྱོགས་ནི་ཁྲེང་ཏུའུ་ཡི་ནུབ་ཕྱོགས་མེ་འཁོར་བབས་ཚུགས་ནས་འགོ་ཚུགས་ཏེ་ཝུན་ཅང་།ཁྲུང་ཀྲོའུ།ཏ་པ།ཆང་ལེན།མིང་ཧྲན།ཡ་ཨན།ཐེན་ཆོན།ལྕགས་ཟམ་ནས་དར་མདོར་བརྒྱུད་པ་རེད།