རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་གཙོ་འགན་བཞེས་ཏེ་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་འཚོགས་ཏེ།འཛད་སྤྱོད་རྒྱ་བསྐྱེད་དང་རིམ་སྤར་ལ་སྐུལ་འདེད་གཏོང་བར་བཀོད་སྒྲིག་བྱས་ཤིང་།དཔལ་འབྱོར་གྱི་སྤུས་ཀ་མཐོ་བ་དང་ཕན་འབྲས་འཕར་བར་སྐུལ་སྤེལ་བྱས།སྔར་ལྷག་གིས་དངུལ་ཁང་གི་བྱང་བུ་ཞིབ་རྩིས་རྒྱག་པའི་ཁྲོམ་ར་གློད་པ་དང་ཚད་ལྡན་དུ་གཏང་རྒྱུའི་ཐག་གཅོད་བྱས་ནས་དངུལ་ལོར་གྱིས་རྒྱལ་ཁབ་ཕྱི་ནང་ཀུན་ལ་གསར་སྦོལ་བྱེད་ཚད་མཐོ་རུ་གཏོང་ཐུབ་པ་བྱ་རྒྱུ།དགེ་བའི་བྱ་གཞག་འཕེལ་རྒྱས་གཏོང་བའི་བྱེད་ཐབས་གཏན་འཁེལ་བྱས་ཏེ་དབུལ་སྐྱོར་རྒུད་སྐྱོབ་བྱེད་མཁན་དེ་ལས་མང་བ་འདུ་འཛོམས་བྱེད་ཐུབ་པ་བྱ་རྒྱུ་རེད།
    གྲོས་ཚོགས་ཐོག་ཁྱབ་ཁོངས་ཆེན་པོ་དྲུག་གི་འཛད་སྤྱོད་ལ་སྐུལ་འདེད་གཙོ་ཆེར་བྱ་དགོས་པའི་བླང་བྱ་བཏོན་པ་སྟེ།གཅིག་ནི་སྒུལ་འཁྱེར་འབྲེལ་དྲྭ་དང་དངོས་འབྲེལ་དྲ་བ་སོགས་ཀྱི་ཆ་འཕྲིན་འཛད་སྤྱོད་རྒྱ་བསྐྱེད་བྱས་ཏེ་ཡངས་ལམ་གྱི་མྱུར་ཚད་མཐོ་རུ་བཏང་བ་དང་དྲྭ་ཉོས་བྱ་བ་འཕེལ་རྒྱས་དང་ཞིང་སྡེའི་གློག་རྡུལ་ཚོང་དོན་སྡེབ་སྐྱེལ་ལ་རྒྱབ་སྐྱོར་གཏང་དགོས།བདེ་ཐང་སྨན་བཅོས་དང་ཁེ་ལས་ལ་ལྟ་སྐུལ་དོ་དམ་བྱེད་པ་སོགས་གཞི་གྲངས་ཆེན་པོའི་བེད་སྤྱོད་བྱ་རྒྱུ་ཇེ་མགྱོ གས་སུ་གཏང་དགོས། གཉིས་ནི་ཉེན་མེད་འཛད་སྤྱོད་ལ་སྐུལ་འདེད་བྱས་ནས་ནུས་བསྲི་ཐོན་རྫས་ཁྱབ་གདལ་གཏོང་བ་དང་གྲོང་ཁྱེར་དུ་རླངས་འཁོར་འཇོག་ས་དང་ནུས་ཁུངས་གསར་པའི་རླངས་འཁོར་གྱི་གློག་གསོག་སའི་སྒྲིག་ཆས་ཅུང་མང་བ་བསྐྲུན་པར་བྱ་དགའ་སྤྲོད་དགོས།གསུམ་ནི་སྡོད་ཁང་གི་འཛད་སྤྱོད་བརྟན་བརླིང་ཡོང་བ་བྱས་ནས་འགན་སྲུང་སྡོད་ཁང་བསྐྲུན་ཤུགས་ཆེ་རུ་བཏང་བ་དང་སྤྱི་པའི་གསོག་དངུལ་བླངས་ནས་ཁང་གླ་སྤྲད་པའི་ཆ་རྐྱེན་ལྷོད་དུ་གཏང་དགོས།བཞི་ནི་ལྗོངས་རྒྱུ་སྤྲོ་གསེང་གི་འཛད་སྤྱོད་རིམ་པ་སྤར་ནས་ལས་བཟོ་པས་གླ་ཕོགས་ཁྱེར་ནས་གུང་སེང་ལ་ངལ་གསོ་བྱེད་པའི་ལམ་ལུགས་དོན་འཁྱོལ་བྱས་པ་དང་གྲོང་སྡེ་ལྗོངས་རྒྱུས་དམངས་ཕྱུག་ཡོང་བ་སོགས་ཀྱི་ལས་གྲྭ་ལག་བསྟར་བྱས་ཤིང་།རང་འཁོར་བཏང་བ་དང་འཁོར་ཁང་སྒར་ས་འཛུགས་སྐྲུན་བྱ་དགོས།ལྔ་ནི་སློབ་གསོ་རིག་གནས་དང་ལུས་རྩལ་གྱི་འཛད་སྤྱོད་བྱེད་ཚད་མཐོ་འཕར་བཏང་ནས་དམངས་གཉེར་སློབ་གྲྭའི་སློབ་ཡོན་བསྡུ་བའི་སྲིད་ཇུས་འཐུས་ཚང་གཏོང་བ་དང་རྒྱལ་ཁབ་ཕྱི་ནང་གིས་མཉམ་སྒྲུབ་སློབ་གཉེར་བྱེད་རྒྱུ་རྒྱ་བསྐྱེད་གཏང་དགོས།དྲུག་ནི་རྒན་གསོ་བདེ་ཐང་གི་ཁྱིམ་སྲིད་འཛད་སྤྱོད་བྱེད་པར་སྐུལ་མ་གཏོང་བ།ཐོན་ལས་ཐེབས་རྩ་བཙུགས་པ་སོགས་རྒན་གསོ་ཞབས་ཞུ་འཕེལ་རྒྱས་གཏོང་བར་འཚོལ་ཞིབ་བྱ་དགོས།དམངས་ཁྲོད་ཀྱི་མ་རྩ་རྒན་གསོ་ཞབས་ཞུར་འཇོག་པར་རྒྱབ་སྐྱོར་བྱེད་པའི་ཁྲལ་བསྡུ་སྲིད་ཇུས་གཏན་འཁེལ་བྱ་དགོས། དམངས་གཉེར་སྨན་བཅོས་ལས་ཁུངས་ཀྱིས་ཆུ་དང་གློགདྲོད་བཅས་སྤྱོད་པའི་རིན་གོང་དེ་སྤྱི་གཉེར་ལས་ཁུངས་དང་རིན་པ་འདྲ་མཚུངས་ཡིན་པ་བྱ་དགོས།ཐོན་རྫས་དེ་བས་སྤུས་དག་དང་ཞབས་ཞུ་དེ་ལས་བཟང་བ་བྱས་ནས་མི་རྣམས་ལ་འཛད་སྤྱོད་སེམས་ཁྲལ་མེད་པ་དང་འཚོ་བར་ལོངས་སུ་སྤྱོད་འཇུག་དགོས་པ་བཅས་སོ།།