ཀྲུང་གོ་བོད་ཀྱི་དྲ་བའི་འཕྲིན། མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་བོད་སྨན་ཁང་གིས་སྨན་བཅོས་ཁོར་ཡུག་བཟང་པོ་ཞིག་བསྐྲུན་ཆེད། སྨན་ཁང་གི་བསམ་པའི་དཔལ་ཡོན་ཆུ་ཚད་མཐོར་འདེགས་སུ་བཏང་ནས། བྱ་དགའ་སྟེར་བ་དང་ཆད་པ་གཅོད་པའི་ལམ་ལུགས་ཀྱི་བྱེད་ཐབས་སྤྱད་ནས་སྨན་ཁང་གི་ཚན་ཁག་སོ་སོའི་སྨན་བཅོས་རྒྱུ་སྤུས་དང་། སྨན་བཅོས་བདེ་འཇགས་ལ་ཁག་ཐེག་བཟང་པོ་བྱས་ཏེ་སྨན་ཁང་གི་དོ་དམ་ཕྱོགས་ཡོངས་ནས་མངོན་གསལ་གྱིས་མཐོར་འདེགས་བྱས།
ཟླ་དང་པོའི་ཚེས་དྲུག་ཉིན་གསར་འགོད་པས་རྒྱུས་ལོན་བྱུང་བ་ལྟར་ན། མཚོ་ལྷོ་ཁུལ་བོད་སྨན་ཁང་གིས་ཕྱོགས་ཡོངས་ནས་སྨན་བཅོས་བདེ་འཇགས་མཐོར་འདེགས་སུ་གཏོང་བའི་གོ་རིམ་ཁྲོད། ཚན་ཁག་སོ་སོའི་ཁྲོད་གནས་པའི་གནད་དོན་ཐག་གཅོད་ནན་མོ་བྱེད་པ་དང་། ཕྱོགས་བསྡུས་ཀྱི་གྲུབ་འབྲས་བཟང་བའི་ཚན་ཁག་ལ་བྱ་དགའ་སྟེར་བ། སྒྲིག་ལམ་གྱི་ཕྱོགས་ནས། ལས་ཚོགས་ལ་རྗེས་སུ་ལུས་པ་དང་། ལས་ཚོགས་མ་གྲོལ་གོང་ཕྱིར་འགྲོ་བའི་སྣང་ཚུལ་ཐག་གཅོད་ནན་མོ་བྱེད་པ། སྨན་བཅོས་བདེ་འཇགས་ཀྱི་ཕྱོགས་ནས། ནད་པར་མི་འཚམ་པའི་སྨན་སྟེར་བ་སོགས་ཀྱི་སྣང་ཚུལ་ལ་ཆད་པ་གཅོད་པ་དང་ཐག་གཅོད་ནན་མོ་བྱེད་པ་བཅས་བྱས། དེ་དང་མཉམ་དུ། སྨན་པ་དང་ནད་གཡོག་མ་ཚོས་འཕྲོད་བསྟེན་བཅའ་ཁྲིམས་རྩ་ཁྲིམས་ཀྱི་ཕྱོགས་ལ་སློབ་སྦྱོང་བཟང་པོ་བྱས་ཏེ། སྨན་པ་དང་ནད་གཡོག་མའི་འགན་འཁུར་འདུ་ཤེས་ཇེ་དྲག་ཏུ་བཏང་ནས་སྨན་བཅོས་ཀྱི་སྤྱོད་ཚུལ་ཚད་ལྡན་དུ་བཏང་བས། སྨན་ཁང་གི་བསམ་པའི་དཔལ་ཡོན་འཛུགས་སྐྲུན་ཐད་མཐོར་འདེགས་ཆེན་པོ་བྱུང་།  །