ཉེ་ལམ།  ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཅུའུ་ཡིས་བདེ་ཆེན་ཁུལ་གྱི་ལས་ཞུགས་རྣམ་པའི་དོན་དངོས་ལ་དམིགས་ཏེ།  ལས་བཟོ་བ་མཁོ་བའི་ལས་ཁུངས་དང་མཉམ་དུ་དཀྱིལ་འཁོར་ཐང་ཆེན་དུ“ལས་གནས་འདོན་སྤྲོད་བྱེད་པའི་སྟེགས་བུ་སྐྲུན་ནས།  སྤོ་བསྒྱུར་ལས་ཞུགས་ལ་སྐུལ་འདེད་བྱེད་པ”ཞེས་བརྗོད་དོན་ཡིན་པའི་ཆེད་དོན་གདན་ཞུ་ཚོགས་འདུ་སྤེལ།

 བྱ་འགུལ་ལས་སློབ་གྲྭ་ཆེ་འབྲིང་གི་མཐར་ཕྱིན་སློབ་མ་དང་ལས་ཤོར་མི་སྣ།  ཞིང་སྡེའི་རྩོལ་ལས་ལྷག་མ་སོགས་ཀྱི་ལས་ཞུགས་གནད་དོན་ཐག་གཅོད་བྱེད་པ་གཙོ་བྱས་ཏེ།  སྔར་ལས་ལྷག་པར་སྤྱི་སྤྱོད་ལས་ཞུགས་ཞབས་ཞུའི་ནུས་ཤུགས་དང་ཆུ་ཚད་མཐོར་འདེགས་བྱེད་རྒྱུ་དང་།  ཁེ་ལས་དང་གཞི་རིམ་དུ་ཟབ་ཞུགས་བྱས་ནས་དྲིལ་བསྒྲགས་བྱ་འགུལ་རྒྱ་ཆེར་སྤེལ་བ་དང་ཚོང་རར་ལས་གནས་མཁོ་བའི་བརྟག་དཔྱད་སྤེལ་བ་བཅས་བསྡོམས་པས་ལས་ཞུགས་རོགས་སྐྱོར་བྱང་བུ2500ལྷག་འགྲེམ་སྤེལ་བྱས།  བདེ་ཆེན་ཁུལ་དང་རྫོང་རིམ་པའི་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཅུའུ་ཡིས་འབད་པ་བྱས་འོག  སེམས་ཀྱི་ཉི་ཟླ་རྫོང་དུ་ཞིན་རུང་རླངས་འཁོར་བཟོ་ཚོང་ཀུང་ཟི་དང་གཡུ་འབྲུག་སྐྱེ་དངོས་ཀུང་ཟི།  ཐེན་ཅེ་ཧྲེན་ཁྲོན་གསོལ་ཁང་ཆེན་མོ་སོགས་ལས་གནས་མཁོ་བའི་ལས་ཁུངས46རྩ་འཛུགས་བྱས་ནས།  གནས་སྐོར་དང་ཞབས་ཞུ།  ཚོང་གཉེར་བ་དང་གཞུང་ལས་ཁང་གི་དྲུང་ཡིག་བཅས་ལས་གནས860འདོན་སྤྲོད་བྱས། 

བྱ་འགུལ་སྤེལ་བའི་གོ་རིང་ཁྲོད་དྲིལ་བསྒྲགས་ཡིག་ཆ2800ལྷག་འགྲེམ་སྤེལ་བྱས་པ་མ་ཟད།  སྨྱན་བྱད་སོ་སོར་བརྟེན་ནས་ཁེ་ལས་དང་ལས་ཞུགས་མཁོ་བའི་མི་སྣ་རྣམས་ལ་ཕྱོགས་ཡོངས་ནས་ལས་ཞུགས་རོགས་སྐྱོར་སྲིད་ཇུས་དྲིལ་བསྒྲགས་བྱས་པ་དང་།  ཁོ་ཚོར་སྲིད་གཞུང་གིས་ལས་ཞུགས་ཐད་ཀྱི་སྲིད་ཇུས་དང་བྱེད་ཐབས་རྒྱུས་ལོན་བྱེད་པར་རོགས་འདེགས་བྱས།  །