སྤྱི་ཟླ3པའི་ཚེས10ཉིན་གྱི་ཕྱི་དྲོ། ཡུན་ནན་འཐུས་མི་ཚོགས་པའི་ཚོགས་ཆུང་གྲོས་བསྡུར་ཚོགས་འདུའི་ཐོག་འཐུས་མི་ཆིང་ལིས་ཡུན་གྱིས་ང་རང་གཞི་རིམ་དུ་ལས་ཀ་བྱེད་ཀྱི་ཡོད། རྒྱུན་དུ་གྲངས་ཉུང་མི་རིགས་ཀྱི་མང་ཚོགས་ཁག་ཅིག་གིས་ཁྲིམས་ཁང་དུ་ཞུ་གཏུག་རྒྱག་པར་ཡོང་གི་ཡོད་པ་དང་། སྤྱི་སྐད་ཡག་པོ་མི་ཤེས་པའི་ཁར་ཞུ་གཏུག་ཡི་གེ་འབྲི་ཐུབ་ཀྱི་མེད་པས་གནད་དོན་དེ་གང་འདྲ་བྱེད་དགོས་སམ་ཞེས་པའི་སྐད་ཆ་དེར་ཚོགས་རར་ཡོད་པའི་འཐུས་མིས་དོ་ཁུར་ཆེན་པོ་བྱས་པ་དང་། ཚང་མས་འཐུས་མིའི་བསམ་འཆར་ཉན་མཁན་ཆེས་མཐོའི་མི་དམངས་ཁྲིམས་ཁང་གི་ཁྲིམས་དཔོན་ཧན་ཝེ་ལ་བལྟས་ནས་བསྡད་པ་རེད། ཁོང་གིས་ཁྱེད་ཀྱིས་བཤད་པའི་གནད་དོན་དེ་མི་རིགས་ས་ཁུལ་མི་ཉུང་བ་ཞིག་ཏུ་ཚད་གཞི་མི་འདྲ་བ་གནས་ཡོད། གལ་ཏེ་རང་ཉིད་ཀྱིས་ཞུ་གཏུག་ཡི་གེ་འབྲི་མི་ཤེས་ན་ཐད་ཀར་གྱོད་གཞི་ཐོ་འགོད་ཁང་དུ་ངག་ཐོག་ནས་བཤད་ཆོག་ལ་ཁྲིམས་ལུགས་ཀྱི་རོགས་སྐྱོར་རེ་ཞུ་བྱས་ཆོག་པ་དང་། ཁྲིམས་འཛིན་ཅུད་ཀྱིས་གཏན་འཁེལ་བྱས་པའི་ཁྲིམས་རྩོད་པར་ཞུ་གཏུག་ཡི་གེ་འབྲི་རོགས་ཞུས་ན་འགྲིག་ཅེས་གསུངས་པ་དང་།

ཧན་ཝེ་ཡིས་དོན་དངོས་ཐོག་གྲངས་ཉུང་མི་རིགས་ཀྱི་མང་ཚོགས་ཙམ་མ་ཟད། མི་རིགས་ས་ཁུལ་གྱི་གཞི་རིམ་ཁྲིམས་ཁང་གིས་ལས་དོན་སྒྲུབ་པའི་ཁྲོད་དཀའ་ངལ་མི་ཉུང་བ་ཞིག་ཐག་གཅོད་བྱེད་དགོས་ཀྱི་ཡོད་པ་སྟེ། དཔེར་ན། སྐད་ཡིག་གཉིས་ཤེས་མཁན་ཁྲིམས་དཔོན་གསོ་སྐྱོང་བྱེད་དགོས་པ་དང་། ཁྲིམས་རའི་ཐོག་གྲངས་ཉུང་མི་རིགས་མང་ཚོགས་ལ་ཡིག་སྒྱུར་མཁོ་འདོན་བྱེད་དགོས་པ་སོགས་ཀྱི་གནས་ཚུལ་ཡོད་ཅེས་གསུངས་པ་རེད།

རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི། ཤི་ཧྲོང་པན་ན་ཏའེ་རིགས་རང་སྐྱོང་ཁུལ་ཨུ་ཡོན་ལྷན་ཁང་གི་ཧྲུའུ་ཅི་གཞོན་པ་ལའོ་ཧོང་ཅང་གིས་ཤི་ཧྲོང་པན་ནར་སྐད་ཡིག་གཉིས་ཤེས་མཁན་ཁྲིམས་དཔོན་འདང་གི་མེད་པ་དང་། གསོ་སྐྱོང་བྱ་རྒྱུར་དཀའ་ངལ་ཆེན་པོ་ཡོད། ན་ནིང་ང་ཚོས་གཙོ་གནད་ཐོག་མི་བཅུ་གྲངས་གསོ་སྐྱོང་བྱས་ཡོད། འོན་ཀྱང་མཐའ་མཇུག་ཏུ་ཁྲིམས་འཛིན་ཡིག་རྒྱུགས་ལོན་མཁན་མི་གཉིས་ལས་བྱུང་མེད་ཅེས་གསུངས་པ་རེད། འཐུས་མི་ཀའོ་ཡན་གྱིས་གྲངས་ཉུང་མི་རིགས་ཀྱི་ཁྲིམས་དཔོན་ལ་བཟང་ཆ་ཆེན་པོ་ལྡན་ཡོད། ཁོང་ཚོས་མི་རིགས་ཀྱི་སྐད་ཡིག་ཤེས་པ་མ་ཟད། མི་རིགས་ས་ཁུལ་གྱི་དོན་དངོས་གནས་ཚུལ་ཤེས་རྟོགས་ཐུབ་ཀྱི་ཡོད་པས། གྲངས་ཉུང་མི་རིགས་ཀྱི་ཁྲིམས་འཛིན་ཡིག་རྒྱུགས་ཚད་གཞི་དམའ་རུ་གཏོང་རྒྱུར་བསམ་གཞིགས་བྱེད་དགོས་མིན་ཐད་ཧན་ཝེ་ཡིས་འཐུས་མི་ཚོའི་བསམ་འཆར་དང་གྲོས་འགོ་ནི་ལུགས་དང་མཐུན་པ་ཞིག་ཡིན། དོན་དངོས་ཐོག་ད་ཆ་སྐད་ཡིག་གཉིས་ཤེས་མཁན་ཁྲིམས་དཔོན་མི་འདང་བའི་ས་ཆ་ནི་མི་འབོར་ཅུང་ཉུང་བའི་མི་རིགས་ཁུལ་དུ་ཡིན་པས། ཕྱིན་ཆད་ཀྱི་གསོ་སྐྱོང་ལས་དོན་ཐད་དམིགས་སའི་རང་བཞིན་ཡོད་པའི་སྒོ་ནས་གཉེར་རྒྱུར་བསམ་གཞིག་བྱེད་ཆོག་ཅེས་གསུངས་པ་རེད།  །