ཧུའུ་ཅིན་ཐའོ་ཡིས་སྐབས་བཅུ་བདུན་པའི་ཀྲུང་དབྱང་ཨུ་ཡོན་ལྷན་ཁང་གི་ཚབ་ཞུས་ནས་ཚོགས་ཆེན་ལ་སྙན་སེང་ཞུས།ཝུའུ་པང་གོས་ཚོགས་ཆེན་གྱི་གཙོ་འགན་བཞེས།ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ11པའི་ཚེས8ཉིན་འབྱོར་བའི་གཏམ་གསར།འཛམ་གླིང་ཐོག་གི་མི་ཚང་མས་མཐོང་ཆེན་བྱེད་པའི་ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་བཅོ་བརྒྱད་པ་དེ་ཚེས8ཉིན་གྱི་སྔ་དྲོར་མི་དམངས་ཚོགས་ཁང་ཆེན་མོར་འཚོགས་པ་རེད།ཧུའུ་ཅིན་ཐའོ་ཡིས་སྐབས་བཅུ་བདུན་པའི་ཀྲུང་དབྱང་ཨུ་ཡོན་ལྷན་ཁང་གི་ཚབ་ཞུས་ནས་《བློ་བརྟན་འགྱུར་མེད་ཀྱིས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་བུའི་ཐོག་མདུན་དུ་བསྐྱོད་དེ་ཁྱོན་ཡོངས་ནས་འབྱོར་འབྲིང་སྤྱི་ཚོགས་འཛུགས་སྐྲུན་བྱེད་ཆེད་འབད་འཐབ་བྱེད་དགོས།》ཞེས་པའི་སྙན་ཞུ་གནང་བ་རེད།
    ཧུའུ་ཅིན་ཐའོ་ཡིས་བསྟན་དོན།ཐེངས་འདིའི་ཚོགས་ཆེན་གྱི་བརྗོད་བྱ་གཙོ་བོ་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རླབས་ཆེན་དར་ཆ་མཐོན་པོར་སྒྲེང་བ་དང་ཏེང་ཞའོ་ཕིང་གི་རིགས་པའི་གཞུང་ལུགས་དང་“མཚོན་པ་གསུམ་”གྱི་གལ་ཆེའི་དགོངས་པ།ཚན་རིག་དང་མཐུན་པའི་འཕེལ་རྒྱས་གཏོང་རྒྱུའི་ལྟ་བ་བཅས་ཀྱིས་ཁྲིད་སྟོན་བྱེད་པ་དང་།བསམ་བློ་བཅིངས་འགྲོལ་གཏོང་བ།བཅོས་བསྒྱུར་སྒོ་ཕྱེ།སྟོབས་ཤུགས་གོང་འགྲིལ་ཡོང་བ།འགག་སྒྲོལ་དཀའ་གནད་བསལ་ནས་བློ་བརྟན་འགྱུར་མེད་ཀྱིས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་བུའི་ཐོག་མདུན་སྐྱོད་བྱས་ཏེ་ཁྱོན་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པར་འབད་འཐབ་བྱ་རྒྱུ་དེ་ཡིན།
    མི་དམངས་ཚོགས་ཁང་ཆེན་པོའི་ནང་རྔམ་བརྗིད་ལྡན་ཞིང་མི་ཁྲི་ཤོང་བའི་ཚོགས་ཆེན་ནང་སྤྲོ་སེམས་རབ་ཏུ་འཁོལ་བ་རེད།  ཧུའུ་ཅིན་ཐའོ་དང་ཅང་ཙེ་མིང་།ཝུའུ་པང་གོཝུན་ཅ་པའོ།ཅ་ཆིང་ལིན།ལི་ཁྲང་ཁྲུན།ཞི་ཅིན་ཕིང་།ལི་ཁེ་ཆང་།ཧོ་གོ་ཆང་།ཀྲོའུ་ཡུང་ཁང་སོགས་ཚོགས་ཆེན་གྱི་ཀྲུའུ་ཞི་ཚོགས་པའི་རྒྱུན་ལས་ཨུ་ཡོན་ལྷ་ཁང་གི་གྲུབ་མི་ཚོ་ཀྲུའུ་ཞི་སྟེགས་བུའི་མདུན་གྲལ་དུ་བཞུགས་ཡོད།ཚོགས་ཆེན་དེ་ཝུའུ་པང་གོས་གཙོ་འགན་བཞེས་ཤིང་།སྔ་དྲོའི་ཆུ་ཚོད9པའི་ཐོག་འཚོག་འགོ་ཚུགས་པ་རེད།ཚང་མ་ཡར་ལངས་ནས་སྐད་གསང་མཐོན་པོས་《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གླུ།》བླངས་པ་རེད།དེ་རྗེས།བློ་མཐུན་ཡོངས་རྫོགས་ཀྱིས་མའོ་ཙེ་ཏུང་དང་།ཀྲོའུ་ཨེན་ལེ།ལིའུ་ཧྲོང་ཆི།ཀྲུའུ་ཏེ།ཏེང་ཞའོ་ཕིང་།ཁྲེན་ཡུན་སོགས་སྐུ་གཤེགས་ཚར་བའི་འབྱོར་མེད་གྲལ་རིམ་གྱི་གསར་བརྗེ་པ་རྒན་རབས་དང་གསར་བརྗེའི་དཔའ་བོ་རྣམས་ལ་མྱ་ངན་ཞུས་པ་རེད།
    ཝུའུ་པང་གོས་ཚོགས་ཆེན་བཅོ་བརྒྱད་པའི་ནང་ཞུགས་དགོས་པའི་འཐུས་མི2268དང་།ཆེད་དུ་གདན་འདྲེན་ཞུས་པའི་འཐུས་མི57ཁྱོན་བསྡོམས་འཐུས་མི2325ཞུགས་དགོས་པས་དེ་རིང་འཐུས་མི2309དངོས་སུ་འབྱོར་ཡོད་པའི་ཁྱབ་བསྒྲགས་གནང་བ་རེད།ཁོང་གིས་ཚོགས་ཆེན་ནང་ཟུར་ཞུགས་གནང་མཁན་ཏང་ཕྱིའི་གྲོགས་པོ་དང་འབྲེལ་ཡོད་ཀྱི་འགན་ཁུར་བློ་མཐུན་ལ་སྤྲོ་སེམས་འཁོལ་བའི་ངང་ནས་དགའ་བསུ་ཞུས་པ་རེད།    ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་བཅོ་བརྒྱད་པ་པེ་ཅིན་དུ་འཚོགས།     ཧུའུ་ཅིན་ཐའོ་ཡིས་སྐབས་བཅུ་བདུན་པའི་ཀྲུང་དབྱང་ཨུ་ཡོན་ལྷན་ཁང་གི་ཚབ་ཞུས་ཏེ་ཚོགས་ཆེན་ལ་ཞུས་པའི་སྙན་ཞུར་ལེ་ཚན་བཅུ་གཉིས་ཡོད་པ་སྟེ།གཅིག་ནི་འདས་པའི་ལོ་ལྔའི་རིང་གི་ལས་ཀ་དང་ལོ་བཅུའི་རིང་གི་ལས་ཀར་གཞི་རྩའི་ཐོག་ཕྱོགས་སྡོམ་བྱས་པ།གཉིས་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རྒྱལ་ཁ་གསར་པ་ཐོབ་པ།གསུམ་ནི་སྒོ་ཀུན་ནས་འབྱོར་འབྲིང་སྤྱི་ཚོགས་བསྐྲུན་པ་དང་སྒོ་ཀུན་ནས་བཅོས་བསྒྱུར་སྒོ་འབྱེད་གཏིང་ཟབ་ཏུ་སྤེལ་རྒྱུའི་དམིགས་ཡུལ།བཞི་ནི་སྤྱི་ཚོགས་རིང་ལུགས་ཀྱི་ཚོང་ར་དཔལ་འབྱོར་གྱི་སྒྲིག་གཞི་མགྱོགས་སུ་འཐུས་སྒོ་ཚང་དུ་གཏོང་བ་དང་དཔལ་འབྱོར་འཕེལ་རྒྱས་གཏོང་སྟངས་མགྱོགས་སུ་འགྱུར་ལྡོག་གཏོང་བ།ལྔ་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཆབ་སྲིད་འཕེལ་རྒྱས་གཏོང་བའི་ལམ་བུའི་ཐོག་སྐྱོད་པ་རྒྱུན་འཁྱོངས་བྱས་ཏེ་ཆབ་སྲིད་སྒྲིག་གཞི་བཅོས་བསྒྱུར་བྱེད་པར་སྐུལ་འདེད་གཏོང་བ། དྲུག་ནི་སྤྱི་ཚོགས་རིང་ལུགས་ཀྱི་རིག་གནས་སྟོབས་ལྡན་རྒྱལ་ཁབ་སྐྲུན་པར་སྐུལ་སྤེལ་ཏན་ཏིག་གཏོང་བ། བདུན་ནི་དམངས་འཚོ་ལེགས་བཅོས་དང་དོ་དམ་གསར་སྐྲུན་བྱེད་རིང་སྤྱི་ཚོགས་འཛུགས་སྐྲུན་ལ་ཤུགས་སྣོན་རྒྱག་པ།བརྒྱད་ནི་ཤུགས་ཆེན་པོས་སྐྱེ་ཁམས་དཔལ་ཡོན་འཛུགས་སྐྲུན་ལ་སྐུལ་འདེད་གཏོང་བ།དགུ་ནི་རྒྱལ་སྲུང་དང་དམག་དཔུང་དེང་རབས་ཅན་དུ་སྐྲུན་པར་སྐུལ་འདེད་མགྱོགས་པོ་གཏོང་བ།བཅུ་ནི་རྒྱལ་ཁབ་གཅིག་ལ་ལམ་ལུགས་གཉིས་ལག་ལེན་བསྟར་བའི་ནང་དོན་ཕུན་སུམ་ཚོགས་པ་དང་མེས་རྒྱལ་གཅིག་གྱུར་ཡོང་བར་སྐུལ་སྤེལ་གཏོང་བ།བཅུ་གཅིག་ནི་རྒྱུན་ཆད་མེད་པར་མིའི་རིགས་ཞི་བདེ་ཡོང་བ་དང་འཕེལ་རྒྱས་གཏོང་བའི་བླ་ན་མེད་པའི་བྱ་གཞག་ལ་སྐུལ་སྤེལ་གཏོང་བ།བཅུ་གཉིས་ནི་སྒོ་ཀུན་ནས་ཏང་གི་འཛུགས་སྐྲུན་ཚན་རིག་ཅན་དུ་འགྱུར་བའི་ཆུ་ཚད་མཐོ་རུ་གཏོང་བ། ཧུའུ་ཅིན་ཐའོ་ཡིས་སྙན་སེང་ནང་བསྟན་དོན། ཚོགས་ཆེན་བཅུ་བདུན་པ་འཚོགས་ཚུན་གྱི་ལོ་ལྔའི་རིང་།ཕྱོགས་གང་ཐད་ཀྱི་ལས་ཀར་གལ་ཆེའི་གྲུབ་འབྲས་གསར་པ་ཐོབ་ཡོད།ལོ་བཅུའི་རིང་།ང་ཚོས་རབ་དང་རིམ་པའི་གནད་ཆེ་བའི་འགྲན་བསྡུར་སློང་བར་རྒྱལ་ཁ་ཐོབ་སྟེ་སྟོབས་ཤུགས་ཡོད་དགུས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དེ་འཕེལ་རིམ་གསར་པར་སླེབས་པར་སྐུལ་སྤེལ་བཏང་ཡོད།ལོ་བཅུའི་འབད་འཐབ་བྱེད་རིམ་ལ་ཕྱོགས་སྡོམ་བྱེད་ན།ཆེས་གལ་ཆེ་བ་ནི་ང་ཚོས་ལག་ལེན་བྱས་ཐོག་རིགས་གཞུང་གསར་སྐྲུན་བྱེད་པར་སྐུལ་སྤེལ་གཏོང་ཕོད་པ་བྱས་ཏེ་ཚན་རིག་དང་མཐུན་པའི་འཕེལ་རྒྱས་གཏོང་བའི་འདུ་ཤེས་ཆགས་པ་དང་ལག་ལེན་མཐར་ཕྱིན་བྱས་ཡོད།འབྱུང་འགྱུར་ལ་ཁ་ཕྱོགས་ཏེ་ངེས་པར་དུ་ཚན་རིག་དང་མཐུན་པའི་འཕེལ་རྒྱས་གཏོང་བའི་འདུ་ཤེས་དེ་རང་རྒྱལ་གྱི་དེང་རབས་ཅན་འཛུགས་སྐྲུན་གྱི་གོ་རིམ་ཧྲིལ་པོར་ལག་ལེན་མཐར་ཕྱིན་བྱེད་དགོས་ལ། ཏང་གི་འཛུགས་སྐྲུན་བྱ་རྒྱུའི་ཕྱོགས་གང་ཐད་ལའང་མཚོན་པ་བྱེད་དགོས།
    ཧུའུ་ཅིན་ཐོའི་ཡིས་བསྟན་དོན།ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་འཛུགས་སྐྲུན་བྱེད་པའི་སྤྱིའི་གཞི་འཛིན་ས་ནི་སྤྱི་ཚོགས་རིང་ལུགས་ཀྱི་ཐོག་མའི་དུས་རིམ་ཡིན་པ། སྤྱི་ཁོག་གི་ཆགས་ཚུལ་ནི་བསམ་བློ་འཛུགས་སྐྲུན་དང་། རྩ་འཛུགས་འཛུགས་སྐུན། ཀུན་སྤྱོད་འཛུགས་སྐྲུན། ལམ་ལུགས་འཛུགས་སྐྲུན། རུལ་སུངས་ལ་ངོ་རྒོལ་དང་སྤྱོད་གཙང་དར་སྤེལ་བཅས་གཅིག་གྱུར་ཡོང་བ་དེ་ཡིན། སྤྱིའི་ལས་འགན་ནི་སྤྱི་ཚོགས་རིང་ལུགས་ཀྱི་དེང་རབས་ཅན་དང་ཀྲུང་ཧྭ་མི་རིགས་རླབས་ཆེན་བསྐྱར་དར་མངོན་འགྱུར་ཡོང་བ་བྱ་རྒྱུ་དེ་རེད།
    ཧུའུ་ཅིན་ཐའོ་ཡིས་བསྟན་དོན།2020ལོར་སླེབས་དུས་སྒོ་ཀུན་ནས་འབྱོར་འབྲིང་སྤྱི་ཚོགས་བསྐྲུན་རྒྱུའི་རླབས་ཆེན་དམིགས་ཡུལ་མངོན་འགྱུར་ཡོང་བར་ཁག་ཐེག་བྱེད་དགོས།རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་དང་གྲོང་ཁྱེར་དང་གྲོང་གསེབ་ཡུལ་མིའི་ཆ་སྙོམས་མི་རེའི་ཡོང་འབབ་དེ2010ལོ་ལས་ལྡབ་གཅིག་འཕར་སྣོན་བ་བྱེད་དགོས།
    ཧུའུ་ཅིན་ཐའོ་ཡིས་ནན་གསུང་གནང་དོན།སྤྱི་ཚོགས་རིང་ལུགས་ཀྱི་ཚོང་ར་དཔལ་འབྱོར་གྱི་སྒྲིག་གཞི་མགྱོགས་སུ་འཐུས་སྒོ་ཚང་དུ་གཏོང་དགོས་པ་དང་དཔལ་འབྱོར་འཕེལ་རྒྱས་གཏོང་སྟངས་མགྱོགས་སུ་འགྱུར་ལྡོག་བྱེད་དགོས།ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཆབ་སྲིད་འཕེལ་རྒྱས་གཏོང་བའི་ལམ་བུའི་ཐོག་སྐྱོད་པ་དང་ཆབ་སྲིད་སྒྲིག་གཞིའི་བཅོས་བསྒྱུར་ལ་སྐུལ་སྤེལ་གཏོང་བ་རྒྱུན་འཁྱོངས་བྱེད་དགོས།སྤྱི་ཚོགས་རིང་ལུགས་ཀྱི་རིག་གནས་སྟོབས་ལྡན་རྒྱལ་ཁབ་འཛུགས་སྐྲུན་ལ་སྐུལ་སྤེལ་ཏན་ཏིག་གཏོང་དགོས།དམངས་འཚོ་ལེགས་བཅོས་དང་དོ་དམ་གསར་སྐྲུན་བྱེད་རིང་སྤྱི་ཚོགས་འཛུགས་སྐྲུན་ལ་ཤུགས་སྣོན་རྒྱག་དགོས།སྐྱེ་ཁམས་འཛུགས་སྐྲུན་བྱ་རྒྱུ་དེ་མངོན་གསལ་དོད་པའི་གནས་སུ་འཇོག་དགོས།
    ཧུའུ་ཅིན་ཐའོ་ཡིས་བསྟན་དོན།སྒོ་ཀུན་ནས་དམག་དཔུང་གསར་བརྗེ་ཅན་དང་དེང་རབས་ཅན།དངོས་གཞི་ཅན་བཅས་ཀྱི་འཛུགས་སྐྲུན་ལ་སྐུལ་སྤེལ་ཏག་ཏིག་གཏོང་དགོས།རྒྱལ་ཁབ་གཅིག་ལ་ལམ་ལུགས་གཉིས་ལག་ལེན་བསྟར་བའི་ནང་དོན་ཕུན་སུམ་ཚོགས་པ་དང་མེས་རྒྱལ་གཅིག་འགྱུར་ཡོང་བར་སྐུལ་སྤེལ་གཏོང་དགོས། རྒྱུན་ཆད་མེད་པར་མིའི་རིགས་ཞི་བདེ་ཡོང་བ་དང་འཕེལ་རྒྱས་ཡོང་བའི་བླ་ན་མེད་པའི་བྱ་གཞག་ལ་སྐུལ་སྤེལ་གཏོང་དགོས།
    ཧུའུ་ཅིན་ཐའོ་ཡིས་ནན་གསུང་གནང་དོན།ཁྱོན་ཡོངས་ནས་ཏང་གི་འཛུགས་སྐྲུན་ཚན་རིག་ཅན་གྱི་ཆུ་ཚད་མཐོ་རུ་གཏོང་དགོས།མི་དམངས་ཀྱི་ཡིད་ཆེས་དང་མངགས་བཅོལ་གལ་ཆེན་ལ་དམིགས་ཤིང་།ལོ་རྒྱུས་ཀྱི་ཆ་རྐྱེན་གསར་པ་དང་ཚོད་ལྟ་བྱ་རྒྱུར་དམིགས་ནས་ཏང་ཡོངས་ཀྱིས་ངེས་པར་དུ་སེམས་ཁྲལ་དང་སྡུག་བསྔལ་གྱི་འདུ་ཤེས་ཤུགས་ཆེ་རུ་བཏང་ཞིང་ཁེངས་སྐྱུང་གཟབ་ནན་དང་།ང་རྒྱལ་དང་འཚབ་འཚུབ་སྤངས་པ།ནམ་ཡིན་ཡང་བློ་རིག་དྭངས་པོ་བྱེད་དགོས།ངེས་པར་དུ་གསར་སྐྲུན་གྱི་འདུ་ཤེས་ཤུགས་ཆེ་རུ་གཏོང་དགོས་ལ་བདེན་དོན་རྒྱུན་འཁྱོངས་དང་ནོར་འཁུལ་ཡོ་བསྲང་།ནམ་ཡིན་ཡང་འབད་འབུངས་འཇོན་ལྡན་གྱི་བསམ་པའི་རྣམ་པ་རྒྱུན་འཁྱོངས་བྱེད་དགོས།ངེས་པར་དུ་དམིགས་དོན་གྱི་འདུ་ཤེས་ཤུགས་ཆེ་རུ་གཏོང་ཞིང་མང་ཚོགས་ལ་ཡིད་ཆེས་པ་དང་མང་ཚོགས་ལ་རྟེན་པ།ནམ་ཡིན་ཡང་མི་དམངས་དེ་སེམས་ནང་ཆེས་མཐོ་བའི་གནས་སུ་འཇོག་དགོས།ངེས་པར་དུ་ལས་འགན་གྱི་འདུ་ཤེས་ཤུགས་ཆེ་རུ་གཏོང་ཞིང་དམ་པ་དོན་གཉེར་དང་དཀའ་སྤྱད་འབད་འབུངས།ནམ་ཡིན་ཡང་གུང་ཁྲན་ཏང་མིའི་ཆབ་སྲིད་རང་རྟགས་རྒྱུན་འཁྱོངས་བྱེད་དགོས།
    སྙན་སེང་ཞུ་རིམ།ཚོགས་རའི་ནང་ཐེངས་མང་པོར་སྤྲོ་སེམས་འཁོལ་བའི་ཐལ་སྒྲ་བརྡེབས་པ་རེད།རྒྱལ་ཁབ་ཕྱི་ནང་གི་གསར་འགོད་པ2700ལྷག་གིས་ཚོགས་ཆེན་གྱི་འགོ་ཚུགས་མཛད་སྒོའི་གཟབ་རྒྱས་གནས་ཚུལ་སྐོར་བཅར་འདྲི་དང་གསར་འགོད་བྱས་ཡོད།