རང་རྒྱལ་གྱི་གནམ་གྲུ་འབབ་སའི་གྲུ་གཟིངས་ཐོག་མ་སྤྱི་ཚེས་25ཉིན་དངོས་སུ་མཚོ་དམག་ལ་རྩིས་སྤྲོད་བྱས་ཡོད་པ་རེད། དམག་དོན་རིགས་གཅིག་མཁས་པ་མང་པོས་གསར་འགོད་པའི་བཅར་འདྲི་དང་ལེན་ཞུ་སྐབས། ཀྲུང་གོས་གནམ་གྲུ་འབབ་སའི་གྲུ་གཟིངས་བཟོ་སྐྲུན་བྱ་རྒྱུ་གོང་འཕེལ་གཏོང་རྒྱུ་ནི་དོན་དངོས་ལ་དམིགས་པ་ཞིག་ཡིན་པ་དང་། ལོ་རྒྱུས་ཀྱི་འཕེལ་ཕྱོགས་ཤིག་ཡིན། ཡིན་ནའང་གནམ་གྲུ་འབབ་སའི་གྲུ་གཟིངས་བཟོ་སྐྲུན་བྱས་པ་དེས་འགོག་སྲུང་རང་བཞིན་གྱི་རྒྱལ་སྲུང་སྲིད་ཇུས་ལ་འགྱུར་བ་གཏོང་མི་སྲིད་ཅེས་གསུངས་ཡོད་པ་རེད།

    རྒྱལ་སྲུང་སློབ་ཆེན་གྱི་གཡུལ་འགྱེད་སློབ་གསོ་ཞིབ་འཇུག་པུའི་དགེ་རྒན་ཆེན་མོ་བ་གཞོན་པ་ཧྥང་པིང་གིས། ཀྲུང་གོའི་མཚོ་འགྲམ་ཐིག་གི་རིང་ཚད་སྤྱི་ལེ་ཆིག་ཁྲི་བརྒྱད་སྟོང་ལྷག་ཙམ་ཟིན་པ་དང་། རྒྱ་མཚོའི་རྒྱལ་ཁོངས་ས་ཆའི་རྒྱ་ཁྱོན་སྤྱི་ལེ་ངོས་སྙོམས་གྲུ་བཞི་མ་ས་ཡ་གསུམ་ཟིན་གྱི་ཡོད། དེ་ལྟར་རིང་བའི་མཚོ་འགྲམ་ཐིག་དང་རྒྱ་ཆེའི་མཚོ་ཁོངས་ཡོད་དུས་མངའ་ཁོངས་ས་ཆའི་བདག་དབང་དང་རྒྱ་མཚོའི་ཁེ་དབང་སྲུང་སྐྱོང་བྱ་རྒྱུ་དང་། རྒྱལ་ཁབ་ཀྱི་མཚོ་ཐོག་ཁ་ཕྱོགས་བདེ་འཇགས་སྲུང་སྐྱོང་བྱ་རྒྱུ་ནི་ཀྲུང་གོའི་དྲག་ཆས་སྟོབས་ཤུགས་ཀྱི་བླ་ན་མེད་པའི་འགན་འཁྲི་ཞིག་ཡིན་ཞེས་གསུངས་ཡོད་པ་རེད།

    མཚོ་དམག་དམག་དོན་རིག་གཞུང་ཞིབ་འཇུག་སོའི་ཡི་ཞིབ་འཇུག་པ་ཚའོ་ཝེ་ཏུང་གིས། དེང་རབས་ཀྱི་དམག་དོན་ལག་རྩལ་གོང་འཕེལ་མགྱོགས་མྱུར་འགྲོ་བ་དང་བསྟུན་ནས། གོ་མཚོན་སྒྲིག་ཆས་ཀྱི་གཤིས་ནུས་ཟམ་མི་ཆད་པར་མཐོར་འདེགས་གཏོང་བཞིན་ཡོད་པ་དང་། དམག་འཐབ་ཀྱི་གཏིང་ཚད་ཟམ་མི་ཆད་པར་རྒྱ་ཆེར་འགྲོ་བཞིན་ཡོད་པས། འགོག་སྲུང་རང་བཞིན་གྱི་རྒྱལ་སྲུང་སྲིད་ཇུས་ལག་བསྟར་བྱེད་མཁན་རྒྱལ་ཁབ་ཅིག་ཡིན་པའི་ངོས་ནས། རང་རེའི་འགོག་སྲུང་གི་གཏིང་ཚད་ཀྱང་སྔར་བས་རྒྱ་ཆེར་གཏོང་དགོས་ཀྱི་ཡོད་ཅིང་། དོན་སྙིང་དེའི་ཐད་ནས་བཤད་ཚེ། ཀྲུང་གོར་ངེས་པར་དུ་རང་སོ་སོའི་གནམ་གྲུ་འབབ་སའི་གྲུ་གཟིངས་ཡོད་དགོས་པའི་ངོས་འཛིན་གནང་ཡོད་པ་རེད།

    མཚོ་དམག་ཆ་འཕྲིན་ཅན་གྱི་རིགས་གཅིག་མཁས་པའི་བློ་འདྲི་ཨུ་ཡོན་ལྷན་ཁང་གི་ཀྲུའུ་རེན་ཡིད་གྲོས། ཀྲུང་གོ་སྲིད་གཞུང་གིས་སྔ་ཕྱི་བར་གསུམ་དུ་ཞི་བའི་ལམ་བུའི་ཐོག་བསྐྱོད་རྒྱུ་རྒྱུན་འཁྱོངས་བྱས་ཡོད་པ་དང་། རང་བཙན་རང་བདག་གི་ཞི་བའི་ཕྱི་འབྲེལ་སྲིད་ཇུས་དང་འགོག་སྲུང་རང་བཞིན་གྱི་རྒྱལ་སྲུང་སྲིད་ཇུས་རྒྱུན་འཁྱོངས་བྱེད་བཞིན་ཡོད། མི་དམངས་མཚོ་དམག་གིས་གནམ་གྲུ་འབབ་སའི་གྲུ་གཟིངས་ཡོད་པའི་དབང་གིས་ཉེ་འགྲམ་མཚོ་ཁོངས་ཀྱི་འགོག་སྲུང་འཐབ་ཇུས་ལ་འགྱུར་བ་གཏོང་མི་སྲིད་ལ། རང་རྒྱལ་གྱི་འགོག་སྲུང་རང་བཞིན་གྱི་སྲིད་ཇུས་ལ་ཡང་འགྱུར་ལྡོག་གཏོང་མི་སྲིད་ཅེས་གསུངས་ཡོད་པ་རེད། །