ཀྲུང་གོ་བོད་ཀྱི་དྲ་བའི་འཕྲིན།ཏང་གི་མང་ཚོགས་ལམ་ཕྱོགས་སློབ་གསོ་ལག་ལེན་བྱ་འགུལ་སྤེལ་བ་དང་ལས་སྒོའི་བྱ་བ་སྤེལ་བ་གཉིས་ཀར་འགོར་འགྱངས་མ་བྱས་པར་བདེ་བླག་ངང་སྤེལ་ཏེ།ཏང་དང་མང་ཚོགས་བར་གྱི་འབྲེལ་བ་དང་།ལས་བྱེད་པ་དང་མང་ཚོགས་བར་གྱི་འབྲེལ་བ་སྔར་ལས་ཇེ་ཟབ་ཏུ་གཏོང་ཆེད།མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་ཞིན་ཧེ་རྫོང་ཁོར་ཡུག་སྲུང་སྐྱོབ་དང་ནགས་ལས་ཅུའུ་ཡིས་མི་དམངས་མང་ཚོགས་ཀྱིས་བཏོན་པའི་ནགས་ཚལ་ཁྲོད་ཀྱི་ཤིང་སྡོང་ལ་གནོད་འབུས་གནོད་བསྐྱལ་བར་སྔོན་འགོག་གང་ལེགས་བྱས་མེད་པ་སོགས་ཀྱི་གནད་དོན་ལ་གཞིགས་ནས།མྱུར་བ་མྱུར་དུ་ཆེད་དོན་ཚོགས་འདུ་བསྡུས་ནས་གནོད་འབུ་སྔོན་འགོག་བྱེད་པར་བཀོག་སྒྲིག་ལེགས་པོ་བྱས།
ཤེས་གསལ་བྱུང་བ་ལྟར་ན།ཟླ་ལྔ་བའི་ཚེས་ཉེར་གསུམ་ཉིན་ནས་ཚེས་ཉེར་དྲུག་བར་ཏེ་ཉིན་བཞིའི་རིང་ལ།ནགས་ལས་ཅུའུ་ཡིས་ནགས་ཚལ་སྔོན་འགོག་ས་ཚིགས་ཀྱི་ལག་རྩལ་མི་སྣ་ཆེད་དུ་རྩ་འཛུགས་བྱས་ནས་ཆུ་སྔོན་གྲོང་རྡལ་ཚེར་ནགས་སྡེ་བའི་འབུ་གནོད་འགོག་བཅོས་བྱེད་མགོ་བརྩམས་ལ།ཉིན་བཞིའི་ནང་དུ་།ཁྱོན་བསྡོམས་རྒྱ་ཁྱོན་མུའུ་སྟོང་གཉིས་ལྷག་གི་ནགས་ཚལ་གྱི་གནོད་འབུ་འགོག་བཅོས་བྱས་ཏེ།ཚེར་ནགས་སྡེ་བའི་གཞུང་དང་སྒེར་གྱི་ནགས་ཁུལ་ཡོངས་ལ་ཕན་འབྲས་ལྡན་པའི་ངང་གནོད་འབུ་འགོག་བཅོས་བྱས།
འགོག་བཅོས་བྱ་བར་དཔལ་འབྱོར་དང་སྐྱེ་ཁམས།སྤྱི་ཚོགས་བཅས་ཀྱི་ཕན་འབྲས་ཆེན་པོ་ཐོབ་པས།མང་ཚོགས་ཀྱི་རྒྱབ་སྐྱོར་དང་དགའ་བསུ་ཆེན་པོ་ཐོབ།  །