ཞིན་ཧྭ་གསར་འགྱུར་ཁང་ཟི་ལིང་ནས་ཟླ་བ12པའི་ཚེས13ཉིན་འབྱོར་བའི་གཏམ་གསར། མཚོ་སྔོན་ཞིང་ཆེན་དམངས་སྲིད་ཐིང་ནས་ཤེས་རྟོགས་བྱུང་དོན། མཚོ་སྔོན་ཞིང་ཆེན་གྱིས་གྲོང་ཁྱེར་དང་གྲོང་གསེབ་ཀྱི་མི་འབོར་རྒན་བགྲེས་ཅན་དུ་འགྱུར་བའི་གནད་དོན་ལ་དམིགས་ནས2014ལོར་མ་དངུལ་སྒོར་དུང་ཕྱུར3.04བཏང་ནས་རིགས་མི་འདྲ་བའི་རྒན་གསོ་ཞབས་ཞུ་ལས་ཁུངས546གསར་དུ་བསྐྲུན་ཡོད།
  ངོ་སྤྲོད་བྱས་པར་གཞིགས་ན།2014ལོར། མཚོ་སྔོན་ཞིང་ཆེན་གྱིས་གསར་དུ་བསྐྲུན་པའི་འདུས་སྡེ་ཁུལ་གྱི་མི་རྒན་ལ་ཉིན་མོར་ལྟ་སྐྱོང་བྱེད་སའི་ལྟེ་གནས་དང་གཞུང་ལས་རྒན་གསོ་ལས་ཁུངས། ཤང་དང་གྲོང་རྡལ་གྱི་རྒན་གསོ་ཁང་། ཞིང་སྡེའི་ཕན་རོགས་བདེ་སྐྱིད་ཁང་སོགས་རྒན་གསོ་ཞབས་ཞུའི་ལས་ཁུངས546གསར་དུ་བསྐྲུན་ཞིང་།སྤྱི་ཚོགས་རྒན་གསོ་ཞབས་ཞུའི་ཉལ་ཁྲི6300གསར་དུ་བསྣན་ཡོད། དམངས་གཉེར་རྒན་གསོའི་ལས་ཁུངས་ལ་མཚོ་སྔོན་ཞིང་ཆེན་གྱིས་དེ་ཚོས་གསར་དུ་བསྣན་པའི་ཉལ་ཁྲི་རེར་སྒོར10000ཡི་ཚད་གཞི་ལྟར་ཁ་གསབ་རོགས་དངུལ་བྱིན་པ་དང་སྔར་ལྷག་གིས་སྤྱི་ཚོགས་ཀྱི་ནུས་ཤུགས་ལ་བརྟེན་ནས་རྒན་གསོ་ལས་ཁུངས་བསྐྲུན་པར་རྒྱབ་སྐྱོར་དང་སྐུལ་མ་བཏང་བ་རེད།      མཚོ་སྔོན་ཞིང་ཆེན་དམངས་སྲིད་ཐིང་གིས་བསྡོམས་རྩིས་ཚད་ལེན་ཞིབ་རྩིས་ལ་གཞིགས་ན། 2015ལོར། མཚོ་སྔོན་ཞིང་ཆེན་གྱི་རྒན་བགྲེས་ཅན་གྱི་མི་འབོར་དེ་མི་ཁྲི67.66ལ་ཟིན་པས།  སྤྱིའི་མི་འབོར་ལས་བརྒྱ་ཆ11.51བཟུང་། མཚོ་སྔོན་ཞིང་ཆེན་གྱིས་ལོ་ལྔའི་འཆར་གཞི་བཅུ་གཉིས་པའི་དུས་མཇུག་ཏུ་རྒན་གསོ་ལས་ཁུངས་དེ་རྫོང་ཁག་སོ་སོའི་སྲིད་འཛིན་སྡེ་ཁུལ་དུ་འཛུགས་རྒྱུའི་འཆར་གཞི་ཡོད་ཅིང་། ཁྱིམ་སྡོད་རྒན་གསོ་དེ་རྨང་གཞི་བྱེད་པ་དང་འདུས་སྡེ་ཁུལ་གྱི་ཞབས་ཞུ་དེ་རྟེན་ས་བྱེད་པ། ལས་ཁུངས་ཀྱིས་རྒན་གསོ་བྱེད་པ་དེ་མི་འདང་བ་སྐོང་ས་བྱེད་པའི་རྒན་གསོའི་ཞབས་ཞུ་མ་ལག་རིམ་བཞིན་འཛུགས་སྐྱོང་བྱས་ཏེ་མི་རྒན་ཁྱིམ་དུ་བསྡད་དེ་རྒན་གསོ་བྱེད་པའི་འཚོ་བའི་རེ་བ་སྐོང་ཐུབ་པ་བྱ་རྒྱུ་རེད།