ཞིན་ཧྭ་གསར་འགྱུར་ཁང་ཧུའུ་ཧོ་ཧའོ་ཐེ་ནས་འབྱོར་བའི་གཏམ་གསར། ཉེ་ཆར་ནང་སོག་དབུལ་སྐྱོར་གསར་སྦོལ་གཞུང་ལས་ཁང་ནས་རྒྱུས་ལོན་བྱུང་རྒྱུར། ད་ལོར་ནང་སོག་གིས་མུ་མཐུད་ནས་དངུལ་ལོར་དབུལ་སྐྱོར་དམངས་ཕྱུག་ལས་གྲྭ་ལ་སྐུལ་འདེད་བྱ་རྒྱུ་ཡིན་ཞིང་། དབུལ་པོའི་རྫོང15ལ་དབུལ་སྐྱོར་གྱི་དངུལ་བུན་ཆུང་ཆུང་གཏོང་མཁན་གྱི་སྤྱི་གཉེར་ཁང་བཙུགས་ཏེ་དབུལ་པོ་ཁྱིམ་ཚང་ལ་དབུལ་སྐྱོར་དམངས་ཕྱུག་གི་དངུལ་བུན་གཏང་རྒྱུ་རེད།
    2013ལོ་ནས་ནང་སོག་གིས་དངུལ་ལོར་དབུལ་སྐྱོར་དམངས་ཕྱུག་ལས་གྲྭ་སྤེལ་འགོ་བཙུགས་ཏེ་ལོ་རེར་རྒྱལ་ཁབ་དང་རང་སྐྱོང་ལྗོངས་ཀྱིས་དབུལ་སྐྱོར་མ་དངུལ་སྒོར་དུང་ཕྱུར4.75སྙོམས་སྒྲིག་བྱས་ཏེ་ཞིང་ཆེན་རིམ་པའི་འགོ་ཁྲིད38ཀྱི་འབྲེལ་བ་བྱེད་སའི་དབུལ་ཕོངས་རྫོང་རེར་སྒོར་ཁྲི1000བཏང་ཞིང་། དེ་མིན་གྱི་རང་སྐྱོང་ལྗོངས་རིམ་པའི་དབུལ་ཕོངས་རྫོང19ལ་སྒོར་ཁྲི500བཏང་། 2017ལོར་བསླེབ་དུས་མ་དངུལ་ཁྱོན་བསྡོམས་སྒོར་དུང་ཕྱུར23.75གཏང་རྒྱུ་རེད།
    ངོ་སྤྲོད་བྱས་པ་ལྟར་ན། ནང་སོག་གིས་དམངས་ཕྱུག་བྱ་རྒྱུའི་ཞིང་དུད་ཀྱི་དངུལ་བུན་གཏོང་བ་དང་དམངས་ཕྱུག་བྱ་རྒྱུའི་ཐོན་ལས་ཀྱི་དངུལ་བུན་གཏོང་བ་སོགས་དབུལ་སྐྱོར་དངུལ་ལོར་གྱི་རིགས་ཇུས་འགོད་བྱས་ཤིང་། ཞིང་འབྲོག་ཁྱིམ་ཚང་སྒེར་གྱིས་ཡིད་རྟོན་དངུལ་བུན་གཡར་རྒྱུར་མ་དངུལ་གྱི་རྒྱབ་སྐྱོར་བྱ་རྒྱུ་དམིགས་སུ་ཐོན་པ་བྱས་ཡོད། འཁོར་རྒྱུག་བྱེད་ཆོག་པའི་རྣམ་པ་སྤྱད་ནས་ལོ3ཡི་ནང་དུས་ནམ་ལ་གཡར་བ་དང་དུས་ནམ་ལ་སྤྲད་ན་ཆོག་པས་མ་དངུལ་འཁོར་སྐྱོད་སྟབས་བདེ་ཞིང་། མ་དངུལ་མང་ཉུང་གཡར་རྒྱུའི་སྙན་ཞུའི་ཐོག་དབུལ་པོ་ཁྱིམ་ཚང་གི་དགོས་མཁོ་ལ་གཞིགས་ནས་ཁྱིམ་ཚང་རེས་དངུལ་བུན་སྒོར་སྟོང1ནས་ཁྲི5བར་གཡར་ཆོག་པ་དེ་རིམ་པ་མི་འདྲ་བའི་ཞིང་དུད་ཀྱིས་ཐོན་སྐྱེད་སྤེལ་བའི་མ་དངུལ་དགོས་མཁོ་སྐོང་ཐུབ་པ་རེད། དངུལ་བུན་སྐྱེད་ཁེའི་ལག་བསྟར་གཞི་ཁྱོན་ནང་ཚད་མཐོ་ཙམ་གྱི་སྐྱེད་ཁེ་སྤྲད་དེ་ཞིང་དུད་ལ་དངོས་སུ་ཁེ་ཕན་ཐོབ་བཅུག་པ་རེད།
    2014ལོར། ནང་སོག་གིས་མུ་མཐུད་ནས་ནོར་སྲིད་མ་དངུལ་གྱིས་འགན་ལེན་དང་སྐྱེད་ཀ་སྤྲོད་པ། ཉེན་ཁར་ཁ་གསབ་བྱེད་པ་སོགས་ཀྱི་རྣམ་པ་སྤྱད་དེ་དངུལ་རྩའི་ལས་ཁུངས་སྣེ་ཁྲིད་དེ་དབུལ་སྐྱོར་མ་དངུལ་གྱི་མ་དངུལ་གཏོང་ཁྱོན་ཆེ་རུ་གཏང་རྒྱུ་རེད།