ཞིན་ཧྭ་གསར་འགྱུར་ཁང་ལྷ་ས་ནས་འབྱོར་བའི་གཏམ་གསར།བོད་རང་སྐྱོང་ལྗོངས་དཔེ་མཛོད་ཁང་ནས་ཤེས་རྟོགས་བྱུང་རྒྱུར། བོད་ལྗོངས་ཀྱིས་གླིང་གེ་སར་རྒྱལ་པོའི་སྨྱན་སྦྱོར་མང་ཐོན་ཁུངས་མཛོད་ཁང་ཐོག་མ་བསྐྲུན་ནས་བེད་སྤྱོད་བྱེད་འགོ་ཚུགས་ཡོད།མིག་སྔར་བོད་ལྗོངས་བྱང་རྒྱུད་ས་ཁུལ་ནས་ཡོང་བའི་སྒྲུང་པའི་སྒྱུ་རྩལ་པ་ལྔའི་བརྩམས་ཆོས་དང་ལེན་གདངས་སོགས་ཀྱི་དཔྱད་གཞིའི་ཡིག་རིགས་མཛོད་དུ་བཅུག་པའི་ལས་ཀ་གྲུབ་པ་རེད།
    གླིང་གེ་སར་རྒྱལ་པོའི་རིག་གནས་སྲུང་སྐྱོང་ཆེད་རམས་པ་དང་བོད་རང་སྐྱོང་ལྗོངས་དཔེ་མཛོད་ཁང་གི་འགོ་གཙོ་ལུའུ་མུའུ་ཡིས་ངོ་སྤྲོད་བྱས་རྒྱུར། ན་ལོའི་ལོ་འགོར། རང་སྐྱོང་ལྗོངས་དཔེ་མཛོད་ཁང་གིས་གླིང་གེ་སར་རྒྱལ་པོའི་སྨན་སྦྱོར་མང་པོའི་ཐོན་ཁུངས་མཛོད་ཁང་ལས་འགོ་བཙུགས་ཤིང་། ཐོན་ཁུངས་མཛོད་ཁང་དུ་སྒྲུང་པ་མཁས་པ་དང་སྒྱུ་རྩལ་པས་ཁ་ནས་བཤད་པའི་ལོ་རྒྱུས། རོལ་མོའི་ལེན་གདངས། གླིང་གེ་སར་རྒྱལ་པོར་བསྟོད་པའི་གླུ། གླིང་གེ་སར་རྒྱལ་པོའི་ཞབས་བྲོ། གླིང་གེ་སར་རྒྱལ་པོའི་ལོ་རྒྱུས་ཀྱི་རྗེས་ཤུལ་བཅས་ཕྱོགས་ཁག་དྲུག་ཚུད་ཡོད།
    མིག་སྔར། བོད་ལྗོངས་བྱང་རྒྱུད་ས་ཁུལ་གྱི་རྒྱལ་ཁབ་རིམ་པའི་གླིང་གེ་སར་རྒྱལ་པོའི་རྒྱུན་འཛིན་སྒྲུང་པ་ཚེ་རིང་དགྲ་འདུལ་དང་རང་སྐྱོང་ལྗོངས་རིམ་པའི་གླིང་གེ་སར་རྒྱལ་པོའི་རྒྱུན་འཛིན་སྒྲུང་པ་ངག་དབང་དཔལ་ལྡན་སོགས་སྒྲུང་པ5ཡི་ཡིག་རིགས་མཛོད་དུ་བཅུག་ཡོད། ཕྱིན་ཆད་མུ་མཐུད་ནས་ནག་ཆུ་ས་ཁུལ་གྱི་སྒྲུང་པ80ལྷག་དང་བོད་ལྗོངས་ཀྱི་ས་ཁུལ་གཞན་པའི་སྒྲུང་པའི་རྒྱུན་འཛིན་པའི་ཡིག་རིགས་མཛོད་དུ་འཇུག་རྒྱུ་ཡིན་ཞིང་། ནག་ཆུ་ས་ཁུལ་དུ་སྒྲུང་པ་མང་པོ་དང་ཉན་མ་མྱོང་པའི་སྒྲུང་པའི་པར་གཞི་འབོར་ཆེན་ཡོད་པས་གླིང་གེ་སར་རྒྱལ་པོའི་སྒྲུང་དེ་རྒྱུན་འཛིན་དང་དར་སྤེལ་གཏོང་བར་ནུས་པ་གལ་ཆེན་འདོན་པ་རེད།
    2009ལོར《གླིང་གེ་སར་རྒྱལ་པོའི་སྒྲུང་།》དེ་འཛམ་གླིང་གི་དངོས་པོ་མིན་པའི་ཤུལ་བཞག་རིག་གནས་ཀྱི་གྲལ་དུ་བཞག་པ་རེད།