ཞིན་ཧྭ་གསར་འགྱུར་ཁང་ཁྲེང་ཏུའུ་ནས་ཟླ་བ4པའི་ཚེས24ཉིན་འབྱོར་བའི་གཏམ་གསར། སི་ཁྲོན་ཞིང་ཆེན་སྲིད་གཞུང་ནས་ཤེས་རྟོགས་བྱུང་རྒྱུར། 2014ལོའི་ལོ་མཇུག་ཏུ་སླེབས་དུས། སི་ཁྲོན་གྱིས་ཞིང་ཆེན་ཡོངས་སུ་ཞིང་སྡེའི་རྣམ་པ་གསར་པའི་མཉམ་ལས་སྨན་བཅོས་འགན་སྲུང་དང་གྲོང་རྡལ་ཡུལ་མིའི་ཉེན་འགོག་འགན་སྲུང་ལམ་ལུགས་གཉིས་མཉམ་འབྲེལ་བྱས་ནས་ལག་ལེན་བྱ་རྒྱུ་ཡིན་པར་མ་ཟད། ད་དུང་ལས་བཟོའི་གཞི་རྩའི་རྒན་གསོ་ཉེན་འགོག་ལམ་ལུགས་དང་མཐུན་སྦྱོར་བྱ་རྒྱུ་ཡིན་པ་རེད། 2020ལོའི་སྔོན་དུ། འདྲ་མཉམ་དང་། གཅིག་གྱུར། ཚད་ལྡན་བཅས་ཀྱི་གྲོང་རྡལ་དང་གྲོང་གསེབ་ཡུལ་མིའི་རྒན་གསོ་ཉེན་འགོག་ལམ་ལུགས་འཛུགས་ཐུབ་རྒྱུ་ཡིན་པ་རེད།
    ཤེས་རྟོགས་བྱུང་བར་གཞིགས་ན། ལོ་ན16ལ་སོན་པའི（སློབ་གྲྭར་ཡོད་པའི་སློབ་མ་མི་འདུས།）རྒྱལ་ཁབ་ཀྱི་ལས་ཁུངས་དང་དོན་ལས་སྡེ་ཚན་གྱི་ལས་སྒྲུབ་མི་སྣ་མིན་པའི་མི་སྣ། དེ་བཞིན་དུ་ལས་བཟོའི་གཞི་རྩའི་ཉེན་འགོག་འགན་སྲུང་ལམ་ལུགས་ཁྱབ་ཁོངས་ནང་མི་གཏོགས་པའི་གྲོང་རྡལ་དང་གྲོང་གསེབ་ཡུལ་མི་རྣམས་ཐེམ་ཐོ་ཡོད་སའི་གྲོང་རྡལ་དང་གྲོང་གསེབ་ཡུལ་མིའི་ཉེན་འགོག་རྒན་གསོའི་ནང་ཞུགས་ཆོག་པ་རེད། གྲོང་རྡལ་དང་གྲོང་གསེབ་ཡུལ་མིའི་ཉེན་འགོག་རྒན་གསོའི་ཐེབས་རྩ་ནི་མི་སྒེར་གྱིས་གྲོན་དངུལ་སྤྲོད་པ་དང་།ཐུན་མོང་གིས་བསྡུ་གསོག་བྱ་རྒྱུ་དང། སྲིད་གཞུང་གིས་ཁ་གསབ་བྱས་ཏེ་གྲུབ་པ་རེད།
    གྲོང་རྡལ་དང་གྲོང་གསེབ་ཡུལ་མིའི་ཉེན་འགོག་རྒན་གསོའི་བདག་གཉེར་ལས་ཁུངས་ཀྱིས་ཉེན་འགོག་འགན་སྲུང་ནང་ཞུགས་པའི་མི་ཚང་མར་མི་ཚེ་ཧྲིལ་པོར་ཉེན་འགོག་རྒན་གསོ་བྱ་ཡུལ་གྱི་མི་སྒེར་ཐོ་དེབ་བཟོས་ནས་མི་སྒེར་གྱིས་སྤྲོད་པའི་གྲོན་དངུལ་དང་ས་གནས་མི་དམངས་སྲིད་གཞུང་གིས་ཉེན་འགོག་འགན་སྲུང་ནང་ཞུགས་པའི་མི་སྒེར་ལ་སྤྲོད་རོགས་བྱས་པའི་ཁ་གསབ་རོགས་དངུལ། ཐོན་མོང་གིས་བསྡུ་གསོག་བྱས་པའི་མ་དངུལ།དེ་བཞིན་དུ་དེ་མིན་གྱི་སྤྱི་ཚོགས་ཀྱི་དཔལ་འབྱོར་རྩ་འཛུགས་དང་ ། སྤྱི་ཕན་དགེ་སྒྲུབ་རྩ་འཛུགས། མི་སྒེར་གྱིས་ཉེན་འགོག་འགན་ལེན་ནང་ཞུགས་མཁན་ལ་རོགས་སྐྱོར་བྱས་པའི་མ་དངུལ་ཐམས་ཅད་མི་སྒེར་གྱི་ཐོ་དེབ་ནང་བཀོད་རྒྱུ་ཡིན་པ་རེད། མི་སྒེར་གྱི་ཐོ་དེབ་ནང་གི་གསོག་ཚད་དེ་རྒྱལ་ཁབ་ཀྱི་གཏན་འཁེལ་ལྟར་སྐྱེད་ཀ་རྩིས་རྒྱུ་ཡིན་པ་རེད།