མཚན་རྒྱས་པར། དཔལ་གྱི་ཆོས་སྡེ་ཆེན་པོ་ཆོས་འཁོར་ལྷུན་པོ་ཨོ་རྒྱན་ལྷ་ཁང་དགོན་ཞེས་ཞུ།  ས་སྐྱ་དགོན་ནས་ལྷོ་ནུབ་ངོས་སུ་སྤྱི་ལེ་གཉིས་གསུམ་ཙམ་གྱི་ས་ན་དགོན་དེ་མཇལ་བ་ཡིན། དགོན་དེ་ནི་བོད་རབ་བྱུང་བརྒྱད་པའི་ནང་རྗེ་དྭགས་པོ་ལྷ་རྗེའི་རྣམ་སྤྲུལ་གཞུང་བརྒྱ་པ་དངོས་གྲུབ་དཔལ་འབར་གྱིས་ཕྱག་བཏབ་གནང་མཛད། སྔོན་དགོན་དེར་གུ་རུ་གསུང་བྱོན་གཙོ་འཁོར་གསུམ་ཡོད་པ་དེ་ནི་བོད་གངས་ཅན་ལྗོངས་འདིར་གུ་རུའི་སྐུ་བརྙན་གསུང་བྱོན་བཞི་ཡོད་པ་ལས་གཙང་སྟོད་ས་སྐྱར་གུ་རུ་གསུང་བྱོན་གཅིག་ཞེས་པ་དེ་ཡིན། དེའང་གུ་རུ་རིན་པོ་ཆེས་བལ་པོ་ལྷ་བཟོ་མཁས་པ་གསུམ་དུ་སྤྲུལ་ཏེ་གུ་རུ་གཙོ་འཁོར་གསུམ་བཞེངས་བསྒྲུབས་རྗེས་ལྷ་བཟོ་གསུམ་ཡང་གུ་རུར་ཐིམ་ཡིན་ཞེས་པའི་གུ་རུའི་སྣང་བརྙན་གཙོ་འཁོར་གསུམ་བཞུགས་ཡོད།
    ད་ལྟ་བསྐྱར་བཞེངས་ཞུས་པའི་ལྷ་ཁང་ནང་སྔོན་གྱི་གུ་རུའི་སྐུ་བརྙན་གྱི་སྐུ་ཚབ་གཡས་སུ་མཁའ་འགྲོ་ཡེ་ཤེས་མཚོ་རྒྱལ་དང་གཡོན་དུ་ལྷ་ལྕམ་མན་དྷ་ར་བ། འདུ་ཁང་ནང་ཆོས་གླིང་རྒྱལ་བ་བྱམས་པ་བཅས་བསྐྱར་བཞེངས་ཞུས་པ་མཇལ་རྒྱུ་ཡོད། སྔོན་རྙིང་ཐིག་ཕྱག་ལེན་གནང་བ་ལ་ད་ལྟ་ཚེས་བཅུ་ཙམ་ལས་ས་ལུགས་ཕྱག་བཞེས་གནང་བ་ཡིན། (རྩོམ་སྒྲིག་པ་ཨོ་རྒྱན། )