ཀླུ་ཁང་དགོན་ནས་སྤྱི་ལེ་༩༠ཙམ་སོང་ན་ཚྭ་ཁ་ལྷོའི་ལྷོ་ངོས་རི་ཁུག་ཏུ་དགོན་དེ་མཇལ་བ་ཡིན། དགོན་དེ་ནི་ཐོག་མར་མཚམས་པ་ཀུན་དགའ་བཀྲ་ཤིས་ཞུ་བས་ཕྱག་བཏབ་གནང་མཛད། ཀུན་དགའ་བཀྲ་ཤིས་ནི་སྤྱི་ལོ༡༨༨༠ལོར་ཡུལ་དེ་གར་འཁྲུངས།མཚུར་ཕུ་ཀརྨ་པ་སྐུ་ཕྲེང་བཅོ་ལྔ་པའི་སྐུ་མདུན་ནས་དབང་ལུང་ཁྲིད་གསུམ་ཞུས་བསྒྲུབས་རྗེས་སླར་ཡང་གནས་དེར་ཕེབས་ནས་དགོན་པ་དེ་ཉིད་ཕྱག་བཏབ་གནང་མཛད། མི་ལོ༡༢ཙམ་སྐུ་མཚམས་པ་ཞུ་བ་དེ་ལྟར་བྱུང་། དེ་ནས་མཚམས་པ་སྐུ་ཕྲེང་གཉིས་པའི་དུས་འདུ་ཁང་ཀ་བ༡༢ཀྱི་ས་རྒྱ་བསྐྱེད་གནང་། ཀརྨ་པ་དང་རྗེ་བཙུན་སྒྲོལ་མའི་སྐུ་བརྙན་སྐུ་རྒྱུ་དངུལ་ལས་གྲུབ་པ་སོགས་ཀྱིས་རྟེན་སྐུ་ཇི་རྙེད་བཞེངས་གནང་མཛད། སྔོན་དགེ་འདུན་༣༦ཙམ་གྱིས་ཀརྨ་བཀའ་བརྒྱུད་ཕྱག་ལེན་མཛད། སྔོན་མཚུར་ཕུ་དགོན་གྱི་དགོན་ལག་ཡིན། དགོན་དེར་ལོ་ལྟར་བོད་ཟླ་༤པའི་ནང་ཁྱིམ་དུད་རེ་ནས་མི་རེ་འོང་སྟེ་སྤྱན་རས་གཟིགས་ཀྱི་སྐུ་བརྙན་གྱི་མདུན་དུ་སྙུང་གནས་དཀར་པོ་ཆ་བརྒྱད་སྲུང་སྲོལ་ཡོད། བོད་ཟླ་༡༢པའི་ཚེས་༢༩ཉིན་ལ་མགོན་པོ་བེང་གི་སྒོ་ནས་གཏོར་རྒྱག་བསྐྱོན་པ་བཅས་ཡིན།
     ད་ལྟ་སྔོན་གྱི་འདུ་ཁང་གི་རྩིག་གདན་སྟེང་བསྐྱར་བཞེངས་གནང་བའི་འདུ་ཁང་ནང་སྐུ་རྒྱུ་གསེར་ཟངས་ལས་གྲུབ་པའི་ཆོས་ལུང་སྤྲུལ་གསུམ་གྱི་སྐུ་བརྙན་དང་། སྟོན་པ་གཙོ་འཁོར་གསུམ། སྤྱན་རས་གཟིགས་བཅུ་གཅིག་ཞལ་ཐོག་སོ་ཕྱེད་གཉིས་ཙམ། ཡང་སྐུ་ཚད་དེ་ལས་ཆུང་ཙམ་གྱི་སྟོན་པའི་སྐུ་བརྙན། གུ་རུ་སྣང་སྲིད་ཟིལ་གནོན། ཀརྨ་པ་སྐུ་ཕྲེང་བཅུ་གཅིག་པའི་སྐུ་བརྙན་མི་ཚད་ཙམ། ལྡེབས་རིས་སུ་འཕགས་པ་གནས་བརྟན་བཅུ་དྲུག   མགོན་ཁང་ནང་མགོན་པོ་བེར་ནག་དང་། མཚུར་ཕུ་དགོན་གྱི་སྲུང་མ་ཁག་གི་ལྡེབས་རིས་སོགས་སྔོན་གྱི་སྐུ་རྣམས་ཀྱི་སྐུ་ཚབ་གསར་བཞེངས་གནང་བ་མཇལ་རྒྱུ་ཡོད། རྩོམ་སྒྲིག་པ་ཨོ་རྒྱན།