དེ་ཡང་བོད་མི་རིགས་ཀྱི་ལོ་གསར་གྱི་དུས་སྟོན་གྱི་བྱུང་ཚུལ་དང་དུས་ཚོད་སོགས་ནི་བོད་མི་རིགས་ཀྱི་སྤྱི་འགྲོ་ས་ལྟར་ཡིན་པས་སྐབས་འདིར་ཆེད་དུ་བཤད་བྱ་མ་ཡིན་ལ།དེ་ལས་ཁྱད་པར་དུ་མདོ་ཁམས་པ་ཡི་ཐིག་ལེ་དགེ་རྩེ་ཆུ་རྫ་ཆུ་ཁའི་བོད་ཀྱི་ལོ་གསར་གྱི་སྲོལ་ལུགས་སྐོར་ཅུང་ཟད་བརྗོད་པར་བྱ་སྟེ། ཚེས་ཉེར་དགུའི་ཉིན་དགོན་པས་དགུ་རྫོངས་སམ་དགུ་གཏོར་འཕེན་ཏེ་ཡུལ་དགོན་དེ་དག་ལ་གནོད་པར་བྱེད་པའི་བགེགས་དང་ལོག་འདྲེན་བར་ཆད་བྱེད་པ་ཐམས་ཅད་བླ་མའི་སྔགས་དང་ཏིང་ངེས་འཛིན་གྱི་ནུས་མཐུ་ལ་བརྟེན་ནས་གཏོར་མ་དང་མཉམ་དུ་འཕངས་བས།ཕྱིར་ལོའི་ལོ་གཅིག་ལ་ནད་གདོན་བར་ཆད་ཐམས་ཅད་སེལ་བའི་དགོས་པ་སོགས་དུ་མ་དང་ལྡན་ཞིང་།ཡུལ་མི་རྣམས་ཀྱིས་རྒྱུན་གཏན་གྱི་བྱ་བར་བཞག་ནས་ཁང་ཁྱིམ་རེ་རེ་བཞིན་དུ་གད་བདར་དང་གཙང་སྦྲ་ཞིབ་ཚགས་བྱེད་པ་དང་གོས་གོན་པ་རྣམས་བཀྲུ་བཤལ་མཛད་ཅིང་།སྐྱེ་པ་རྣམས་ཀྱི་སྐྲ་སེམ་དང་ཁ་སྤུ་དོར།གོས་ལྷམ་གསར་པ་གྱོན་ཞིང་ལྷམ་གདན་སོགས་གསར་པ་བརྗེས་ཤིང་།ལྷག་པར་ཐབ་ཚང་ལ་ལོ་གཅིག་དུས་གཅིག་གི་དུད་དྲེག་སོགས་གཙང་འཕྱག་བྱེད་པ་དེ་ནི་དོན་དངོས་ལ་ལོ་གསར་དགའ་གཏོང་བྱེད་པའི་གཙང་སྦྲ་འཕྲོད་བསྟེན་གྱི་བྱ་བ་ཞིག་ཀྱང་ཡིན་པས་དེ་དག་ལ་ཡོངས་གྲགས་སུ་དགུ་སྤྲུགས་ཞེས་བྱ་ཞིང་།དེ་སྔོན་གཞན་ལ་དོམ་དང་བུ་ལོན་གང་དགོས་ཐམས་ཅད་ཉིན་དེར་ཕྱིར་སྤྲད་བྱ་བ་དང་།དགུང་མོར་རང་ཁྱིམ་གྱི་ནང་མི་ཕོ་མོ་རྒན་གཞོན་ཐམས་ཅད་མཉམ་དུ་ཚོགས་ནས་དགུ་ཐུག་ལ་ཡོངས་ལ་ཡོངས་སུ་ལོངས་སྤྱོད།
 ཚེས་སུམ་ཅུའི་ཉིན་གྲོ་མ་དང་།ཤ་དང་གྲོ་གཅུས་སོགས་བཟའ་བཅའ་རྣམས་བཙོས་ནས་གྲ་སྒྲིག་ལེགས་པར་མཛད་ཅིང་།ཐང་ཀ་དང་གསར་སྐུ་སོགས་རྒྱལ་བའི་སྐུ་གསུང་ཐུགས་རྟེན་རྣམས་ཀྱི་མདུན་དུ་མཆོད་པ་མཆོད་མེ་བཤམས་པ་དང་།སྒོ་ཁྱི་ལ་ཁྱི་སྟོན་ཕུན་སུམ་ཚོགས་པར་སྦྱུར།
ཚེས་གཅིག་གི་སྔ་མོ་ཐོ་རེངས་ཀྱི་དུས་སུ་མལ་ལས་བཞེངས་ནས་སེང་གེའི་ཁ་ཆུ་ལེན་དགོས་པས་ཁྱིམ་མི་ཚང་ལ་གསེར་ཆུ་དང་།དངུལ་ཆུ་ཐོབ་པའི་ཁྱིམ་ཚང་ཞེས་བརྗོད་ནས་ཤིན་ཏུ་ལེགས་པར་བརྩི་ཞིང་།སྤྱིར་ཚེས་གཅིག་ཉིན་དེར་ཆུ་བོ་ཐམས་ཅད་ཡན་ལག་བརྒྱད་ལྡན་གྱི་རང་བཞིན་དུ་འགྱུར་བ་ཡིན་པས།དེ་དང་པོ་ལྷ་ལ་མཆོད་པ་འབུལ་ཞིང་།དེ་ནས་ངོ་འཁྲུ་ཞིང་འཐུང་ན་ལོ་གཅིག་ལ་ཚེ་རིང་ཞིང་ནད་མེད་པ་སོགས་ཀྱི་དགོས་པ་དུ་མ་དང་ལྡན་པའི་བཤད་སྲོལ་ཡོད་པ་དང་།དེ་ནས་ནམ་ལངས་ཁར་སྐྱེས་པ་དེ་དག་ཐམས་ཅད་ཀྱིས་ལུས་ལ་གཟབ་མཆོར་གྱི་གོས་གྱོན་ནས་རང་གི་གནས་རིའམ་ཡུལ་ལྷ་གཞི་བདག་ལ་བསང་དང་གསོལ་ཁ་མཛད་ཅིང་།ཁྱིམ་དུ་ལོག་ནས་རྩམ་ཇ་མངར་མོ་དང་།རྩམ་པ།གླང་ཐུག་སོགས་ལ་རོལ་ཅིང་།ལོ་ལོན་རྣམས་ཀྱིས་རང་ཁྱིམ་དུ་གནའ་གཏམ་བཤད་ཅིང་བཟའ་བཏུང་ཕུན་སུམ་ཚོགས་པ་ལ་ལོངས་སྤྱོད་ནས་འདུག་སྲོལ་ཡོད་པ་དང་།ཉིན་དེར་སྔ་མོར་ཤ་ཟ་བ་དང་།མགྲོན་འབོད་སོགས་བྱེད་སྲོལ་མེད།དེ་ལས་གཞན་ཡང་ལོ་གསར་ཚེས་གཅིག་ཉིན་སྔ་མོར་ཁ་བ་བབས་ཡོད་ན་སྲིད་པ་རྒན་པོ་དགོད་ཁ་ཤོར་ཞེས་ཤིན་ཏུ་ལེགས་ཤོས་སུ་བརྩི་སྲོལ་ཡོད་དོ།།  ཚེས་གཉིས་ཉིན་རྫི་བོ་ལ་ཇ་བསྐོལ་དུ་འཇུག་པ་དང་།གཉེན་ཉེ་བ་དང་དགའ་མཐུན་གྱི་གྲོགས་པོ་རྣམས་མགྲོན་དུ་འབོད་ཅིང་།ཕན་ཚུན་ལོ་གསར་ལ་བཀྲ་ཤིས་བདེ་ལེགས་ཞུ་བ་དང་།དེའི་གོ་རིམ་ཡང་ཁྱིམ་མི་གཙོ་བོ་དང་ཤ་སྐལ་སྦྱིན་ཞིང་མགྲོན་སྐྱེལ་མཛད།དེ་ནས་རིམ་བཞིན་ཚེས་གསུམ་བར་མགྲོན་འབོད་བྱ་ཞིང་།སྤྱིར་ལོ་གསར་ཉིན་གསུམ་གྱི་རིང་དུ་དགེ་སྒྲུབ་བྱས་ན་བྱ་བ་གང་བསྒྲུབས་ན་ལམ་དུ་འགྲོ་བ་སོགས་བསམ་པ་ཡིད་བཞིན་དུ་འགྲུབ་པའི་དགོས་པ་དང་།ལོ་རྗེས་མར་ཡང་བདེ་སྐྱིད་སྔར་ལས་ལྷག་པར་འབྱུང་བ་སོགས་ཟེར་སྲོལ་མཆིས།དེ་བཞིན་དུ་ལོ་གསར་ཚེས་གཅིག་ཉིན་དོམ་སོགས་ཕར་སྦྱིན་པ་དང་།གཞན་ལ་དམོད་མོར་བྱེད་པ་དང་།ངུ་བ་དང་།འཁོན་པ་སོགས་མདོར་ན་བྱ་བ་མི་ལེགས་པ་ཐམས་ཅད་ལ་འཛེམས་ཤིང་།ལོ་གཅིག་གི་བྱ་བ་བཟང་ངན་ཀུན་ལོ་གསར་ཚེས་གཅིག་ལ་རག་ལས་པས་དེ་ལུགས་ཐམས་ཅད་ཀུན་གྱིས་དཀར་པོའི་དགེ་བའི་ཕྱོགས་ལ་འབད་དགོས་ཟེར་སྲོལ་ཡོད་པ་ཡིན་ནོ། དེ་ལྟར་མདོ་སྨད་དགེ་རྩེ་རྫ་ཆུ་ཁའི་འབྲོག་སྡེའི་སྤྱི་ཡི་ལོ་གསར་སྐོར་ཅུང་ཟད་བཤད་པ་ལས།སྤྱི་ཚོ་བ་རེ་ལ་ཡང་ལོ་གསར་གྱི་སྲོལ་ལུགས་རེ་ཡོད་པས་ཐམས་ཅད་ནས་ཐམས་ཅད་དུ་རྣམ་པ་གཅིག་འདྲ་མ་ཡིན་པས་དེ་ལུགས་དམངས་སྲོལ་རིགས་པ་དང་མཐུན་པའི་སྒོ་ནས།དབྱེ་འབྱེད་དང་ཞིབ་འཇུག་མཛད་ནས་བོད་རང་གི་སྲོལ་ལུགས་ཕུན་སུམ་ཚོགས་པ་དེ་ཉིན་བརྒྱུད་འཛིན་དང་དར་སྤེལ་མཛད་པ་ཡིན་ནོ།