ཨེ་མ་ཧོ།གནམ་འཁོར་ལོ་རྩིབས་དགུ་ལ་སྐར་མ་བཟང་།ཡག་ན་ཉི་ཟླ་སྐར་གསུམ་ཤར་ལུགས་ཡག བར་བཀྲ་ཤིས་གཡང་གི་ར་བར།གཟའ་སྐར་ལྡན་སྤྲིན་འཇའ་དག་གསུམ་སྐྱོང་ལུགས་ཡག ས་པད་མ་འདབ་བརྒྱད་དུ།འབབ་གྲུབ་བཟང་ན་འབྲུ་དྲུག་སྣ་ལྔ་འཁྲུངས་ལུགས་ཡག ད་རྟེན་འབྲེལ་གྱི་བཤད་པ་འདི་འདྲ་འདུག་སྟེ།གངས་རི་དང་སེང་གེ་གཉིས་ཀྱི་འབྲེལ་བར།སེང་གདོང་ལྔ་མ་ཉམས་པའི་བཀྲ་ཤིས་པའི་རྟེན་འབྲེལ།བྲག་དཀར་དང་ཐང་དཀར་གཉིས་ཀྱི་འབྲེལ་བར།རྒོད་ཐང་དཀར་གཤོག་སྒྲོ་མ་ཉམས་བར་བྲག་རི་དཀར་པོ་བཙན་གསར་མི་ཉམས་པའི་བཀྲ་ཤིས་པའི་རྟེན་འབྲེལ།ཡོན་བདག་དང་ལྷ་མཆོད་གཉིས་ཀྱི་འབྲེལ་བར།བདུད་རྩི་བཏུང་བར་ཇ་ཆང་གི་འབྲེལ་ཡུན་མ་ཆད་པའི་བཀྲ་ཤིས་པའི་རྟེན་འབྲེལ།སྒང་དང་ལ་རྩེ་གཉིས་ཀྱི་འབྲེལ་བར།དར་ཚོན་སྣ་ལྔའི་རླུང་རྟ་མ་ཉམས་པར་སྒང་རྩེ་ཉམས་པའི་བཀྲ་ཤིས་པའི་རྟེན་འབྲེལ།སྤང་ལྗོངས་དང་མེ་ཏོག་གཉིས་ཀྱི་འབྲེལ་བར།དབྱར་ཟླ་གསུམ་ཆར་ཆུ་མི་ཆད་འབབ་ཚུལ་བཟང་པའི་བཀྲ་ཤིས་པའི་རྟེན་འབྲེལ།རྟ་ཕོ་དང་གསེར་སྒ་གཉིས་ཀྱི་འབྲེལ་བར།སྒ་འོག་ལ་འཇའ་ཟེར་མི་ཉམས་རྣམ་པ་ཀུན་ཏུ་འོད་འཚེར་བའི་བཀྲ་ཤིས་པའི་རྟེན་འབྲེལ།ཆུ་བོ་དང་ཟམ་ཆེན་གཉིས་ཀྱི་འབྲེལ་བར།བརྒྱ་བརྒྱ་སྟོང་སྟོང་འགྲོ་འོང་མ་ཆད་རྒྱུན་གཤར་བའི་བཀྲ་ཤིས་པའི་རྟེན་འབྲེལ།མར་མེ་དང་རྒྱལ་མཚན་གཉིས་ཀྱི་འབྲེལ་བར།མར་ཁུ་སེར་པོ་མི་ཉམས་མར་མེ་ཚེ་འབར་བའི་བཀྲ་ཤིས་པའི་རྟེན་འབྲེལ།ཕ་མ་དང་བུ་རྒྱུད་གཉིས་ཀྱི་འབྲེལ་བར།སྲི་ཞུ་ཞབས་ཏོག་ལེགས་ཤིང་གཏན་དུ་ལྷན་འཛོམས་པའི་བཀྲ་ཤིས་པའི་རྟེན་འབྲེལ།སྤུན་ཟླ་དང་མིང་སྲིང་བར་གྱི་འབྲེལ་བར།དུས་ཚོད་དང་རྒྱུ་རྐྱེན་གྱིས་མ་ཉན་བརྩེ་སེམས་འོ་ཆུ་གཅིག་འདྲེས་ཤིང་མི་འགྱུར་རྡོ་རྗེའི་བཀྲ་ཤིས་པའི་རྟེན་འབྲེལ།ཁྱོ་བོ་དང་ཁྱོ་མོ་གཉིས་ཀྱི་འབྲེལ་བར།ལྷད་མེད་དྭངས་གཙང་གི་མཛའ་བརྩེ་ཟབ་ཅིང་མི་ཚེ་སྐྱིད་ཐག་རིང་བའི་བཀྲ་ཤིས་པའི་རྟེན་འབྲེལ།དཔོན་འཁོར་དང་མངའ་འབངས་བར་གྱི་རྟེན་འབྲེལ་ཞུས་སྲོལ་ཡོད་པ་རེད།